ພາຍຫຼັງທີ່ຖືກປະຊາຊົນຮຽກຮ້ອງເຖິງ ສຳນັກຂ່າວລາວໂພສເລື່ອງ ຢາກຂໍໃຊ້ເສັ້ນທາງເບຕົງຮ່ວມກັບ ບໍລິສັດຂຸດຄົ້ນຄຳ ຄຳເກີດແສນອຸດົມ ທີມຂ່າວຈຶ່ງໄດ້ລົງຕິດຕາມສອບຖາມ ຈຶ່ງໄດ້ຄຳຕອບວ່າເພື່ອຮັບປະກັນຄວາມປອດໄພ.
ບໍ່ຄຳ ຄຳເກີດແສນອຸດົມ ຕັ້ງຢູ່ພາກຕາເວັນອອກສ່ຽງໃຕ້ຂອງເທສະບານຫຼັກຊາວ ເມືອງຄຳເກີດແຂວງບໍລິຄຳໄຊ ເປັນການສຳປະທານຂຸດຄົ້ນຂອງ ບໍລິສັດ ພອນສັກ ໃນເນື້ອທີ່ 105 ຕາກິໂລແມັດ ອາຍຸສຳປະທານ 30 ປີ (ຕາມຂໍ້ມູນທີີ່ບໍ່ເປັນທາງການ)
ປະຊາຊົນບ້ານນາໄຮຫຼາຍຄົນໄດ້ແຈ້ງຕໍ່ນັກຂ່າວເຮົາວ່າ ເມື່ອກ່ອນທີ່ທາງບໍລິສັດບໍ່ທັນໄດ້ສ້າງເສັ້ນທາງເຂົ້າສູ່ເຂດຂຸດຄົ້ນຄຳນັ້ນ ທາງບໍລິສັດກໍໄດ້ໃຊ້ເສັ້ນທາງເກົ່າ(ຈາກບ້ານນ້ຳພາວ-ວັງກໍ່-ນາໄຮ) ຮ່ວມກັບປະຊາຊົນເຂົ້າສູ່ບໍ່ຄຳ ແຕ່ພາຍຫຼັງທີ່ທາງຜູ້ສຳປະທານໄດ້ສ້າງເສັ້ນທາງເບຕົງເຂົ້າເຂດຂຸດຄົ້ນຄຳແລ້ວ ທາງຜູ້ສຳປະທານຈຶ່ງໄດ້ເຊົາແລ່ນລົດຜ່ານເສັ້ນທາງເກົ່າ ແລ້ວໄປແລ່ນເສັ້ນທາງໃໝ່ ພ້ອມທັງສະຫງວນສິດບໍ່ໃຫ້ປະຊາຊົນໄດ້ໃຊ້ຮ່ວມ.
ອີງຕາມການແຈ້ງຂອງພະນັກງານຜູ້ໜຶ່ງທີ່ບໍ່ປະສົງອອກນາມໃນບໍລິສັດຂຸດຄົ້ນຄຳໄດ້ ແຈ້ງຕໍ່ນັກຂ່າວຂອງພວກເຮົາເມື່ອວັນທີ 25 ພຶດສະພາ 2016 ທີ່ຜ່ານມາວ່າ ການທີ່ບໍລິສັດຂຸດຄົ້ນຄຳບໍ່ອະນຸຍາດໃຫ້ພໍ່ແມ່ປະຊາຊົນໄດ້ທຽວເສັ້ນທາງເບຕົງຮ່ວມນັ້ນ ແມ່ນເຫດຜົນທາງດ້ານຄວາມສະຫງົບແລະຄວາມປອດໄພຂອງຊີວິດແລະຊັບສິນຂອງພໍ່ແມ່ປະຊາຊົນເອງ ເນື່ອງຈາກທາງບໍລິສັດຈະມີບາງເວລາຂອງບາງວັນ ຈະມີການລະເບີດຫິນ ເຊິ່ງອາດຈະເຮັດໃຫ້ເກີດເຫດຄວາມບໍ່ປອດໄພຂຶ້ນໄດ້.
ແນວໃດກໍຕາມ, ປະຊາຊົນໄດ້ຮຽກຮ້ອງຜ່ານ ສຳນັກຂ່າວລາວໂພສຕື່ມວ່າ ພໍ່ແມ່ປະຊາຊົນຫຼາຍພັນຄົນທີ່ຕ້ອງການທຽວທາງຜ່ານເສັ້ນທາງນີ້ຂໍຮຽກຮ້ອງໃຫ້ທາງບໍລິສັດພິຈາລະນາຕື່ມ ເຊັ່ນ ອາດຈະອະນຸຍາດໃຫ້ປະຊາຊົນໄດ້ໃຊ້ເສັ້ນທາງ ໃນເວລາຫຼືວັນທີ່ ບໍ່ມີແຜນການລະເບີດຫິນ ທັງນີ້ກໍເພື່ອອຳນວຍຄວາມສະດວກແກ່ການສັນຈອນຂອງພໍ່ແມ່ປະຊາຊົນ ເນື່ອງຈາກເສັ້ນທາງເກົ່າທີ່ໃຊ້ຢູ່ໃນປັດຈຸບັນທີ່ມີຄວາມຍາວປະມານ 30 ກິໂລແມັດ ແມ່ນເປັນເສັ້ນທາງປູຫິນໄດ້ຫຼາຍປີແລ້ວ ມີຫິນກ້ອນນ້ອຍກ້ອນໃຫຍ່ ມີບ່ອນຫຼຸບບ່ອນໂນນ ແລະມີຂີ້ໃຫງ່ຫຼາຍ ເປັນເຫດໃຫ້ການເດິນທາງຊັກຊ້າ, ພາຫະນະເປ່ເພ ແລະເກີດອຸບັດເຫດຫຼາຍຄັ້ງໃນໄລຍະຜ່ານມາ.
ໃນຂະນະດຽວກັ້ນນີ້, ເພື່ອຮັກສາສະພາບແວດລ້ອມ ແລະເພື່ອຜົນປະໂຫຍດຂອງປະຊາຊົນ ຂໍໃຫ້ທາງບໍລິສັດຍົກເວັ້ນການຂຸດຄົ້ນໃນເຂດ ທີ່ເປັນແຫຼ່ງນ້ຳ, ຍອດນ້ຳ, ທົ່ງນາ ແລະບ້ານເຮືອນປະຊາຊົນ ເພື່ອຄວາມໝັ້ນຄົງຂອງທີ່ຢູ່ອາໄສແລະແຫຼ່ງທຳມາຫາກິນ. ສ່ວນປະຊາຊົນຈະອຳນວຍຄວາມສະດວກທຸກຢ່າງແກ່ການຂຸດຄົ້ນຄຳ.
