ນັກດື່ມຫຼາຍຄົນຈະງົດການດື່ມສິ່ງມຶນເມົາໃນຊ່ວງເຂົ້າພັນສາເປັນເວລາ3 ເດືອນໄດ້ ແຕ່ບາງຄົນຢາກເຮັດພັດອົດໃຈບໍ່ໄດ້ ຍອມໃຈອ່ອນທຸກຄັ້ງ ວັນນີ້ພວກເຮົາເລີຍມີວິທີເລີກດື່ມສິ່ງມຶນເມົາ ຕົວຊ່ວຍຢຸດເມົາຂອງນັກດື່ມກັບໃຈ ມາໃຫ້ລອງເຮັດເບິ່ງ ເຊິ່ງຈະມີວິທີໃດແນ່ນັ້ນເຮົາມາເບິ່ງກັນເລີຍ

1. ປັບຕົວກັບສະພາບແວດລ້ອມ

ສະພາບແວດລ້ອມອ້ອມຂ້າງຖືວ່າສຳຄັນຫຼາຍ ເພາະບາງຄົນສາມາດເລີກດື່ມເຫຼົ້າ, ເບຍໄດ້ແລ້ວ ແຕ່ກໍ່ຍັງກັບມາດື່ມອີກຄັ້ງ ເພາະມີສະພາບແວດລ້ອມກະຕຸ້ນເຮັດໃຫ້ທ່ານເກີດຢາກດື່ມອີກຄັ້ງເຊັ່ນ: ກຸ່ມເພື່ອນນັກດື່ມ, ສະຖານທີ່ອາໃສຢູ່ໃກ້ແຖວຮ້ານທີ່ມັກໄປດື່ມ, ໃຈອ່ອນກັບຂໍ້ອ້າງທີ່ໝູ່ຊວນໄປດື່ມແບບເດີມໆ ຖ້າທ່ານຍັງກັບເຂົ້າສູ່ສັງຄົມປະເພດນີ້ເໝືອນທີ່ຜ່ານມາ ທ່ານກໍ່ຈະກັບໄປສູພຶດຕິກຳການດື່ມສິ່ງມຶນເມົາຄືເກົ່າໄດ້ງ່າຍ

2. ປັບຮ່າງກາຍ

ກຸ່ມຄົນທີ່ດື່ມຈະແບ່ງອອກເປັນ 2 ກຸ່ມຄື: ຄືດື່ມເປັນປະຈຳຈົນຕິດ ແລະ ກຸ່ມທີ່ດື່ມເປັນບາງຄັ້ງຄາວ ເຊິ່ງກຸ່ມທຳອິດຕ້ອງໃຫ້ຄວາມສຳຄັນ ແລະ ຊ່ວຍເຫຼືອ ເຊິ່ງການດື່ມແອລກໍຮໍຖືເປັນການເສບຕິດປະເພດໜຶ່ງ ຫຼາຍຄົນຕິດຈົນບໍ່ສາມາດຢຸດດື່ມໄດ້ງ່າຍໆ ເມື່ອເລີກດື່ມແລ້ວຈະມີອາການຂ້າງຄຽງ ການດື່ມສິ່ງມຶນເມົາຢ່າງຕໍ່ເນື່ອງຈະສົ່ງຜົນເສຍຕໍ່ສຸຂະພາບ ຈິ່ງຕ້ອງພັກຜ່ອນໃຫ້ພຽງພໍ ກິນອາຫານໃຫ້ຄົບ 5 ໝູ່ ແລະ ອອກກຳລັງກາຍເປັນປະຈຳ

3. ຝຶກຈິດໃຈໃຫ້ເຂັ້ມແຂງ

ສູ້ດ້ວຍຕົນເອງ ຕັ້ງໃຈດີແລ້ວກໍ່ເຮັດຕໍ່ໄປ ທີ່ສຳຄັນແມ່ນກຳລັງໃຈຈາກຄອບຄົວຈະມີສ່ວນຊ່ວຍໃຫ້ນັກດື່ມມີກຳລັງໃຈ ແລະ ກ້າຕັດສິນໃຈປ່ຽນແປງຕົວເອງ ອົດດື່ມມື້ລະໜ້ອຍ, ອົດດື່ມທຸກວັນມັນກໍ່ກາຍເປັນສິນເຄີຍ ແລະ ໃນທີ່ສຸດກໍ່ຈະສຳເລັດ

4. ຫາແຮງຈູງໃຈ

ຖ້າໃຜສາມາດເລີກດື່ມແອລກໍຮໍໃນຊ່ວງເຂົ້າພັນສາ 3 ເດືອນໄດ້ໂອກາດທີ່ທ່ານຈະບໍ່ຄິດກັບໄປດື່ມກໍ່ມີສູງຫຼາຍ ເພາະຜ່ານໄລຍະ 3 ເດືອນນັ້ນທ່ານຕ້ອງຜ່ານສິ່ງລໍ້ຕາລໍ້ໃຈຕ່າງໆນາໆແຕ່ທ່ານກໍ່ຜ່ານມັນໄປໄດ້ ແລະ ແຮງຈູງໃຈຂອງທ່ານອີກຢ່າງຄືທ່ານຕ້ອງຄິດເຫັນຄວາມສຸກຂອງຄອບຄົວ, ຄວາມກ້າວໜ້າຂອງຕົວເອງ,​ ຄິດເຖິງໂຣກພະຍາດທີ່ຈະເກີດຂຶ້ນກັບຕົວເອງ ແລະ ອື່ນໆໃຫ້ຫຼາຍ

ການເລີກດື່ມສິ່ງມຶນເມົາ ນອກຈາກຈະຊ່ວຍໃຫ້ຮ່າງກາຍຂອງທ່ານແຂງແຮງແລ້ວ ຍັງຊ່ວຍທ່ານປະຫຍັດເງິນ ແລະ ຍັງຊ່ວຍຫຼຸດບັນຫາສັງຄົມໃນເລື່ອງຕ່າງໆທີ່ເກີດຂຶ້ນຍ້ອນຄວາມເມົາໄດ້ອີກດ້ວຍ

ທີ່ມາ: http://health.kapook.com/view133282.html