ທາງການແມັກຊິໂກເຜີຍວິທີທີ່ ອະລັນ ປູລິໂດ ກອງໜ້າດາວຮຸ່ງທີມໂອລິມເປຍກອສຂອງເກຣກ ເອົາຕົວລອດ ແລະ ໂທລະສັບແຈ້ງຕຳຫຼວດ ຫຼັງຈາກຖືກລັກພາຕົວໃນລັດຕາເມລິປັສ ຊຶ່ງເປັນລັດບ້ານເກີດທາງຕາເວັນອອກສຽງເໝືອຂອງປະເທດ.
ໄອຍະການໃຫ້ສຳພາດສະຖານີວິທະຍຸແຫ່ງໜຶ່ງວ່າ ປູລິໂດ ອາຍຸ 25 ປີ ຖືກຄົນຮ້າຍ 4 ຄົນລັກພາຕົວເມື່ອກາງຄືນວັນເສົາ ຂະນະກັບຈາກງານລ້ຽງສັງສັນພ້ອມແຟນສາວ ຄົນຮ້າຍປ່ອຍຜູ້ຍິງ ແຕ່ຈັບອະດີດນັກເຕະທີມຊາດແມັກຊິໂກໄປຂັງໄວ້ຢູ່ບ້ານຫຼັງໜຶ່ງ ເຂົາພະຍາຍາມແກ້ມັດມືຕົວເອງຈົນສຳເລັດ ແລະ ສູ້ກັບຄົນຮ້າຍທີ່ເຫຼືອຢູ່ຄົນດຽວ ກ່ອນລັກເອົາໂທລະສັບເຄື່ອນທີ່ຂອງຄົນຮ້າຍໜີອອກມາຈາກເຮືອນຫຼັງນັ້ນ ດ້ວຍການຊຸກແວ່ນປະຕູເຮືອນແຕກ ຂໍ້ມືຂວາຈິ່ງຖືກບາດ ລະຫວ່າງນັ້ນໄດ້ໂທລະສັບແຈ້ງຕຳຫຼວດຜ່ານໝາຍເລກສຸກເສີນ 066 ຈົນຕຳຫຼວດໄປພົບເຂົາທີ່ເຮືອນອີກຫຼັງໜຶ່ງ ເມື່ອກາງເດິກວັນອາທິດ.
ໄອຍະການ ກ່າວວ່າ ເຫດການທັງໝົດເກີດຂຶ້ນໄວຫຼາຍ ຊ່ວງທີ່ໄດ້ຍິນສຽງແວ່ນປະຕູແຕກ ຕຳຫຼວດຄິດວ່າເປັນສຽງປືນ ຂະນະທີ່ປູລິໂດຄິດວ່າຕຳຫຼວດທີ່ບຸກເຂົ້າມາເປັນຄົນຮ້າຍທີ່ເຫຼືອກັບມາແລ້ວ ຕຳຫຼວດບຸກເຂົ້າໄປໃນເຮືອນນັ້ນໂດຍໃຊ້ເວລາບໍ່ເທົ່າໃດນາທີ ຈັບຕົວຜູ້ຕ້ອງສົງໄສໄດ້ 1 ຄົນ ເປັນຄົນຈາກລັດເວຣາກຣູຊ ຊຶ່ງຢູ່ຕິດກັບລັດຕາເມລີປັສ ແລະ ເປັນສະມາຊິກແກ້ງທີ່ເກີດເຫດໃນເມືອງຊິວດັດວິໂຕເຣຍ ເມືອງເອກຂອງລັດຕາເມລິປັສ ຄົນຮ້າຍໄດ້ໂທລະສັບຫາຄອບຄົວຂອງປູລິໂດ 2 ຄັ້ງ ຮຽກຄ່າໄຖ່ 6 ລ້ານເປໂຊ ເຫດການນີ້ເຮັດໃຫ້ຫຼາຍຄົນນຶກເຖິງທ້າວ ຣູເບນ ໂອມາ ໂຣມາໂນ ຄູຝຶກຊາວອາກຊັງຕິນທີ່ຖືກລັກພາຕົວໃນນະຄອນຫຼວງແມັກຊິໂກ ເມື່ອປີ 2006 ຂະນະທີ່ໄປຝຶກສອນທີມບານເຕະທ້ອງຖິ່ນ ເຂົ້າຖືກຈັບໄວ້ດົນເຖິງ 65 ວັນກວ່າຈະໄດ້ຮັບການຊ່ວຍເຫຼືອ.