ອີງຕາມຂໍ້ຕົກລົງກ່ຽວກັບການພິມຄຳເຕືອນສຸຂະພາບ ທີ່ເປັນຮູບພາບໃສ່ຊອງ ແລະ ຕຸດຢາສູບ ຂອງກະຊວງສາທາລະນະສຸກ ໄດ້ອອກຂໍ້ຕົກລົງໃຫ້ຜະລິດຕະພັນຢາສູບ ທີ່ຜະລິດຢູ່ພາຍໃນປະເທດ ນຳເຂົ້າມາຈາກຕ່າງປະເທດ ເພື່ອຈຳໜ່າຍໃນ ສປປ ລາວ ລວມທັງຮ້ານຄ້າປອດພາສີ ຕ້ອງໄດ້ພິມຄຳເຕືອນສຸຂະພາບ ທີ່ເປັນຮູບພາບ ພ້ອມຂໍ້ຄວາມໃສ່ຂອບເທິງສຸດຂອງຊອງ ແລະ ຕຸດຢາສູບ ໂດຍໃຫ້ກວມເອົາຢ່າງໜ້ອຍດ້ານລະ 75% ພ້ອມນັ້ນ ໃນການຈັດພິມຄຳເຕືອນສຸຂະພາບ ຕ້ອງມີການສັບປ່ຽນໝູນວຽນທັງ 6 ຮູບພາບ ແລະ ຂໍ້ຄວາມໃນທຸກໆ 50 ພັນຊອງ ແລະ 5 ພັນຕຸດ ເຊິ່ງໃນນັ້ນ ຕ້ອງພິມຮູບພາບ ແລະ ຂໍ້ຄວາມຄຳເຕືອນຕາມຕົ້ນສະບັບທີ່ອະນຸມັດຈາກກົມອະນາໄມ ແລະ ສົ່ງເສີມສຸຂະພາບ ກະຊວງສາທາລະນະສຸກເທົ່ານັ້ນ ເພື່ອໃຫ້ຄ່າຄວາມເຂັ້ມຂອງສີ ນ້ຳໜັກສີ ຂະໜາດ ແລະ ຕຳແໜ່ງຂອງໂຕອັກສອນ ຮູບພາບ ແລະ ຂໍ້ຄວາມຄຳເຕືອນ ລວມທັງຄວາມຊັດເຈນຂອງຮູບ ຕ້ອງພິມຕາມຕົ້ນສະບັບຄຳເຕືອນສຸຂະພາບ ພ້ອມທັງຕ້ອງພິມສະຫຼາກກ່ຽວກັບສານພິດ ແລະ ສານກໍ່ມະເຮັງໃນຄວັນຢາສູບໃສ່ທັງສອງດ້ານຂ້າງ ຫຼື ດ້ານເທິງ ແລະ ດ້ານລຸ່ມຂອງຊອງ ແລະ ຕຸດຢາສູບ.
ສຳລັບຕູ້ວາງຂາຍຢາສູບ ຈະຕ້ອງເປັນປະເພດໃສ ສາມາດສ່ອງເຫັນຊອງຢາສູບທີ່ແທ້ຈິງຢູ່ໃນຕູ້ໄດ້ຢ່າງຊັດເຈນ ເຊິ່ງຊອງຢາສູບດັ່ງກ່າວ ຕ້ອງມີຮູບພາບຂໍ້ຄວາມຄຳເຕືອນ ແລະ ສະຫຼາກ ຕາມກຳນົດຂອງກະຊວງສາທາລະນະສຸກ ແລະ ສຳລັບການພິມຄຳເຕືອນສຸຂະພາບເປັນຮູບພາບ ແລະ ສະຫຼາກແມ່ນມີຜົນບັງຄັບໃຊ້ພາຍໃນໜຶ່ງຮ້ອຍຊາວວັນ ນັບແຕ່ມື້ລົງໃນຈົດໝາຍເຫດທາງລັດຖະການ ຫຼື ຈະເລີ່ມຕົ້ນຈັດຕັ້ງປະຕິບັດໃນເດືອນຕຸລານີ້.
ການພິມຄຳເຕືອນສຸຂະພາບໃສ່ຊອງຢາສູບນີ້ ແມ່ນມີຄຸນປະໂຫຍດຫຼາຍຢ່າງ ໂດຍເປັນການສື່ໃຫ້ທຸກຄົນຮັບຮູ້ ແລະ ເຂົ້າໃຈ ໂດຍສະເພາະກຸ່ມຄົນທີ່ມີລະດັບການສຶກສາຕ່ຳ ແມ່ນມີປະສິດທິພາບສູງສຸດ ແລະ ເປັນສິ່ງທີ່ເຕືອນໄດ້ດີທີ່ສຸດ ໃຫ້ຄົນສູບຢາຄິດເຖິງຜົນຮ້າຍທຸກຄັ້ງທີ່ຈົກກອກຢາອອກມາສູບ ຊ່ວຍກະຕຸ້ນໃຫ້ຄົນເຮົາສົນໃຈຮູບພາບຄຳເຕືອນນັ້ນ ຫຼາຍກວ່າສ່ວນອື່ນຂອງຢາສູບ ເຊິ່ງຜ່ານການສຶກສາຂໍ້ມູນ ໄດ້ຢືນຢັນວ່າຄົນສູບຢາໄດ້ຍອມຮັບວ່າຄຳເຕືອນ ໄດ້ເຮັດໃຫ້ເຂົາຄິດຫາຜົນຮ້າຍຂອງການສູບຢາຫຼາຍຂຶ້ນ ແລະ ຄິດທີ່ຈະອອກຢາສູບ.
ທີ່ມາ: http://www.vientianemai.net/khao/15977.html