ສຳນັກນາຍົກລັດຖະມົນຕີຍີ່ປຸ່ນປັບແກ້ໄຂຕົວເລກລວມຍອດຜະລິດຕະພັນພາຍໃນປະເທດ (ຈີດີພີ) ໄຕມາດທຳອິດຂອງປີນີ້ວ່າ ຂະຫຍາຍຕົວ 0,5% ຈາກທີ່ແຈ້ງເບື້ອງຕົ້ນເມື່ອເດືອນກ່ອນວ່າຂະຫຍາຍຕົວ 0,4% ຫຼັງຈາກຫົດຕົວໃນຊ່ວງໄຕມາດສຸດທ້າຍຂອງປີກ່ອນ.
ການປັບແກ້ຕົວເລກດັ່ງກ່າວເຮັດໃຫ້ໄຕມາດທຳອິດຂອງປີນີ້ຈີດີພີຍີ່ປຸ່ນຂະຫຍາຍຕົວ 1,9%ຕໍ່ປີ ຈາກທີ່ແຈ້ງເບື້ອງຕົ້ນວ່າຂະຫຍາຍຕົວ 1,7%ຕໍ່ປີ ເປັນການປະກາດຕົວເລກຫຼັງຈາກທີ່ນາຍົກລັດຖະມົນຕີຊິນໂຊ ອາເບະຂອງຍີ່ປຸ່ນຕັດສິນໃຈເລື່ອນການຂຶ້ນພາສີຂາຍຈາກ 8% ເປັນ 10% ຈາກເດີມທີ່ຈະມີຜົນຕັ້ງແຕ່ເດືອນເມສາປີໜ້າ ໄປເປັນເດືອນຕຸລາ 2019 ຫຼັງຈາກທີ່ເຄີຍເລື່ອນມາແລ້ວຄັ້ງໜຶ່ງຈາກທີ່ຕ້ອງຂຶ້ນໃນເດືອນຕຸລາປີກ່ອນ ເພາະກະທົບຕໍ່ການຟື້ນຕົວທາງເສດຖະກິດທີ່ຍັງບໍ່ແຂງແຮງ ຂະນະທີ່ຟິດ ເຣດຕິ້ງເຕືອນວ່າ ການຕັດສິນໃຈດັ່ງກ່າວຈະທຳລາຍຄວາມໜ້າເຊື່ອຖືຂອງຍີ່ປຸ່ນໃນການເຮັດຕາມພັນທະກໍລະນີເລື່ອງຫຼຸດຍອດໜີ້ສາທາລະນະຈຳນວນມະຫາສານ.