ເກີດເຫດໜາກກະໂພກທີ່ຊຸກເຊື່ອງໄວ້ໃນລົດເມໂດຍສານສາຍລະຫວ່າງປະເທດລາວຫວຽດນາມລະເບີດຂຶ້ນ ຢ່າງຮຸນແຮງເຮັດໃຫ້ຜູ້ໂດຍສານເສຍຊີວິດຄາທີ່ 8 ຄົນ, ເຫດການດັ່ງກ່າວເກີດຂຶ້ນໃນວັນທີ 2 ມິຖຸນາ 2016 ເວລາປະມານ 5:00 ໂມງ ຢູ່ເສັ້ນທາງ 12B ຈຸດເກີດເຫດຫ່າງຈາກດ່ານນາເພົ້າຈໍຫຼໍ່ຂອງແຂວງຄຳມ່ວນປະມານ 6 ກິໂລແມັດ.
ທ່ານ ພັຕ ວໍລະຈິດ ດວງລາຕີ ຮອງຫ້ອງຕຳຫຼວດ ປກສ ແຂວງຄຳມ່ວນໃຫ້ຮູ້ວ່າ: ລົດເມຄັນເກີດເຫດເປັນລົດເມຊັ້ນດຽວໜາຍເລກທະບຽນ ບກ 3897 ກຳແພງນະຄອນ ຂັບຂີ່ ໂດຍ ທ້າວ ຫງວຽນ ດຶກຕູ່ ອາຍຸ 26 ປີ ສັນຊາດຫວຽດນາມ ພ້ອມຜູ້ໂດຍສານລວມທັງແອັດ ແລະໂຊເຟິຈຳນວນ 14 ຄົນ (ຫວຽດນາມໝົດ) ອອກຈາກຄີວທ່າແຂກ ແຂວງຄຳມ່ວນ ມຸ່ງໜ້າໄປຫວຽດນາມ, ຊຶ່ງໃນລົດຄັນດັ່ງກ່າວໄດ້ຊຸກເຊື່ອງໄມ້ ແລະໜາກກະໂພກໄວ້ບ່ອນມ້ຽນເຄື່ອງ (ກ້ອງລົດ) ໃນນີ້ມີກະເປົາໃສ່ໜາກກະໂພກນ້ອຍໜ່ວຍມົນຄືໜາກບານຈຳນວນຫຼາຍໄວ້ໃນ ກ້ອງລົດໃກ້ກັບເຄື່ອງຈັກ, ໃນລະຫວ່າງເດີນທາງເກີດມີການຮຸກຖູ ແລະບວກກັບຄວາມຮ້ອນຂອງເຄື່ອງຈັກລົດ ຈິ່ງເຮັດໃຫ້ມີການລະເບີດຂຶ້ນຢ່າງຮຸນແຮງຕົວລົດເສຍຫາຍຢ່າງໜັກຜູ້ໂດຍສານ ແລະເຄື່ອງທີ່ໃສ່ໃນລົດຟົ້ງອອກໄປໃນແຕ່ລະທິດທາງເສຍຊີວິດຄາທີ່ 8 ຄົນ, ເຈັບສາຫັດ 3 ຄົນ, ທີ່ເຫຼືອແມ່ນບາດເຈັບເລັກນ້ອຍ.
ປະຈຸບັນ, ເຈົ້າໜ້າທີ່ ປກສ ແຂວງຄຳມ່ວນໄດ້ກັກຕົວຜູ້ຂັບຂີ່ລົດຄັນດັ່ງກ່າວ ເພື່ອສຶບສວນສອບສວນຫາຕົ້ນເຫດທີ່ມາຂອງໜາກກະໂພກເພື່ອດຳເນີນຄະດີຕາມລະບຽບກົດໝາຍ.
ທີ່ມາ: 