ຂໍ້​ມູນ​ທາງ​ການ​ຈີນ​ລາຍ​ງານ​ມື້​ນີ້​ວ່າ ຍອດ​ສົ່ງ​ອອກ​ຂອງ​ຈີນ​ຫຼຸດ​ລົງ 4,1% ​ໃນ​ເດືອນ​ພຶດສະພາ ຈາກ​ເມື່ອ​ປີ​ກ່ອນ ຂະນະ​ທີ່​ຍອດ​ນຳ​ເຂົ້າ​ຫຼຸດ​ລົງ​ເລັກ​ນ້ອຍ 0,4% ຂະນະ​ທີ່​ຄວາມ​ຕ້ອງການ​ສິນຄ້າ​ທົ່ວ​ໂລກ​ຍັງ​ຄົງ​ງຽບ​ເຫງົາ ​ແຕ່​ການ​ນຳ​ເຂົ້າ​ເໝືອກວ່າ​ທີ່​ຄາດການ​ໄວ້ ​ເຮັດ​ໃຫ້​ມີ​ຄວາມ​ຫວັງ​ວ່າ​ເສດຖະກິດ​ຈີນ​ກຳລັງ​ກັບ​ມາ​ມີ​ສະຖຽນ​ລະ​ພາບ​ອີກ​ຄັ້ງ.

ສຳນັກງານ​ພາສີ​ຈີນ​ລະບຸ​ວ່າ ຕົວ​ເລກ​ການ​ສົ່ງ​ອອກ​ສິນຄ້າ​ຈີນ​ເດືອນ​ພຶດສະພາ​ຄິດ​ເປັນ​ມູນ​ຄ່າ 181.100 ລ້ານ​ໂດ​ລາ​ສະຫະລັດ ຂະນະ​ທີ່​ການ​ນຳ​ເຂົ້າ​ມີ​ມູນ​ຄ່າ 131.100 ລ້ານ​ໂດ​ລາ​ສະຫະລັດ ​ໂດຍ​ມີ​ຍອດ​ເກີນ​ດຸນ​ການ​ຄ້າ​ບໍ່​ເຖິງ 50.000 ລ້ານ​ໂດ​ລາ​ສະຫະລັດ ລາຍ​ງານ​ລະບຸ​ວ່າ ​ປັດ​ໄຈ​ການ​ຄ້າ​ຕ່າງປະ​ເທດ​ຍັງ​ຄົງ​ເປັນ​ບັນຫາ​ທ້າ​ທາຍ ຜົນສຳ​ຫຼວດພາກ​ການ​ຜະລິດ​​ຢ່າງ​ເປັນ​ທາງ​ການ​ຂອງ​ຈີນ​ເມື່ອ​ອາທິດ​ທີ່​ຜ່ານ​ມາ​ພົບ​ວ່າ ມີ​ສັນ​ຍານ​ຊົງ​ຕົວ​ຂຶ້ນ​ໃນ​ເດືອນ​ພຶດສະພາ ​ແຕ່​ຍັງ​ຖື​ວ່າ​ງຽບ​ເຫງົາ ທ່າມກາງ​ປະລິມານ​ຄວາມ​ຕ້ອງການ​ທັງ​ໃນ ​ແລະ ຕ່າງປະ​ເທດ​ຫຼຸດ​ລົງ ຄັ້ງ​ນີ້​ຖື​ເປັນ​ຂໍ້​ມູນ​ກາ​ນຄ້າ​ຄັ້ງ​ທຳ​ອິດ​ທີ່​ທາງ​ການ​ຈີນ​ເປີດ​ເຜີຍ​ຕົວ​ເລກ​ສຳລັບ​ເດືອນ​ພຶດສະພາ.