ຫວ້ານຫາງແຂ້ເປັນຢາພື້ນເມືອງລາວທີ່ໄດ້ຮັບຄວາມນິຍົມຫຼາຍທີ່ສຸດບໍ່ແພ້ຢາພື້ນເມືອງຊະນິດອື່ນ ເພາະມີຄຸນສົມ ບັດຫຼາຍດ້ານທີ່ສາມາດນຳມາໃຊ້ທັງບຳລຸງ ແລະ ປິ່ນປົວຜິວໜັງ ລວມທັງສາມາດຮັບປະທານເປັນຢາບຳບັດອາການພາຍໃນຮ່າງກາຍໄດ້ດ້ວຍ. ໃນມື້ນີ້ເຮົາຈຶ່ງບໍ່ລໍຊ້າທີ່ຈະມາຊວນໃຫ້ທ່ານໄດ້ເບິ່ງສັບພະຄຸນຫວ້ານຫາງແຂ້ກັນ ເພື່ອເທື່ອໜ້າຈະໄດ້ເອົາຫວ້ານຫາງແຂ້ມາໄວ້ປູກຕິດເຮືອນເພື່ອໃຊ້ປະໂຫຍດຂອງມັນໃຫ້ຫຼາຍຂຶ້ນ.
ສັບພະຄຸນຫວ້ານຫາງແຂ້ເພື່ອແກ້ບັນຫາສຸກຂະພາບ:
1. ໃຊ້ກິນເປັນຢາຖ່າຍ: ໃຜທີ່ມີບັນຫາຖ່າຍບໍ່ອອກ ຫຼື ຖ່າຍລຳບາກເນື່ອງຈາກລະບົບຂັບຖ່າຍມີບັນຫາສາມາດກິນຫວ້ານຫາງແຂ້ແທນຢາຖ່າຍໄດ້ເລີຍງ່າຍໆ ໂດຍໃຫ້ຕັດເອົາຫວ້ານຫາງແຂ້ພັນທີ່ໃບໃຫຍ່ ແລະ ມີນ້ຳຢາງສີເຫຼືອງໃນປະລິມານຫຼາຍ ເຊິ່ງສັງເກດຈາກຕົ້ນຫວ້ານຫາງແຂ້ທີ່ມີອາຍຸປະມານ 9 ເດືອນເປັນຕົ້ນໄປ. ຈາກນັ້ນ, ຕົ່ງເອົານ້ຳຢາງທີ່ໄຫຼມາຈາກໃບໄປຄ່ຽວໃຫ້ຂົ້ນແລ້ວນຳມາເທລົງໄປໃສ່ພິມຂະໜາດນ້ອຍເພື່ອໃຫ້ກາຍເປັນກ້ອນແຂງໆ ແລະ ນຳມາກິນເປັນຢາຕໍ່ໄປ ເມັດຢາຈະມີລັກສະນະສີແດງອົມນ້ຳຕານຈົນເຖິງສີດຳ ຫຼື ຈະເອີ້ນວ່າ: ຢາດຳ ກໍ່ໄດ້.
ວິທີຮັບປະທານໃຫ້ກິນເທື່ອລະປະມານ 0.25 ກຣາມ (250 ມິນລິກຣາມ) ເຊິ່ງເປັນຂະໜາດເໝາະສົມກັບການກິນເປັນຢາຖ່າຍ ແຕ່ຢ່າງໃດກໍ່ຕາມຖ້າໃຜຕ້ອງການກິນແບບສົດໆ ກໍໃຫ້ຕັດສ່ວນທີ່ເປັນວຸ້ນ ຫຼື ເນື້ອມັນແບ່ງອອກໃຫ້ໄດ້ຂະໜາດ 3-4 ເຊັນຕິແມັດແລ້ວນຳມາລ້າງນ້ຳຈົນສະອາດ. ຈາກນັ້ນ, ແບ່ງຮັບປະທານມື້ລະ 3 ເທື່ອຫຼັງອາຫານພຽງເທົ່ານີ້ກໍຈະຊ່ວຍແກ້ບັນຫາການຂັບຖ່າຍລຳບາກໃຫ້ຄ່ອງຕົວຫຼາຍຂຶ້ນໄດ້ແລ້ວ.
