ສຳນັກຂ່າວໄອເອັນເອັນຂອງໄທ ລາຍງານໃນວັນທີ 25 ພືດສະພານີ້ວ່າ ກົມຂົນສົ່ງທາງບົກຂອງໄທ ໄດ້ເລີ່ມໂຄງການ ກຳນົດໃຫ້ລົດໂດຍສານສາທາລະນະ ແລະ ລົດບັນທຸກຂະໜາດ 10 ລໍ້ຂຶ້ນໄປ ໃຫ້ຕິດຕັ້ງລະບົບຕິດຕາມ GPS ເພື່ອຕິດຕາມ ແລະ ຄວບຄຸມພຶດຕິກຳການຂັບຂີ່ ຂອງພະນັກງານຂັບລົດ ດ້ວຍເຕັກໂນໂລຊີທີ່ທັນສະໄໝ ໂດຍລົດທີ່ນອນຢູ່ໃນເປົ້າໝາຍດັ່ງກ່າວ ທີ່ຂຶ້ນທະບຽນໃໝ່ ນັບແຕ່ວັນທີ 25 ມັງກອນ 2016 ເປັນຕົ້ນມາ ຈະຕ້ອງຕິດຕັ້ງ GPS ຕາມຮູບແບບທີ່ກົມຂົນສົ່ງວາງອອກທຸກຄັນ, ສ່ວນລົດທີ່ຂຶ້ນທະບຽນກ່ອນໜ້ານີ້ ແມ່ນຈະຕ້ອງໄດ້ຕິດຕັ້ງ GPS ໃຫ້ສຳເລັດທຸກຄັນໃນທົ່ວປະເທດ ພາຍໃນປີ 2017 ສຳລັບລົດໂດຍສານ ແລະ ສຳລັບລົດບັນທຸກ 10 ລໍ້ຂຶ້ນໄປ ແມ່ນຈະໃຫ້ສຳເລັດພາຍໃນປີ 2019.
ທັງນີ້ ລະບົບ GPS ດັ່ງກ່າວ ແມ່ນຈະມີການເຊື່ອມໂຍງຂໍ້ມູນ ຊຶ່ງມີການຄວບຄຸມແບບລວມສູນ ໂດຍກົມຂົນສົ່ງໄທ ເພື່ອແນໃສ່ຮັກສາຄວາມປອດໄພ ໃນການເດີນທາງຂອງປະຊາຊົນ ແລະ ຍົກລະດັບມາດຕະຖານ ຄວາມປອດໄພຕາມທ້ອງຖະໜົນຂອງໄທ ໃຫ້ເຂົ້າສູ່ລະດັບສາກົນ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!