ທ່ານ ພັນຄຳ ວິພາວັນ ຮອງປະທານປະເທດ ໄດ້ໃຫ້ກຽດໂອ້ລົມຕໍ່ກອງປະຊຸມຄົບຄະ ນະ ຄັ້ງທີ 9 ຂອງຄະນະກຳມາທິການແຫ່ງຊາດ ກ່ຽວກັບການປະຕິຮູບລະບົບການສຶກສາ ແຫ່ງຊາດ ປະ ຈຳປີ 2016 ທີ່ໄດ້ຈັດຂຶ້ນໃນທ້າຍອາທິດຜ່ານມາວ່າ: ປັດຈຸບັນພັກ ແລະ ລັດຖະບານ ໄດ້ຕີລາຄາສູງຕໍ່ຜົນ ສຳເລັດຂອງການປະຕິຮູບລະບົບການສຶກສາ ກໍຄືການພັດທະນາຊັບພະຍາກອນມະນຸດແຫ່ງຊາດ ໃນໄລຍະ 10 ປີຜ່ານມາ, ເຊິ່ງຜົນສຳເລັດ ດັ່ງກ່າວ ເປັນການປະກອບສ່ວນເຂົ້າໃນພື້ນຖານການສ້າງສາພັດທະນາປະເທດຊາດ, ສາມາດຕອບສະໜອງພະນັກງານວິຊາການ ລະດັບຕ່າງໆໃຫ້ແກ່ອົງການຈັດຕັ້ງພາກລັດ ແລະ ເອກກະຊົນໄດ້ພຽງພໍໂດຍພື້ນຖານ ແລະ ມີຄວາມເຊື່ອໝັ້ນວ່າ ດ້ວຍບົດ ຮຽນ ແລະ ປະສົບການຕົວຈິງໃນການດຳເນີນການປະຕິຮູບລະບົບການສຶກສາ ກໍຄືການ ພັດທະນາຊັບພະຍາ ກອນມະນຸດແຫ່ງຊາດ ໃນໄລຍະຜ່ານມາ ຈົ່ງພ້ອມກັນສືບຕໍ່ເສີມຂະ ຫຍາຍຜົນສຳເລັດວຽກງານດັ່ງ
ກ່າວໃຫ້ດີຂຶ້ນກວ່າເກົ່າ, ໄປພ້ອມໆກັບການແກ້ໄຂຈຸດອ່ອນ ແລະ ຂໍ້ຄົງຄ້າງ ໃຫ້ໝົດໄປ, ເຊິ່ງລັດຖະ ບານໄດ້ຮັບຮອງການພັດທະນາຊັບພະຍາກອນ ມະນຸດແຫ່ງຊາດ ແລະ ປະກາດໃຊ້ແຜນຍຸດທະສາດການພັດທະນາຊັບພະຍາກອນມະ ນຸດຮອດປີ 2025. ໃນມະຕິກອງປະຊຸມໃຫຍ່ ຄັ້ງທີ 10 ຂອງພັກກໍໄດ້ລະບຸໄວ້ວ່າ: ສືບຕໍ່ເສີມຂະຫຍາຍຜົນສຳເລັດຂອງການປະຕິຮູບການສຶກສາ ແລະ ກິລາ ກໍຄືການພັດທະນາຊັບພະຍາກອນມະນຸດ ຕາມ 3 ລັກສະນະ ແລະ 5 ຫລັກມູນຂອງການສຶກສາ, ໂດຍຖືເອົາຄ່ານິຍົມຂອງສັງຄົມໃຫ້ໄປຕາມທິດການພັດທະນາແບບຍືນຍົງ, ຖືເອົາຊັບພະຍາ ກອນມະນຸດເປັນປັດໃຈຕັດສິນກຳລັງການຜະລິດ, ຖືເອົາຄົນເປັນເປົ້າໝາຍ ແລະ ຈຸດສຸມ ຂອງການພັດທະນາ, ສ້າງຄົນລາວໃຫ້ເປັນພົນລະເມືອງດີ, ມີຄວາມຮັບຜິດຊອບຕໍ່ສັງຄົມ, ມີພະລານາໄມສົມບູນ ແລະ ມີຄວາມສີວິໄລດ້ານຈິດໃຈເພື່ອພັດທະນາປະເທດຊາດ. ນອກນີ້ ທ່ານຍັງກ່າວຕື່ມວ່າ: ລັດຖະບານ ໄດ້ກຳນົດວິໃສທັດຮອດປີ 2030, ຍຸດທະສາດ ຮອດປີ 2025 ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 8 (2016-2020), ເຊິ່ງຈະພັດທະນາໄປຕາມທິດທາງແບບຍືນຍົງ, ໂດຍມີ 17 ເປົ້າ ໝາຍ ແລະ 169 ຄາດ ໝາຍສູ້ຊົນຂອງສະຫະປະຊາຊາດ, ຮັບປະກັນໃຫ້ ສປປ ລາວ ຫລຸດພົ້ນອອກ ຈາກປະເທດດ້ວຍພັດທະນາໃນປີ 2020, ໃຫ້ມີລາຍຮັບປານກາງຫາສູງໃນປີ 2030 ຄາດໝາຍທີ່ລັດຖະບານໄດ້ກຳນົດໄວ້.
ຂ່າວຈາກ: ລາວພັດທະນາ