ຄະນະຜູ້ບໍລິຫານລະດັບສູງໂຮງພິມທະນະບັດທະນາຄານແຫ່ງລັດ ສສ ຫວຽດນາມ ຊຶ່ງນຳໂດຍທ່ານ ເຈິນ ວັນຕ້ຽນ ຜູ້ອຳນວຍການໃຫຍ່ໂຮງພິມທະນະບັດທະນາຄານແຫ່ງລັດຫວຽດນາມໄດ້ເຄື່ອນໄຫວ ແລະພົບປະແລກປ່ຽນບົດຮຽນດ້ານວິຊາການການພິມທະນະບັດຢູ່ ສປປ ລາວ ລະຫວ່າງວັນທີ 23-24 ພຶດສະພາ 2016 ຊຶ່ງໄດ້ມີການຕ້ອນຮັບຢ່າງອົບອຸ່ນຈາກທ່ານ ສັນຕິ ພົນເມືອງ ລາວຫົວໜ້າໂຮງພິມທະນະບັດທະນາ ຄານແຫ່ງ ສປປ ລາວ ພ້ອມຄະນະທີ່ໂຮງພິມທະນາຄານແຫ່ງ ສປປ ລາວ.
ມື້ທຳອິດຄະນະຜູ້ບໍລິຫານລະດັບສູງໂຮງພິມທະນະບັດທະນາຄານແຫ່ງລັດ ສສ ຫວຽດນາມ ແລະຄະນະຜູ້ບໍລິຫານລະດັບສູງໂຮງພິມທະນະບັດທະນາຄານ ແຫ່ງ ສປປ ລາວກໍໄດ້ພົບປະແລກປ່ຽນ ແລະປຶກສາຫາລືດ້ານວິຊາການຊຶ່ງນຳໂດຍຄູ່ຮ່ວມຕຳແໜ່ງທັງສອງຝ່າຍ, ການພົບປະເວລາປະມານ 2 ຊົ່ວໂມງກ່ວາຊຶ່ິ່ງຝ່າຍລາວໄດ້ນຳສະເໜີປະຫວັດ ແລະ ການເຄື່ອນໄຫວຂອງໂຮງພິມພ້ອມທັງການຈັດພິມທະນະບັດໃນໄລຍະຜ່ານມາທີ່ມີທັງຂໍ້ສະດວກ ແລະຂໍ້ຫຍຸ້ງຍາກ, ບັນຫາ ແລະວິທີແກ້ໄຂຊຶ່ງໃນຜ່ານມາໂດຍໄດ້ຮັບການຊີ້ນຳຈາກລັດຖະບານກໍຄືຄະນະຜູ້ວ່າການທະນາຄານ ແຫ່ງ ສປປ ລາວ ຈິ່ງເຮັດໃຫ້ວຽກງານການພິມດຳເນີນໄປດ້ວຍດີ.
ສຳລັບໂຮງພິມທະນະບັດຫວຽດ ນາມ ແມ່ນໄດ້ຮັບການສ້າງຕັ້ງຂຶ້ນ 30 ກ່ວາປີ ຊຶ່ງໄດ້ມີການປັບປຸງ ແລະພັດທະນາເລື້ອຍມາໂດຍໄດ້ນຳໃຊ້ເຄື່ອງຈັກທີ່ທັນສະໄໝ, ບຸກຄະລາກອນມືອາຊີບ, ນຳໃຊ້ອຸປະກອນການພິມລະດັບສາກົນ ແລະ ຍາກຕໍ່ການປອມແປງ, ປະຈຸບັນ ສສ ຫວຽດນາມ ສາມາດພິມເງິນດົ້ງ (ສະກຸນເງິນຫວຽດນາມ) ດ້ວຍຕົນເອງ.
