ຂປລ. ຕາມການລາຍງານຈາກ ຂະແໜງປູກຝັງ ພະແນກກະສິກຳ-ປ່າໄມ້ ແຂວງສະຫວັນນະເຂດ ໃນວັນທີ 23 ພຶດສະພາໃຫ້ຮູ້ວ່າ: ການປັກດຳເຂົ້ານາແຊງ ສົກປີ 2015-2016 ຢູ່ແຂວງຕົນ ບໍ່ບັນລຸຕາມຄາດໝາຍທີ່ວາງໄວ້ຄື 30 ພັນເຮັກຕາ, ແຕ່ເນື້ອທີ່ປັກດຳຕົວຈິງ ສາມາດປະຕິບັດໄດ້ 29.273 ເຮັກຕາ ຫລື ເທົ່າກັບ 96% ຂອງແຜນ ການ. ຄາດຄະເນສະມັດຕະພາບ 5,39 ໂຕນ/ເຮັກຕາ ແລະ ຄາດຄະເນຜົນຜະລິດທີ່ຈະໄດ້ຮັບ ມີທັງໝົດ 161.785 ໂຕນ. ປັດຈຸບັນເກັບກ່ຽວໄດ້ 97% ພາຍຫລັງການລົງມື ແຕ່ຕົ້ນເດືອນພຶດສະພາເປັນຕົ້ນມາ.
ສາເຫດທີ່ພາໃຫ້ບໍ່ໄດ້ຕາມແຜນການ ຍ້ອນວ່າລະບົບຊົນລະປະທານໃນບາງເຂດ ແມ່ນບໍ່ສາມາດຕອບສະໜອງນ້ຳ ໄດ້ຢ່າງທົ່ວເຖິງ, ບາງເຂດລະບົບຊົນລະປະທານມີການເປ່ເພ ໂດຍສະເພາະແມ່ນຈັກສູບນ້ຳ, ບວກກັບລະດູໜາວ ທີ່ແກ່ຍາວຫລາຍອາທິດ ແລະ ປັດໄຈອື່ນໆອີກ. ໂດຍລວມແລ້ວມາເຖິງປັດຈຸບັນ ໃນທົ່ວແຂວງເກັບກ່ຽວເຂົ້ານາ ແຊງໄດ້ທັງໝົດ 29.
083 ເຮັກຕາ.ຂະນະ
ດຽວກັນ, ການເກັບກູ້ຜົນຜະລິດເຂົ້ານາແຊງ ຢູ່ເມືອງປາກທາ ແຂວງບໍ່ແກ້ວ ກໍບໍ່ບັນລຸຕາມແຜນ ການທີ່ວາງໄວ້ ໃນເນື້ອທີ່ 172 ເຮັກຕາ, ຜ່ານການເກັບກູ້ຜົນຜະລິດເຂົ້ານາແຊງຕົວຈິງ ພາຍໃນເມືອງປາກທາ ສາມາດເກັບກູ້ໄດ້ພຽງແຕ່ 163 ເຮັກຕາ, ມາຮອດປະຈຸບັນ ແມ່ນເກັບກູ້ໄດ້ແລ້ວ 97,8 ເຮັກຕາ, ເທົ່າກັບ 60 %, ຜົນຜະລິດໄດ້ 342,3 ໂຕນ, ສະມັດຕະພາບ 3,5 ໂຕນ/ເຮັກຕາ ແລະ ຄາດວ່າຈະໃຫ້ສຳເລັດ 100% ໃນຕົ້ນເດືອນມິຖຸນາທີ່ຈະມາເຖິງ. ເຊິ່ງສາເຫດຕົ້ນຕໍ ຍ້ອນຖືກໄພທຳມະຊາດ ເປັນຕົ້ນແມ່ນໄພໜາວ, ໄພແຫ້ງແລ້ງໃນໄລຍະຜ່ານມາ, ພ້ອມກັນນີ້ ເນື້ອທີ່ການຜະລິດຈຳນວນໜຶ່ງ ຖືກໂຄງການກໍ່ສ້າງຊົນລະປະທານ ແລະ ພໍ່ແມ່ປະຊາຊົນຫລາຍຄອບຄົວ ຫັນມາປູກພືດຊະນິດອື່ນໆທົດແທນ.ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!