ພິທີລົງນາມໃນບົດບັນທຶກຄວາມເຂົ້າໃຈ ໄລຍະ 2 ລະຫວ່າງ ອົງການຄົນພິການ ອາຊີ ເພື່ອການພັດທະນາ (ADDP) ປະເທດຍີ່ປຸ່ນ ແລະ ກະຊວງແຮງງານ ແລະ ສະຫວັດດີການສັງຄົມ ແຫ່ງ ສປປ ລາວ, ໃນມູນຄ່າ 161.360 ໂດລາສະຫະລັດ, ໄດ້ມີຂຶ້ນ ໃນວັນທີ 13 ມີຖຸນານີ້, ທີ່ນະຄອນ ຫລວງວຽງຈັນ,ລະຫວ່າງທ່ານ ບຸນປອນ ໄຊຍະເສນ ຫົວໜ້າກົມນະໂຍບາຍຕໍ່ຜູ້ມີຜົນງານ,ກະຊວງແຮງງານ ແລະ ສະຫວັດດີການສັງຄົມ ແລະ ທ່ານນາງ ໂຕມີໂກະ ຢາຊີໂຣະ ປະທານອົງການຄົນ ພິການອາຊີ ເພື່ອການພັດທະນາ ເພື່ອຝຶກວິຊາຊີບໃຫ້ກັບຄູຝຶກທີ່ເປັນຄົນພິການ, ໂດຍຈະເນັ້ນການພັດທະນາທັກສະໂດຍສະເພາະ ເພື່ອຍົກສູງຄວາມຮູ້, ຄວາມສາມາດທາງດ້ານການບໍລິຫານທຸລະກິດຂະໜາດນ້ອຍ, ສຸມໃສ່ການຝຶກອົບຮົມວິຊາຊີບໃຫ້ກັບຄົນພິການບົນສະພາບແວດລ້ອມແບບຫົວໜ່ວຍທຸລະກິດຕົວຈິງ ເພື່ອໃຫ້ເຂົາເຈົ້າ
ສາມາດຖອດຖອນບົດຮຽນ ແລະ ນຳໄປປະຕິບັດເພື່ອໃຫ້ເກີດຄວາມສາມາດໃຫ້ການດຳເນີນທຸລະກິດຕົວຈິງດ້ວຍຕົນເອງໃນອະນາຄົດ,ພ້ອມທັງສຸມໃສ່ຝຶກອົບຮົມຄວາມຮູ້, ຄວາມສາມາດໃຫ້ກັບຄົນພິການຜູ້ທີ່ມີຄວາມໄຝ່ຝັນຢາກເປັນເຈົ້າຕົນເອງທາງດ້ານການເງິນ ແລະ ການດຳລົງຊີວິດຢູ່ໃນສັງຄົມ, ໂດຍ ເຫັນວ່າໄລຍະ 1 ໄດ້ດຳເນີນໄປຢ່າງມີຜົນສຳເລັດສູງສຸດ ຈຶ່ງໄດ້ຕັດສິນໃຈຈັດຕັ້ງປະຕິ ບັດໄລຍະ 2 ຕື່ມອີກ.
ຂ່າວຈາກ: ລາວພັດທະນາ