2. ປິ່ນປົວກະເພາະ ແລະ ລຳໄສ້ອັກເສບ: ໃຫ້ປອກເປືອກຫວ້ານຫາງແຂ້ອອກ ຈາກນັ້ນນຳເອົາວຸ້ນໃສໆໄປລ້າງນ້ຳຈົນສະອາດແລ້ວຊອຍຕ່ອນນ້ອຍໆຮັບປະທານມື້ລະ 2 ເທື່ອໆລະ 2 ບ່ວງແກງ ພຽງເທົ່ານີ້ກໍ່ຈະຊ່ວຍບັນເທົາອາການອັກເສບກ່ຽວກັບພະຍາດໃນທາງເດີນອາຫານໄດ້.
3. ບັນເທົາອາການປວດຂໍ້: ພຽງແຕ່ນຳເອົາເນື້ອວຸ້ນ ຫຼື ນໍ້າວຸ້ນກໍໄດ້ມາປັ່ນເປັນນ້ຳຫວ້ານຫາງແຂ້ດື່ມເປັນປະຈຳ ສັບພະຄຸນຫວ້ານດັ່ງກ່າວກໍຈະຊ່ວຍບັນເທົາອາການປວດຕາມຂໍ້ຕ່າງໆລົງໄດ້ດີເຊັ່ນກັນ.
4. ປິ່ນປົວ ແລະ ປ້ອງກັນພະຍາດເບົາຫວານ: ຫວ້ານຫາງແຂ້ສາມາດກິນເພື່ອບຳບັດ ຫຼື ປິ່ນປົວອາການຂອງພະຍາດເບົາຫວານໃນໄລຍະເລີ່ມຕົ້ນໃຫ້ທຸເລົາລົງໄດ້ ໂດຍຕັດຫວ້ານຫາງແຂ້ທີ່ມີຄວາມຍາວປະມານ 3-4 ເຊັນຕິແມັດມາຮັບປະທານເປັນປະຈຳທຸກມື້ ຫຼື ອາດຈະນຳມາປັ່ນເປັນນ້ຳຫວ້ານຫາງແຂ້ແທນກໍໄດ້ເຊັ່ນກັນ ສຳລັບຄົົນທີ່ຕ້ອງການກິນເພື່ອປ້ອງກັນເບົາຫວານກໍຄວນກິນໃນປະລິມານທີ່ນ້ອຍລົງກວ່າທີ່ແນະນຳໄປ.
5. ປ້ອງກັນ ແລະ ບັນເທົາອາການເມົາລົດເມົາເຮືອ: ສຳລັບຄົົນທີ່ມັກມີອາການເມົາລົດເມົາເຮືອເປັນປະຈຳ ໂດຍການກິນປ້ອງກັນອາການນັ້ນພຽງແຕ່ທ່ານກິນວຸ້ນຫວ້ານຫາງແຂ້ ຫຼື ດື່ມນ້ຳຫວ້ານຫາງແຂ້ກໍໄດ້ອາການເມົາກໍຈະເກີດຂຶ້ນນ້ອຍລົງ ແຕ່ຖ້າມີອາການເມົາລົດເມົາເຮືອແລ້ວແນະນຳໃຫ້ຫານ້ຳຫວ້ານຫາງແຂ້ເຢັນໆມາດື່ມໃຫ້ສົດຊື່ນໃຈພ້ອມກັບນັ່ງພັກຜ່ອນຄາຍຈັກໜ້ອຍ ອາການດັ່ງກ່າວກໍຈະດີຂຶ້ນ.
ຮຽບຮຽງໂດຍ: ນຸ້ມນິ້ມ ເສດຖະກິດ-ການຄ້າ