ຕາມການລາຍງານຂອງໜ່ວຍເຝົ້າລະວັງພະຍາດລະບາດ, ກະຊວງສາທາລະນະສຸກຕໍ່ນັກຂ່າວພວກເຮົາໃນວັນທີ 7 ມິຖຸນານີ້ໃຫ້ຮູ້ວ່າ: ປັດຈຸບັນສະພາບການລະບາດຂອງພະຍາດໄຂ້ເລືອດອອກ ຫຼື ໄຂ້ຍຸງລາຍຢູ່ຫຼາຍແຂວງໄດ້ມີແນວໂນ້ມເພີ່ມຂຶ້ນ,ໂດຍສະເພາະຢູ່ບັນດາແຂວງພາກໃຕ້ເຊັ່ນ: ແຂວງຈຳປາສັກມີຜູ້ຕິດເຊື້ອແລ້ວຫຼາຍກວ່າ 480 ກໍລະນີ ແລະ ໃນນັ້ນມີຜູ້ເສຍຊີວິດແລ້ວ 6 ຄົນ, ແຂວງສາລະວັນມີ 23 ກໍລະນີ , ເສຍຊີວິດ 1 ຄົນ, ແຂວງອັດຕະປືມີຫຼາຍກວ່າ 50 ກໍລະນີ, ແຂວງວຽງຈັນມີຫຼາຍກວ່າ 70 ກໍລະນີ, ບໍລິຄຳໄຊຫຼາຍກວ່າ 60 ກໍລະນີ, ເຊກອງ 45 ກໍລະນີ, ຫຼວງພະບາງ 46 ກໍລະນີ, ສະຫວັນນະເຂດ 27 ກໍລະນີ, ຄຳມ່ວນ 23 ກໍລະນີ, ຫຼວງນ້ຳທາ 16 ກໍລະນີ, ຂະນະທີ່ນະ ຄອນຫຼວງວຽງຈັນກໍມີຜູ້ຕິດເຊື້ອແລ້ວຫຼາຍກວ່າ 70 ກໍລະນີ, ສຳລັບແຂວງອື່ນໆກໍເລີ່ມມີ ຜູ້ຕິດເຊື້ອໄຂເລືອດອອກແລ້ວຈຳນວນໜຶ່ງ, ຊຶ່ງຕໍ່ສະພາບການດັ່ງກ່າວປັດຈຸບັນກະຊວງສາທາລະນະສຸກພວມຮີບຮ້ອນສົມທົບກັບທ້ອງຖິ່ນສະກັດກັ້ນການລະບາດຂອງພະຍາດດັ່ງກ່າວເພື່ອໃຫ້ຫຼຸດໜ້ອຍຖອຍລົງໂດຍໄວ້, ໂດຍສະເພາະແມ່ນໄດ້ເລັ່ງໃຫ້ຄວາມຮູ້ໃນການປ້ອງກັນຕົວເອງ ແລະ ການທຳລາຍແຫຼ່ງເພາະພັນຂອງຍຸງລາຍຢູ່ຕາມບ້ານ ແລະ ເມືອງທີ່ມີການລະບາດ ແລະ ເຂດທີ່ມີຄວາມສ່ຽງຕ່າງໆ, ພ້ອມທັງແນະນຳໃຫ້ໂຮງໝໍໃຫ້ເອົາໃຈໃສ່ບໍລິການປິ່ນປົວຄົນຕິດເຊື້ອພະຍາດໄຂ້ເລືອດອອກໃຫ້ດີເພື່ອບໍ່ໃຫ້ແຜ່ຂະຫຍາຍໄປສູ່ບ່ອນອື່ນ, ພ້ອມທັງເຕືອນໃຫ້ປະຊາຊົນເປັນເຈົ້າການເອົາໃຈໃສ່ທຳລາຍແຫຼ່ງເພາະພັນຂອງຍຸງລາຍຕາມຄຳຂັວນ 5 ປ ທີ່ກະຊວງສາທາລະນະສຸກວາງອອກຢ່າງເຂັ້ມງວດຄື: 1 ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງມາໄຂ່ໃສ່, 2 ປ່ຽນນ້ຳໃນພາຊະນະເຊັ່ນ: ເຕົ້າດອກໄມ້ , ນ້ຳຮອງຕີນຕູ້ , ຖ້ານຮອງຈອກນ້ຳ, 3 ປ່ອຍປາຫາງນົກຍູງເພື່ອກິນໜອນນ້ຳ, 4 ປັບ ປຸງການອະນາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະ, ກະປ່ອງ, ຢາງຕີນລົດເກົ່າທີ່ມີນ້ຳຂັງ, 5 ປະຕິບັດໃຫ້ເປັນນິໃສປະຈຳທຸກໆອາທິດ ແລະ ຖ້າຫາກເປັນໄຂ້ໃຫ້ໄປພົບແພດໝໍດ່ວນ ພຽງເທົ່ານີ້ກໍຈະສາມາດຫຼຸດຜ່ອນໄຂ້ເລືອດອອກໄດ້.
ຂ່າວຈາກ: ລາວພັດທະນາ