ຕາມການລາຍງານຂອງທ່ານ ຄຳພູວົງ ພາວົງ ຮອງຫົວໜ້າໂຄງການກໍ່ສ້າງເສັ້ນທາງເລກ 6B ໃຫ້ຮູ້ວ່າ: ໂຄງການກໍ່ສ້າງເສັ້ນທາງ 6B ໄດ້ເລີ່ມລົງ ມືກໍ່ສ້າງມາແຕ່ປີ 2014 ໂດຍແມ່ນບໍລິສັດຊົງເມອິນເຈເນຍລິງກຸບເປັນຜູ້ຮັບເໝົາກໍ່ສ້າງ, ລວມມູນຄ່າທັງໝົດ 9 ລ້ານກວ່າໂດລາສະຫະລັດ, ໃນນີ້ ທຶນຊ່ວຍເຫຼືອຈາກທະນາຄານພັດທະນາອາຊີ 70% ແລະ ທຶນສົມທົບຂອງລັດຖະບານລາວ 30%.
ຊຶ່ງໂຄງການນີ້ໄດ້ມີຈຸດເລີ່ມແຕ່ເທສະບານເມືອງສົບເບົາຫາບ້ານປ່າຮ້າງ, ມີຄວາມຍາວທັງໝົດ 25,69 ກິໂລແມັດ, ເປັນທາງປູຢາງສອງຊັ້ນ, ຄວາມກວ້າງຂອງທາງ 9,5 ແມັດ, ເຂດພູດອຍ ແມ່ນ 6,5 ແມັດ, ໃນນີ້ິ້ມີຂົວຂ້າມນ້ຳມ່າ 1 ແຫ່ງ, ຍາວ 200 ແມັດ, ກວ້າງ 10,4 ແມັດ, ສາມາດຮັບນໍ້າໜັກໄດ້ 40 ໂຕນ ແລະ ມີຂົວຂ້າມນໍ້າເບົາ 2 ແຫ່ງ, ແຕ່ລະແຫ່ງມີຄວາມຍາວ 18 ແມັດ, ກວ້າງ 7,6 ແມັດ.
ແນວໃດກໍດີປະຈຸບັນສະເລ່ຍວຽກໂດຍລວມຂອງໂຄງການແມ່ນສຳເລັດແລ້ວ 65,62%, ຫຼຸດແຜນການ 4,59% ສາເຫດຍ້ອນໄຟທຳມະຊາດຝົນຕົກໜັກ ແລະພື້ນທີ່ຂອງໂຄງການສ້າງຢູ່ພາກນ້ຳມ່າບໍ່ເຊື່ອມຕໍ່ກັບເສັ້ນທາງເຮັດໃຫ້ການໄປມາບໍ່ສະດວກ, ຄາດວ່າ ທ້າຍປີ 2016 ນີ້ຈະໃຫ້ສຳເລັດ100%.
ທັງນີ້ ຫວັງວ່າພາຍຫຼັງທີ່ການກໍ່ສ້າງສຳເລັດຈະສ້າງເງື່ອນໄຂທີ່ອຳນວຍຄວາມສະດວກໃນການໄປມາຫາສູ່ການຂົນສົ່ງ, ແລກປ່ຽນສິນຄ້າຂອງປະຊາຊົນພາຍໃນແຂວງຫົວພັນເວົ້າສະເພາະເມືອງສົບເບົາ, ເພາະວ່າຈຸດນີ້ ເປັນຈຸດເຊື່ອມຕໍ່ລະຫວ່າງແຂວງຫົວພັນກັບເມືອງມົກເຈົາ ສສ ຫວຽດນາມ.
ທີ່ມາ: