ສຳນັກຂ່າວເອເອຟພີລາຍງານວ່າ ຫວຽດເຈັດ ສາຍການບິນຕຸ້ນທຶນຕໍ່າຂອງຫວຽດນາມ ເປີດເຜີຍເມື່ອວັນທີ 23 ພຶດສະພາວ່າ ທາງການສາຍການບິນຕົກລົງທີ່ຈະຊື້ເຮືອບິນຈາກໂບອິ້ງ ບໍລິສັດຜູ້ຜະລິດເຮືອບິນຂອງສະຫະລັດອາເມລິກາຈຳນວນ 100 ລຳ ໃນຂໍ້ຕົກລົງຊຶ່ງລົງນາມທີ່ນະຄອນຫຼວງຮ່າໂນ້ຍ ໂດຍມີປະທານາທິບໍດີບາຣັກ ໂອບາມາຂອງສະຫະລັດອາເມລິກາທີ່ຢູ່ລະຫວ່າງການເດີນທາງຢ້ຽມຢາມຫວຽດນາມຢ່າງເປັນທາງການເປັນເວລາ 3 ວັນ ແລະ ທ່ານປະທານປະທດ ເຈິ່ນ ດ່າຍ ກວາງ ຂອງຫວຽດນາມຮ່ວມເປັນສັກຂີພິຍານ.
ຖະແຫຼງການຂອງຫວຽດເຈັດລະບຸວ່າ ຂໍ້ຕົກລົງດັ່ງກ່າວຖືເປັນ “ການຊື້ເຮືອບິນການຄ້າຄັ້ງດຽວທີ່ໃຫຍ່ທີ່ສຸດໃນວົງການການບິນຫວຽດນາມ”.
ເຈົ້າໜ້າທີ່ທຳນຽບຂາວຢືນຢັນຂໍ້ຕົກລົງດັ່ງກ່າວວ່າ ເຮືອບິນໂບອິ້ງ 100 ລຳ ເປັນສ່ວນໜຶ່ງໃນຂໍ້ຕົກລົງການຄ້າລະຫວ່າງສະຫະລັດກັບຫວຽດນາມທີ່ມີມູນຄ່າລວມແລ້ວກວ່າ 16.000 ລ້ານໂດລາ.
“ພວກເຮົາຄາດວ່າຂໍ້ຕົກລົງນີ້ຈະຊ່ວຍສະໝັບສະໜູນຕຳແໜ່ງວຽກໃນພາກເຕັກໂນໂລຊີ ແລະ ພາກການຜະລິດ 60.000 ຕຳແໜ່ງ” ເຈົ້າໜ້າທີ່ຄົນດັ່ງກ່າວລະບຸ.
ຂ່າວລະບຸວ່າ ສາຍການບິນຫວຽດເຈັດທີ່ກໍ່ຕັ້ງຂຶ້ນເມື່ອປີ 2007 ເມື່ອເດືອນກຸມພາທີ່ຜ່ານມາທາງສາຍການບິນປະກາດວ່າໄດ້ລົງນາມໃນສັນຍາຄວາມຮ່ວມມືກັບແພຣດແອນວິດນີ ບໍລິສັດຜູ້ຜະລິດເຄື່ອງຈັກສັນຊາດສະຫະລັດມູນຄ່າ 3.040 ລ້ານໂດລາສະຫະລັດ.
ນັກວິເຄາະອຸດສາຫະກຳການບິນລະບຸວ່າ ອາຊີຕາເວັນອອກສຽງໃຕ້ລວມເຖິງຫວຽດນາມຖືເປັນຕະຫຼາດສຳຄັນໃນການເຕີບໂຕຂອງສາຍການບິນຕົ້ນທຶນຕ່ຳ ໂດຍມີແຮງຂັບເຄື່ອນມາຈາກການເພີ່ມຈຳນວນຂອງຊົນຊັ້ນກາງ ຊຶ່ງສ່ວນຫຼາຍເດີນທາງໄປຕ່າງປະເທດເປັນຄັ້ງທຳອິດ.
ດ້ານໂບອິ້ງຄາດການໄວ້ວ່າ ພູມິພາກນີ້ຈະຕ້ອງການເຮືອບິນໃໝ່ 3.750 ລຳໃນໄລຍະເວລາ 20 ປີຂ້າງໜ໊າ ໂດຍຫຼາຍກວ່າ 3 ໃນ 4 ຈະເປັນເຮືອບິນລຳຕົວແຄບ ຫຼື ເຮືອບິນແບບມີຊ່ອງທາງຢ່າງດຽວ.