ການພົບປະແລກປ່ຽນ ແລະປຶກສາຫາລືດ້ານວິຊາການໃນຄັ້ງນີ້ ແມ່ນເຕັມໄປດ້ວຍຄວາມສາມັກຄີຮັກແພງກັນເປັນຢ່າງດີ, ທັງຝ່າຍຫວຽດນາມທີ່ມີຄວາມອຸດົມ ແລະຮັ່ງມີທາງດ້ານຄວາມຮູ້ເຕັກນິກວິຊາການໃນດ້ານການພິມທະນະບັດກໍມີຄວາມຈິງໃຈຖ່າຍທອດບົດຮຽນອັນລ້ຳຄ່າໃຫ້ແກ່ພະນັກງານການພິມທະນະບັດຂອງລາວ ແລະຈະໃຫ້ການຮ່ວມມືຊ່ວຍເຫຼືອຍົກລະດັບດ້ານວິຊາການແກ່ ສປປ ລາວ ໃນອະນາຄົດ, ນອກ ຈາກການຮ່ວມມືດ້ານວິຊາການແລ້ວທັງສອງຝ່າຍຍັງມີຄວາມຍິນດີທີ່ຈະມີການແລກປ່ຽນດ້ານກີລາ ແລະອື່ນໆຕາມການເຫັນດີຂອງຂັ້ນເທິງ 2 ຝ່າຍ.
ຈາກນັ້ນ, ຄະນະຜູ້ບໍລິຫານລະດັບສູງໂຮງພິມຂອງຫວຽດນາມກໍໄດ້ເຄື່ອນໄຫວຢ້ຽມຊົມໂຮງພິມທະນະບັດຂອງລາວ ແລະໃນຕອນແລງຂອງວັນດຽວກັນຄະນະດັ່ງກ່າວໄດ້ເຂົ້າຢ້ຽມຂ່ຳນັບທ່ານ ສົມພາວ ໄຟສິດ ຊຶ່ງທ່ານ ເຈິນ ວັນຕ້ຽນ ໄດ້ແຈ້ງຜົນການພົບປະລະຫວ່າງສອງໂຮງພິມທະນະບັດຂອງຫວຽດນາມ ແລະລາວ, ພ້ອມນັ້ນຍັງສະເໜີປະຫວັດ, ການເຄື່ອນວຽກງານຂອງໂຮງພິມທະນະບັດຂອງຫວຽດນາມໃນໄລຍະຜ່ານມາ ແລະຍັງຢືນຢັນວ່າພ້ອມຈະໃຫ້ການຮ່ວມມືໃຫ້ການຊ່ວຍເຫຼືອພະນັກງານໂຮງພິມທະນະບັດຂອງລາວໃນຕໍ່ໜ້າ.
ທ່ານຜູ້ວ່າການທະນາຄານແຫ່ງ ສປປ ລາວ ໄດ້ຕີລາຄາສູງຕໍ່ການພົວພັນ ແລະຮ່ວມມືຮອບດ້ານລະຫວ່າງ 2 ພັກ, 2 ລັດ ແລະປະຊາຊົນສອງຊາດໂດຍສະເພາະທະນາຄານແຫ່ງລັດ ສສ ຫວຽດ ນາມ ຊຶ່ງຍາມໃດກໍໄດ້ໃຫ້ການຊ່ວຍເຫຼືອ ອັນລ້ຳຄ່າ ແລະທັນການໃຫ້ແກ່ລາວຊຶ່ງນັບແຕ່ກ່ອນການສ້າງຕັ້ງທະນາຄານຂອງຝ່າຍປະເທດລາວ (ທະນາຄານ ແຫ່ງ ສປປ ລາວໃນປະຈຸບັນ) ສສ ຫວຽດນາມ ໄດ້ໃຫ້ການຊ່ວຍເຫຼືອກໍ່ສ້າງພະນັກ ງານໃຫ້ລາວຈົນມາເຖິງປະຈຸບັນນີ້ກໍຍັງເພີ່ມທະວີການພົວພັນ ແລະການຮ່ວມມືຍິ່ງໆຂຶ້ນເປັນການປະກອບສ່ວນອັນສົມກຽດເຂົ້າໃນການເພີ່ມພູນຄູນສ້າງມິດຕະພາບແບບພິເສດ ແລະການຮ່ວມມືຮອບດ້ານລະຫວ່າງລາວ ແລະຫວຽດນາມທີ່ມີມາແລ້ວນັ້ນໃຫ້ໝັ້ນຄົງຂະນົງແກ່ນຕາບເທົ່າໃດໆ.
ທີ່ມາ: 