ດ້ວຍຄວາມມຸ່ງຫວັງຢາກຈະເປັນຜູ້ສະໜອງຊີ້ນສົດ ກໍຄືຊີ້ນຄຸນນະພາບລະດັບໂລກ ທີ່ຈະນຳສົ່ງຈາກຟາມເຖິງພາເຂົ້າຂອງຜູ້ບໍລິໂພກລາຍທຳອິດຂອງ ສປປ ລາວ, ບໍລິສັດ ເອັກສພີການຄ້າ ລາວ-ຈີນ ຈຳກັດ ໄດ້ຮ່ວມມືກັບລັດຖະບານ ຮົງກາລີ ເປີດໂຮງງານປຸງແຕ່ງຊີ້ນສົດລາວຂຶ້ນຢ່າງເປັນທາງການ ໃນວັນທີ 7 ມິຖຸນາ 2016 ທີ່ໂຮງງານ ຂ້າສັດນ້ຳຊວງເຂດນ້ຳຊວງ ນະຄອນຫຼວງວຽງຈັນ.
ໃຫ້ກຽດເປັນປະທານຕັດແຖບຜ້າເປີດໂຮງງານດັ່ງກ່າວຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກຳ-ປ່າໄມ້ ແລະ ທ່ານ ປີເຕີ ຊີຈາໂຕ ລັດ ຖະມົນຕີກະຊວງການຕ່າງປະເທດ ແລະການຄ້າຂອງປະເທດສາທາລະນະລັດຮົງກາຣີ, ມີທ່ານຮອງລັດຖະມົນຕີກະຊວງກະສິກຳ-ປ່າໄມ້ ແລະ ຄະນະຜູ້ແທນຈາກປະເທດຮົງກາຣີ ພ້ອມດ້ວຍພາກ ສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ໄຊພອນ ພຸດທະວົງ ປະທານບໍລິສັດເອັກສພີການຄ້າລາວ-ຈີນ ຈຳກັດ ໃຫ້ຮູ້ວ່າ: ໂຮງງານຊີ້ນສົດລາວລິເລີ່ມຂຶ້ນຈາກຄວາມຕ້ອງການທີ່ຈະສະໜອງ ຜະລິດຕະພັນຈາກຊີ້ນທີ່ໄດ້ຄຸນນະພາບ ລະດັບໂລກ ແລະຜະລິດຕະພັນຊີ້ນຈາກ ພາຍໃນປະເທດສູ່ຜູ້ບໍລິໂພກໂດຍກຳມະ ວິທີການຜະລິດທີ່ທັນສະໄໝຢູ່ພາຍໃນ ປະເທດລາວ, ທີ່ສຳຄັນຄືພວກເຮົາມຸ່ງຫວັງທີ່ຈະເປັນຜູ້ທຳອິດທີ່ສົ່ງຊີ້ນສົດຈາກຟາມເຖິງພາເຂົ້າຂອງທ່ານ, ສຳລັບສັດລ້ຽງໃນຟາມ ລວມທັງອາຫານທີ່ໃຊ້ລ້ຽງສັດແມ່ນລ້ວນແຕ່ຜະລິດພາຍໃນ ແລະ ເປັນວິສາຫະກິດທີ່ຜະລິດ ແລະປຸງແຕ່ງ 100% ໃນລາວ.
ສ່ວນວຽກງານພວກເຮົາເລີ່ມຈາກໂຮງໃຫ້ອາຫານສັດ, ໂຮງລ້ຽງໝູ ທີ່ໄດ້ມາດຖານສາກົນ, ສະເພາະໂຮງຂ້າສັດ ແລະປຸ່ງແຕ່ງຊີ້ນແມ່ນນຳໃຊ້ເຄື່ອງມືທີ່ລ້ຳໜ້າທີ່ສຸດຂອງເອີຣົບທີ່ຕັ້ງຢູ່ບໍ່ໄກຈາກນະຄອນຫຼວງວຽງຈັນ, ນອກນີ້ພວກເຮົາຍັງມີບໍລິການບັນຈຸສຳລັບ ຂາຍສົ່ງ, ເຄືອຂ່າຍການຈັດສົ່ງ ແລະ ຮ້ານຄ້າທີ່ຂາຍສິນຄ້າພວກເຮົາຢູ່ຕາມເມືອງໃຫຍ່ໆໃນລາວ, ຢ່າງໃດກໍຕາມ ພວກເຮົາເຊື່ອວ່າຈະສາມາດສ້າງຜະລິດຕະພັນທີ່ຜະລິດໃນ ສປປ ລາວ ອອກມາ ໄດ້ຢ່າງແທ້ຈິງ ແລະ ພ້ອມເພື່ອການສົ່ງອອກແກ່ປະເທດເພື່ອນບ້ານ, ສາມາດແຂ່ງຂັນກັບຜູ້ຜະລິດໃນພາກພື້ນ, ພວກເຮົາຍັງມີຄວາມໝັ້ນໃຈ ແລະ ກຽມພ້ອມໃນການເປັນສ່ວນໜຶ່ງຂອງປະຊາຄົມເສດຖະກິດອາຊຽນໃນປີ 2016 ນີ້.
ທ່ານລັດຖະມົນຕີກະຊວງກະສິກຳ-ປ່າໄມ້ ໄດ້ຕີລາຄາສູງວ່າ: ວຽກການຜະລິດອາຫານ, ໂພຊະນາການ ຫຼື ຄວາມປອດໄພຂອງອາຫານ ແມ່ນວຽກທີ່ສອດ ຄ່ອງກັບແນວທາງນະໂຍບາຍຂອງພັກ ແລະ ລັດເຮົາ, ຖືກຕາມແຜນພັດທະນາ ເສດຖະກິດ-ສັງຄົມ ສະບັບທີ VIII ຂອງລັດຖະບານ ແລະຖືກຕາມທິດການພັດທະນາກະສິກອນຄື: ກະສິກຳສະອາດ, ສີຂຽວ ແລະ ຍືນຍົງ, ທັງແມ່ນການປະກອບສ່ວນສຳຄັນໃສ່ການຈັດຕັ້ງປະຕິບັດໂຄງ ການຄ້ຳປະກັນດ້ານສະບຽງອາຫານ ແລະ ຜະລິດເປັນສິນຄ້າຂອງລາວ.
ການຊ່ວຍເຫຼືອ, ສະໜັບສະໜູນຂອງປະເທດເພື່ອນມິດແມ່ນຍັງມີຄວາມຈຳເປັນສຳລັບ ສປປ ລາວ ແລະໄດ້ສະແດງຄວາມຂອບໃຈຕໍ່ລັດຖະບານ ແລະປະຊາຊົນຮົງກາຣີ ທີ່ໃຫ້ການຊ່ວຍເຫຼືອທາງດ້ານວິຊາການ ກໍຄືການສະໜັບສະໜູນເງິນກູ້ແບບມີເງື່ອນໄຂ ໄລຍະທີ 1 ເປັນມູນຄ່າ 8,6 ລ້ານໂດລາສະຫະລັດ ໃນການຈັດຕັ້ງປະຕິບັດໂຄງການພັດທະນາດ້ານການລ້ຽງສັດ, ການປະມົງ ແລະ ເງິນກູ້ໄລຍະ 2 ຈຳນວນ 30 ລ້ານໂດລາ ເພື່ອຍົກສູງຄຸນນະພາບຄວາມປອດໄພຂອງຜະລິດຕະພັນສັດໃຫ້ແກ່ ສປປ ລາວ.
ໂຄງການໄລຍະ 2 ແມ່ນຈະໄດ້ເລີ່ມ ຕົ້ນນັບແຕ່ປະຈຸບັນຮອດປີ 2018 ໂດຍມີຈຸດປະສົງເປົ້າໝາຍເພື່ອສືບຕໍ່ພັດທະນາການລ້ຽງສັດ ແລະ ລ້ຽງປາເປັນສິນຄ້າ ແນໃສ່ການປັບປຸງລະບົບການຜະລິດ ແລະ ປຸງແຕ່ງໃຫ້ໄດ້ມາດຖານ, ມີຄວາມ ປອດໄພ, ເລັງໃສ່ໃຫ້ເປັນຕົວແບບ ແລະ ປະກອບສ່ວນເຂົ້າໃນການຈັດຕັ້ງປະຕິບັດໂຄງການຄ້ຳປະກັນດ້ານສະບຽງອາຫານ ແລະ ຜະລິດເປັນສິນຄ້າແຫ່ງຊາດໃຫ້ເປັນຮູບປະທຳ.
ທີ່ມາ: 