ບັນເທີງ-ດາລາ ກັບ ລາວໂພສຕ໌ ວັນນີ້ຫາກກ່າວເທິງວົງການບັນເທີງບ້ານເຮົາໃນຕອນນີ້ດາລາທີ່ກຳລັງມາແຮງອີກຄົນໜຶ່ງ ຄົງຈະເປັນໃຜໄປບໍ່ໄດ້ນອກຈາກ ສາວລູກນ້ຳ ລັດທິດາ ວົງສິລິ ເຈົ້າຂອງມົງກຸດ Miss Laos 2011
ຕ້ອງຍອມຮັບກັນເລີຍວ່າປີນີ້ເປັນປີໂຊກຂອງນາງ ເພາະພາຍໃນຕົ້ນປີມານີ້ນາງໄດ້ມີຫຼາຍຜົນງານຫຼາຍໆຢ່າງທີ່ໂດດເດັ່ນອອກສູ່ສາຍຕາສັງຄົມ ເຊິ່ງບໍ່ວ່າຈະເປັນ ງານຖ່າຍແບບ, ເດີນແບບ, ການເປັນພຣີເຊັນເຕີສິນຄ້າດັງໆ, ໄດ້ໄປຮ່ວມງານ LAOS FESTIVAL in JAPAN 2016 ເພື່ອເຜີຍແຜ່ວັດທະນະທຳລາວຮ່ວມກັບດາລາຊື່ດັງຂອງລາວຫຼາຍຄົນ ແລະ ມີອີກງານໜຶ່ງທີ່ເຮັດໃຫ້ນາງເປັນທີ່ຮືຮາຂອງວົງການບັນເທີງສອງຝັ່ງໂຂງ ແມ່ນນາງໄດ້ຮັບເລືອກສະແດງ MV ເພງ “ເວລາດຽວກັນ” New Single ຂອງໜຸ່ມ ຟືມ ລັດທະພູມ ຊຸບເປີ້ສະຕາຊື່ດັງຂອງເມືອງໄທ ແລະ ຄາດວ່າສາວຄົນນີ້ຈະມີຜົນງານອອກມາໃຫ້ເຫັນຢູ່ເລື່ອຍໆ
ສາວລູກນ້ຳນອກຈາກຈະມີຄວາມງາມເປັນອາວຸດສຳຄັນແລ້ວ ນາງຍັງມີນິໄສທີ່ໜ້າຮັກ, ຍິ້ມງ່າຍ, ເປັນຄົນນິໄສດີ, ມີມະນຸດສຳພັດທີ່ດີ ແລະ ເປັນຄົນທີ່ລຽບງ່າຍ ຈິ່ງເຮັດໃຫ້ນາງເປັນທີ່ຮັກຂອງຫຼາຍໆຄົນ
ວັນນີ້ເຮົາເລີຍບໍ່ພາດທີ່ຈະເກັບພາບງາມໆຂອງສາວລູກນ້ຳ ມາຝາກບັນດາແຟນໆ ບອກໄດ້ຄຳດຽວເລີຍວ່າ ຫົວໃຈບັນດາໜຸ່ມໆຫຼາຍຄົນຕ້ອງສັ່ນແນ່ນອນເມື່ອພົບຄວາມງາມ ຄວາມໜ້າຮັກສົດໃສຂອງສາວຄົນນີ້
