ເຈົ້າໜ້າທີ່ມຽນມາເປີດເຜີຍມື້ນີ້ວ່າ ສາມາດຢຶດຢາບ້າໄດ້ປະມານ 21 ລ້ານເມັດ ຊຶ່ງມີມູນຄ່າໃນຕະຫຼາດປະມານ 35,5 ລ້ານໂດລາທີ່ບໍລິເວນຊາຍແດນຕິດກັບປະເທດຈີນ ຊຶ່ງຖືເປັນການຢຶດຢາເສບຕິດໄດ້ຫຼາຍທີ່ສຸດເປັນປະຫວັດຕິການເປັນອັນດັບ 2.
ລາຍງານລະບຸວ່າ ເຈົ້າໜ້າທີ່ຢຶດຢາເຫຼົ່ານີ້ໄດ້ທີ່ເມືອງແຫ່ງໜຶ່ງໃນລັດສານ ຊຶ່ງຢູ່ທາງພາກເໝືອຂອງປະເທດເມື່ອວັນເສົາຜ່ານມາ ແລະ ຄົນຂັບລົດບັນທຸກທີ່ຖືກຈັບກຸມໃຫ້ການກັບຕຳຫຼວດວ່າ ເຂົາໄດ້ຮັບການວ່າຈ້າງໃຫ້ນຳຢາບ້າໄປສົ່ງທີ່ເມືອງມັນຕະເລ ຊຶ່ງເປັມເມືອງໃຫຍ່ອັນດັບສອງຂອງມຽນມາ ຈາກການສອບສວນພົບວ່າ ຢາບ້າທີ່ຢຶດໄດ້ນີ້ ເປັນຂອງຄົນຮ້າຍທີ່ກຽວຂ້ອງກັບຢາບ້າທີ່ຢຶດໄດ້ທີ່ເມືອງມັດຕະເລເມື່ອວັນທີ 5 ມີນາຜ່ານມາ ຄົນຮ້າຍລາຍນີ້ຍັງຄົງຫຼົບໜີການຈັບກຸມຂອງເຈົ້າໜ້າທີ່ຢູ່ ຢາບ້າທີ່ຢຶດໄດ້ດັ່ງກ່າວມີຈຳນວນຫຼາຍເປັນອັນດັບ 2 ໂດຍເມື່ອປີທີ່ຜ່ານມາ ເຈົ້າໜ້າທີ່ສາມາດຢຶດຢາບ້າທີ່ມີມູນຄ່າ 100 ລ້ານໂດລາໄດ້ທີ່ນະຄອນຢ່າງກຸ້ງ ແລະ ເຈົ້າໜ້າທີ່ເຊື່ອວ່າ ຢາບ້າເຫຼົ່ານີ້ຈະຖືກສົ່ງຕໍ່ໄປຍັງຕ່າງປະເທດ.