ສຳນັກຂ່າວຕ່າງປະເທດ ລາຍງານໃນວັນທີ 29 ພຶດສະພາຜ່ານມານີ້ວ່າ ສາຍການບິນຫວຽດນາມແອຣ໌ລາຍ ຊຶ່ງເປັນສາຍການບິນແຫ່ງຊາດຂອງຫວຽດນາມ ໄດ້ຕົກລົງຂາຍຮຸ້ນຈຳນວນ 8.77% ໃຫ້ແກ່ ສາຍການບິນ ANA ຂອງຍີ່ປຸ່ນ ໃນມູນຄ່າກວ່າ 109 ລ້ານໂດລາ ໂດຍມີພິທີລົງນາມຢູ່ນະຄອນຫລວງໂຕກຽວ ໃນວັນເສົາທີ 28 ພຶດສະພາ 2016 ຜ່ານມານີ້ ໃນລະຫວ່າງທີ່ ທ່ານ ຫງວຽນ ຊວນ ຟຸກ ນາຍົກລັດຖະມົນຕີຫວຽດນາມ ເດີນທາງເຂົ້າຮ່ວມ ກອງປະຊຸມສຸດຍອດຜູ້ນຳຈີ 7 ເປີດກວ້າງ ທີ່ປະເທດຍີ່ປຸ່ນເປັນເຈົ້າພາບ.
ທັງສອງສາຍການບິນ ວາງແຜນໃນການລິເລີ່ມ ໂຄງການຂະຫຍາຍເຄືອຂ່າຍເສັ້ນທາງບິນ ນັບຕັ້ງແຕ່ວັນທີ 30 ຕຸລາປີນີ້ເປັນຕົ້ນໄປ ໂດຍຈະຮ່ວມກັນເປີດໃຫ້ບໍລິການ ເສັ້ນທາງບິນທັງພາຍໃນຫວຽດນາມ ແລະ ຍີ່ປຸ່ນ ລວມ 30 ເສັ້ນທາງ ແລະ ເສັ້ນທາງລະຫວ່າງປະເທດອີກ 10 ເສັ້ນທາງ.
ຈາກຂໍ້ຕົກລົງຂາຍຮຸ້ນດັ່ງກ່າວ ລັດຖະບານຫວຽດນາມ ຈະຍັງຄົງມີຮຸ້ນເຫລືອຢູ່ໃນສາຍການບິນ ຫວຽດນາມແອຣ໌ລາຍ 87.73% ແລະ ນອກຈາກນັ້ນ ສາຍການບິນດັ່ງກ່າວ ຍັງມີແຜນການຂາຍຮຸ້ນ ໃຫ້ເຫລືອສ່ວນຖືຄອງຢູ່ 75% ແລະ ຫລຸດລົງເຫລືອ 65% ຕາມລຳດັບ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!