ໄພໃກ້ຕົວລູກເກີດຂຶ້ນໄດ້ສະເໝີຫາກຜູ່ເປັນພໍ່-ແມ່ບໍ່ຢາກເສຍໃຈພາຍຫຼັງ ວັນນີ້ໃນຫົວບົດ ແມ່ ແລະ ລູກ ກັບ ລາວໂພສຕ໌ ຂໍນຳສະເໜີຫົວຂໍ້ທີ່ມີປະໂຫຍດເຊິ່ງທາງເຮົາໄດ້ນຳມາຈາກວາລະສານ Momypedia ເພື່ອເປັນບົດຮຽນດີໆມາຝາກກັນ ເຊິ່ງເລື່ອງນີ້ມັນສິ່ງທີ່ປະມາດບໍ່ໄດ້ພຽງແຕ່ວິນາທີດຽວ ເຊິ່ງຈະມີຫຍັງແນ່ນັ້ນເຮົາມາຮູ້ກັນເລີຍ

1. ສອນລູກໃຫ້ລອຍນ້ຳເປັນ: ການຈົມນ້ຳເປັນສາເຫດໜຶ່ງທີ່ເຮັດໃຫ້ເດັກນ້ອຍເສຍຊີວິດ ສະນັ້ນທ່ານຄວນສອນໃຫ້ລູກຮູ້ຈັກລອຍນ້ຳ ແລະ ຮູ້ຈັກທັກສະການເອົາຕົວຫຼອດຈາກການຈົມນ້ຳ ເພື່ອໃຊ້ໃນຍາມສຸກເສີນກໍລະນີທີ່ລູກໄປຫຼິ້ນນ້ຳໄກຫູໄກຕາ ຫຼື ຍາມລູກຕົກນ້ຳໃນເວລາເຮົາຂາດສະຕິປ່ອຍລູກຫຼິ້ນນ້ຳຕາມລຳພັງ

2. ສອນໃກ້ລູກຮູ້ຈັກການຊ່ວຍຊີວິດຂັ້ນພື້ນຖານ CPR ຫຼື ການປະຖົມພະຍາບານຂັ້ນຕົ້ນ: ເລື່ອງນີ້ມັນຈະເປັນປະໂຫຍດໃຫ້ກັບລູກຫຼາຍ ບໍ່ວ່າຈະເປັນການເຮັດ CPR ຫຼື ການປະຖົມພະຍາບານເບື້ອງຕົ້ນກໍ່ຕາມ ເພາະຫາກມີເລື່ອງສຸກເສີນເກີດຂຶ້ນລູກອາດຈະນຳຄວາມຮູ້ໄປຊ່ວຍເຫຼືອຕົວເອງ ຫຼື ຄົນອື່ນໄດ້

3. ໃຫ້ລູກນັ່ງຄາດຊີບເມື່ອຂຶ້ນລົດທຸກຄັ້ງ: ເພື່ອປ້ອງກັນລູກໃຫ້ປອດໄພຫຼາຍທີ່ສຸດໃນເວລາເກີດອຸບັດຕິເຫດ

4. ບໍ່ປ່ອຍລູກນ້ອຍໄວ້ຄົນດຽວໃນລົດ ແລະ ເວລາຖອຍລົດ-ອອກລົດຕ້ອງລະວັງ: ຫຼາຍຄັ້ງທີ່ມີຂ່າວວ່າພໍ່ແມ່ປ່ອຍລູກນ້ອຍໄວ້ໃນລົດຄົນດຽວແລ້ວລັອກປະຕຸລົດໄວ້ຈາກນັ້ນຕົວເອງກໍ່ອອກໄປວຽກສ່ວນຕົວບາດກັບມາລູກໄດ້ເສຍຊີວິດແລ້ວ ດັ່ງນັ້ນພໍ່ແມ່ຕ້ອງໄດ້ເອົາລູກອອກຈາກລົດໄປນຳຈະປອດໄພທີ່ສຸດ ແລະ ເມື່ອເວລາຖອຍ ຫຼື ຈະອອກລົດກໍ່ຄວນເບິ່ງດີກ່ອນວ່າມີເດັກນ້ອຍຢູ່ບໍລິເວນນັ້ນ ຫຼື ບໍ່ ເພື່ອຫຼີກເວັ້ນການເກີດອຸບັດຕິເຫດລົດຕຳ, ລົດທັບເດັກ ນ້ອຍ

5. ພາລູກໄປຮັບຢາວັກຊີນໃຫ້ຄົບຕາມກຳນົດ: ເພື່ອສ້າງພູມຕ້ານທານທີ່ຈຳເປັນໃຫ້ລູກ ຮວມເຖິງການໄປກວດສຸຂະພາບລູກເປັນປະຈຳ ເພື່ອຕິດຕາມພັດທະນາການຂອງລູກຈາກແພດຢ່າງເໝາະສົມ

ນອກຈາກ 5 ຂໍ້ທີ່ກ່າວມາຂ້າງເທິງນີ້ແລ້ວ ຖ້າໃຜມີປະສົບການດີໆໃນການລ້ຽງລູກຢາກຮ່ວມແບ່ງປັນກໍ່ສາມາດຂຽນບອກໄດ້ ເພາະທຸກເລື່ອງລາວຈະເປັນປະໂຫຍດໃຫ້ກັບການລ້ຽງລູກ

ທີ່ມາ: http://baby.kapook.com/