ວັນທີ 13 ພຶດສະພາ ຜ່ານມານີ້ເຈົ້າໜ້າທີ່ສະກັດກັ້ນ ແລະຕ້ານຢາເສບຕິດເມືອງພີນ ແຂວງສະຫວັນະເຂດ ໄດ້ກັກຕົວຜູ້ຖືກຫາຄ້າ-ຂາຍຢາເສບຕິດປະເພດຢາບ້າໄດ້ຈຳນວນ 2 ຄົນພ້ອມຂອງກາງປະເພດຢາບ້າຈຳນວນ 100 ເມັດ.
ຊຶ່ງເຫດການດັ່ງກ່າວກ່ອນໜ້ານັ້ນທາງເຈົ້າໜ້າທີ່ໄດ້ຮັບແຈ້ງຈາກພົນລະເມືອງດີວ່າ: ໄດ້ມີການຊື້-ຂາຍຢາບ້າ ທີ່ເຮືອນ ທ້າວ ນັອກ ບ້ານຫ້ວຍຊາຍ ເມືອງພີນ ຈາກນັ້ນ ທາງເຈົ້າໜ້າທີ່ຈິ່ງໄດ້ຂຶ້ນແຜນວາງກຳລັງອອກໄປຍັງຈຸດທີ່ໄດ້ມີການລາຍງານ ຈິ່ງໄດ້ເຂົ້າຈັບກຸມ ທ້າວ ນັອກ ອາຍຸ 22 ປີ, ອາຊີບເຮັດນາ ຊຶ່ງ ເປັນຄົນຢູ່ບ້ານນັ້ນເອງ, ພ້ອມດ້ວຍ ທ້າວ ລຳແກ້ວ ອາຍຸ 35 ປີ, ອາຊີບເຮັດນາຢູ່ ບ້ານກາງເກົ່າ ເມືອງພີນ ແລະໄດ້ກວດຄົ້ນເຄຫະສະຖານພົບເຫັນຢາບ້າ ຈຳນວນ 100 ເມັດ ຊຸກເຊື່ອງໄວ້ໃນຖົງໂສ້ງຂອງ ທ້າວ ນັອກ ປະໄວ້ໃນກະຕ່າ ເຄື່ອງນຸ່ງຢູ່ໃນກາງເຮືອນຂອງຜູ້ກ່ຽວ ພ້ອມດ້ວຍລົດຈັກທີ່ໃຊ້ເປັນພາຫະນະໃນຄັ້ງນີ້ອີກ 1 ຄັນ.
ດັ່ງນັ້ນ ທາງເຈົ້າໜ້າທີ່ກໍ່ໄດ້ນຳທັງສອງໄປສືບສວນ-ສອບສວນຕາມຂັ້ນຕອນຂອງກົດໝາຍຕໍ່ໄປ.
ທີ່ມາ: 