ເພື່ອເຮັດໃຫ້ຫາງສຽງການຊື້ຂາຍສັດ-ຂາຍຊີ້ນໝູຂອງຜູ້ປະກອບການທຸລະກິດຂາຍສົ່ງ-ຂາຍຍ່ອຍໄດ້ເປັນເອກະພາບກັນທາງດ້ານລາຄາຢູ່ພາຍໃນເມືອງຫຼວງພະບາງ ບໍ່ດົນມານີ້ ທາງພະແນກອຸດສາຫະກຳ ແລະການຄ້າແຂວງຫຼວງພະບາງ ໂດຍສະເພາະແມ່ນຂະແໜງການຄ້າພາຍໃນໄດ້ຈັດກອງປະຊຸມຫາລືກ່ຽວກັບບັນຫາດັ່ງກ່າວ ເພື່ອແນໃສ່ເຮັດພໍ່ແມ່ປະຊາຊົນກໍຄືຜູ້ບໍລິໂພກພາຍໃນເມືອງໄດ້ຮັບຄວາມເປັນທຳ.
ທ່ານ ສົມສັກ ບຸນມາເພັດ ຮອງຫົວໜ້າພະແນກອຸດສາຫະກຳ ແລະ ການຄ້າ, ປະທານກອງປະຊຸມໄດ້ກ່າວວ່າ: ການຫາລືຮ່ວມກັນຂອງຜູ້ປະກອບການທຸລະກິດຂາຍຍ່ອຍ-ຂາຍສົ່ງໃຫ້ເປັນເອກະພາບກັນພາຍໃນເມືອງຫຼວງພະບາງ ຄັ້ງນີ້ແມ່ນຈະເປັນທາງອອກທີ່ດີໃນການນຳເຂົ້າໝູພັນຊີ້ນທີ່ບໍ່ມີຄຸນນະພາບຈາກປະເທດເພື່ອນບ້ານເຂົ້າມາບໍລິໂພກໃນທ້ອງຕະຫຼາດທັງນີ້ ກໍເພື່ອເປັນການກະຕຸກຊຸກຍູ້ ແລະສົ່ງເສີມຜະລິດຕະພັນພາຍໃນແຂວງໃຫ້ນັບມື້ນັບຫຼາຍຂຶ້ນທາງດ້ານປະລິມານ ແລະ ຄຸນນະພາບດີ ເພື່ອສະໜອງໃຫ້ພຽງພໍກັບຄວາມຮຽກຮ້ອງຕ້ອງການຂອງສັງຄົມ.
ທ່ານ ບຸນຮັກ ສວມໄຊກອງ ຫົວໜ້າຂະແຫນງການຄ້າພາຍໃນແຂວງໃຫ້ຮູ້ວ່າ ສຳລັບການບໍລິໂພກຊີ້ນໝູຢູ່ພາຍໃນເມືອງຫຼວງພະບາງສະເລ່ຍມື້ລະ 130 ໂຕ ເນື່ອງຈາກວ່າແຂວງຫຼວງພະບາງເປັນແຂວງທາງຜ່ານຂອງບັນດາແຂວງພາກໜືອ, ເປັນສູນກາງທາງດ້ານການທ່ອງທ່ຽວ, ການສຶກສາ, ສາທາລະນະ ສຸກ ແລະເປັນສູນກາງດ້ານເສດຖະກິດການຄ້າຂອງບັນດາແຂວງພາກເໜືອ ສະນັ້ນຈິ່ງເຮັດໃຫ້ແຂກຈາກທັງພາຍໃນ ແລະຕ່າງປະເທດຫຼັ່ງໄຫຼເຂົ້າມາທ່ຽວຊົມແຫຼ່ງທ່ອງທ່ຽວຂອງເມືອງມໍລະດົກ ໂລກນັບຫຼາຍລ້ານຄົນໃນແຕ່ລະປີ ພ້ອມ ນີ້ກໍຍັງມີນັກຮຽນ, ນັກສຶກສາຈາກຕ່າງແຂວງເຂົ້າມາສຶກສາຢູ່ບັນດາສະຖາບັນການສຶກສາພາຍໃນແຂວງຫຼວງພະ ບາງ ຈິ່ງເຮັດໃຫ້ບໍລິມາດການບໍລິໂພກ ຊີ້ນໝູເພີ່ມຂຶ້ນທຸກໆປີ.
ແນວໃດກໍດີ ເພື່ອເຮັດໃຫ້ປັດໄຈການສະໜອງ ແລະ ຄວາມຕ້ອງການສະບຽງອາຫານປະເພດຊີ້ນໝູພຽງພໍກັບຄວາມຕ້ອງການຂອງສັງຄົມທາງໜ່ວຍງານ ການຄ້າພາຍໃນຮ່ວມກັບພາກສ່ວນທີ່ກ່ຽວຂ້ອງໄດ້ລົງເກັບກຳຂໍ້ມູນ ແລະສຶກ ສາຄວາມອາດສາມາດຂອງການລ້ຽງ ໝູູພາຍໃນທີ່ຈະສາມາດສະໜອງໃຫ້ແກ່ຕະຫຼາດພາຍໃນ ແລະການສ້າງແຜນດຸນ ດ່ຽງການສະໜອງ ແລະຄວາມຕ້ອງ ການພາຍໃນ, ການຄຸ້ມຄອງລາຄາໝູເປັນ (ຂອດລ້ຽງ), ລາຄາຂາຍສົ່ງ ແລະ ຂາຍຍ່ອຍໃຫ້ໄປຕາມກົນໄກເສດຖະກິດຕະຫຼາດໃນແຕ່ລະໄລຍະພ້ອມທັງຮັບປະກັນດ້ານປະລິມານ ແລະຄຸນນະພາບຂອງໝູທີ່ຈະສະໜອງໃຫ້ແກ່ຕະຫຼາດພາຍໃນ ແຂວງຫຼວງພະບາງຕື່ມອີກ.
ສຳລັບການຫາລືດັ່ງກ່າວແມ່ນໄດ້ຈັດຂຶ້ນໃນວັນທີ 24 ພຶດສະພາ ຜ່ານມານີ້ຢູ່ພະແນກອຸດສາຫະກຳ ແລະການຄ້າແຂວງຫຼວງພະບາງ ໂດຍການເປັນປະທານຂອງ ທ່ານ ສົມສັກ ບຸນມາເພັດ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຫຼວງພະບາງ, ມີບັນດາຫົວໜ່ວຍທຸລະກິດຜູ້ປະກອບການຄ້າຂາຍໝູຢູ່ພາຍໃນເມືອງຫຼວງພະບາງ ພ້ອມດ້ວຍພະນັກງານຂະແໜງການຄ້າພາຍໃນຂອງພະແນກເຂົ້າຮ່ວມ.