ເພື່ອເປັນການແລກປ່ຽນບົດຮຽນຮ່ວມກັນລະຫວ່າງປະຊາຊົນສອງປະເທດລາວ-ໄທ, ທັງເປັນການຂະຫຍາຍຕະຫຼາດການເຊື່ອມໂຍງສິນຄ້າຂອງຊຸມຊົນສູ່ຕະຫຼາດພາຍໃນແລະຕ່າງປະເທດ,ສົ່ງເສີມການພັດທະນາຜະລິດຕະພັນຮອງຮັບການເປີດປະຕູສູ່ປະຊາຄົມເສດຖະກິດອາຊຽນ ແລະຍັງເປັນການສ້າງຄວາມສຳພັນອັນດີງາມລະຫວ່າງປະເທດ, ທາງພັດທະນາການແຂວງອຳນາດຈະເລີນຈິ່ງໄດ້ມາເປີດງານວາງສະແດງສິນຄ້າ ໂອດັອບໄທແລນແຟຣຂຶ້ນຢ່າງເປັນທາງການໃນຕອນແລງຂອງມື້ວານນີ້, ທີ່ສູນການຄ້າວຽງຈັນເຊັນເຕີ ສປປ ລາວ.
ໃຫ້ກຽດເຂົ້າຮ່ວມ ແລະຕັດແຖບຜ້າຂອງທ່ານ ທະນົງສິນ ກັນລະຍາ ຮອງປະທານສະພາອຸດສາຫະກຳ ແລະການຄ້າລາວ, ທ່ານນາງ ພິມົນ ປົງກອງແກ້ວ ອັກ ຄະລາຊະທູດທີ່ປຶກສາຝ່າຍການພານິດ ສະຖານທູດເອກອັກຄະລາຊະທູດແຫ່ງ ລາຊະອານາຈັກໄທ, ທ່ານ ຍິ່ງຍົດ ທະນະຈັນ ເຈົ້າແຂວງອຳນາດຈະເລີນ, ທ່ານ ສົມບັດ ສິຣິພົນວິທະຍາ ຜູ້ອຳນວຍການສູນການຄ້າວຽງຈັນເຊັນເຕີພ້ອມດ້ວຍແຂກຖືກເຊີນເຂົ້າຮ່ວມ.
ທ່ານ ນາງ ການຈະນາ ທະວີວັດ ພັດທະນາການແຂວງອຳນາດຈະເລີນໃນນາມຄະນະກຳມະການໂຄງການພັດທະນາພູມປັນຍາໂອດັອບສູ່ເສດຖະກິດສ້າງສັນກິດຈະກຳທີ 3 ສົ່ງເສີມຕະຫຼາດອາຊຽນ ພາຍໃຕ້ໂອດັອບ ໄທແລນ ແຟຣ 2016 ກ່າວວ່າ: ໂຄງການພັດທະນາພູມ ປັນຍາໂອດັອບສູ່ເສດຖະກິດສ້າງສັນກິດຈະກຳທີ 3 ສົ່ງເສີມຕະຫຼາດອາຊຽນ ພາຍໃຕ້ໂອດັອບ ໄທແລນ ແຟຣ 2016 ແມ່ນ ໂຄງການໜຶ່ງເພື່ອເປັນການແລກປ່ຽນຮຽນຮູ້ຮ່ວມກັນຂອງປະຊາຊົນສອງປະເທດລາວ-ໄທ ທີ່ເນັ້ນໃສ່ການພັດທະນາດ້ານການຂະຫຍາຍຕະຫຼາດເຊື່ອມ ໂຍງສິນຄ້າຂອງຊຸມຊົນສູ່ຕະຫຼາດພາຍໃນ ແລະຕ່າງປະເທດ, ສົ່ງເສີມການພັດທະນາຜະລິດຕະພັນຮອງຮັບການເປີດ ປະຕູສູ່ປະຊາຄົມເສດຖະກິດອາຊຽນ, ພ້ອມທັງພັດທະນາຄຸນນະພາບ ແລະມາດຕະຖານຜະລິດຕະພັນໂອດັອບໃຫ້ເປັນທີ່ຍອມຮັບໃນລະດັບສາກົນ, ການເພີ່ມຊ່ອງທາງຈຳໜ່າຍສິນຄ້າ, ສົ່ງເສີມ ແລະ ສະໜັບສະໜູນໃຫ້ຜູ້ປະກອບການໂອດັອບໄດ້ຮຽນຮູ້ດ້ານການພັດທະນາຄຸນນະພາບ, ມາດຕະຖານຂອງຜະລິດຕະພັນລວມໄປເຖິງດ້ານການບໍລິຫານຈັດການຕະຫຼາດກັບປະເທດເພື່ອນບ້ານ ແລະ ເປັນການສົ່ງເສີມຄວາມສຳພັນດ້ານການຄ້າ ແລະຄວາມຮ່ວມມືລະຫວ່າງປະເທດ.
ສຳລັບການຈັດງານວາງສະແດງສິນຄ້າຄັ້ງນີ້ຖືເປັນຄັ້ງທຳອິດຂອງແຂວງອຳນາດຈະເລີນ ໂດຍມີຜູ້ປະກອບການໄທເຂົ້າຮ່ວມທັງໝົດ 50 ຮ້ານ ຊຶ່ງປະກອບດ້ວຍສິນຄ້າອຸປະໂພກ ແລະບໍລິໂພກ ໂດຍງານດັ່ງກ່າວໄດ້ເລີ່ມວາງສະແດງມາແຕ່ວັນທີ 1 ມິຖຸນາຈົນເຖິງວັນທີ 6 ຂອງເດືອນດຽວກັນ.
ໂອກາດດຽວກັນນັ້ນ ທ່ານ ທະນົງສິນ ກັນລະຍາ ໄດ້ກ່າວວ່າ: ໂຄງການພັດທະນາພູມປັນຍາໂອດັອບ ສູ່ເສດຖະກິດສ້າງສັນກິດຈະກຳທີ 3 ສົ່ງເສີມຕະຫຼາດອາ ຊຽນ ພາຍໃຕ້ໂອດັອບ ໄທແລນ ແຟຣ 2016 ເທື່ອນີ້ຖືໄດ້ວ່າເປັນນິມິດໝາຍອັນ ສຳຄັນຫຼາຍທີ່ຈະເປີດໂອກາດໃຫ້ກັບບັນດານັກທຸລະກິດທັງສອງປະເທດລາວ-ໄທ ໄດ້ຖືໂອກາດນີ້ແລກປ່ຽນບົດຮຽນ, ຂໍ້ມູນຂ່າວສານອັນແປກໃໝ່ ເພື່ອກ້າວເຂົ້າສູ່ການສ້າງຄວາມເຂັ້ມແຂງໃນການດຳເນີນທຸລະກິດ ແລະທີ່ສຳຄັນໄປກວ່ານັ້ນແມ່ນເປັນການເພີ່ມທະວີຄວາມສຳພັນທະໄມຕີລະຫວ່າງສອງຊາດລາວ-ໄທໃຫ້ນັບມື້ມີຄວາມໜັກແໜ້ນຫຼາຍກວ່າເກົ່າ.
ທີ່ມາ: 