ງການສະຫະປະຊາຊາດເພື່ອການພັດທະນາ (UNDP) ອົງການ AIESEC ແລະ ອົງການຈັດຕັ້ງສາກົນ ປະຈໍາ ສປປ.ລາວ ຮ່ວມກັບ ອົງການຈັດຕັ້ງທາງສັງຄົມທັງພາກລັດ ແລະ ເອກະຊົນ ໄດ້ຈັດກອງປະຊຸມສໍາມະນາ ພາຍໃຕ້ຫົວຂໍ້ ປຶກສາຫາລືໄວໜຸ່ມລາວເພື່ອອະນາຄົດຂອງປະເທດພາຍໃຕ້ຂອບເປົ້າໝາຍການພັດທະນາແບບຍືນຍົງ ຄັ້ງທໍາອິດ ພ້ອມທັງຈັດງານຕະຫຼາດນັດຈັດຫາງານ ແລະ ການສຶກສາວຽງຈັນ ຄັ້ງທີ 6 ຂຶ້ນໃນວັນທີ 21-22 ພຶດສະພາ 2016 ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ ໂດຍການເປັນປະທານຂອງທ່ານນາງ ອາລິສາ ສະເຕລິນ ປະທານອົງການໄອແຊັກ ປະຈໍາ ສປປ.ລາວ ທັງເປັນປະທານຈັດງານຕະຫຼາດນັດຈັດຫາງານ ແລະ ການສຶກສາວຽງຈັນ ຄັ້ງທີ 6 ໂດຍມີຜູ້ຕາງໜ້າຈາກກະຊວງ ອົງການທຽບເທົ່າຂັ້ນສູນກາງ ບັນດາຫົວໜ່ວຍທຸລະກິດ ບໍລິສັດຈັດຫາງານ ສະຖາບັນການສຶກສາພາຍໃນນະຄອນຫຼວງວຽງຈັນ ແລະ ໄວໜຸ່ມ ນັກຮຽນ-ນັກສຶກສາເຂົ້າຮ່ວມຢ່າງຫຼວງຫຼາຍ.
ທ່ານນາງ ອາລິສາ ສະເຕລິນ ກ່າວວ່າ ໃນກອງປະຊຸມສໍາມະນາ ພາຍໃຕ້ຫົວຂໍ້ ປຶກສາຫາລືໄວໜຸ່ມລາວເພື່ອອະນາຄົດຂອງປະເທດພາຍໃຕ້ຂອບເປົ້າໝາຍການພັດທະນາແບບຍືນຍົງ ຄັ້ງທໍາອິດຢູ່ ສປປ.ລາວ ບັນດາໄວໜຸ່ມ ນັກຮຽນ ນັກສຶກສາໄດ້ມີສ່ວນຮ່ວມໃນການຮຽນຮູ້ ປຶກສາຫາລື ແລກປ່ຽນຄວາມຄິດເຫັນກ່ຽວກັບການຈັດຕັ້ງປະຕິບັດເປົ້າໝາຍພັດທະນາແບບຍືນຍົງ ໃນ 17 ເປົ້າໝາຍຫຼັກເພື່ອການພັດທະນາແບບຍືນຍົງຂອງໂລກ ເພື່ອສົ່ງເສີມຄວາມສະຫງົບສຸກໃນສັງຄົມ ການສ້າງອາຊີບທີ່ດີ ແລະ ການຮັບມືກັບສິ່ງທ້າທາຍທາງດ້ານສະພາບແວດລ້ອມ ເຊິ່ງເປົ້າໝາຍການພັດທະນາແບບຍືນຍົງ ແມ່ນໄດ້ຖືກລົງນາມຮັບຮອງເອົາໂດຍບັນດາສະມາຊິກທັງໝົດຂອງອົງການສະຫະປະຊາຊາດໃນເດືອນກັນຍາ 2015 ທີ່ຜ່ານມາ ແນໃສ່ຊ່ອຍປ່ຽນແປງໂລກໃນເສັ້ນທາງການພັດທະນາແບບຍືນຍົງ ເຊິ່ງຄາດວ່າເປົ້າໝາຍດັ່ງກ່າວຈະໃຫ້ບັນລຸຜົນໃນປີ 2030.
ອົງການ AIESEC ເປັນອົງກອນຜູ້ນໍາເຍົາວະຊົນທີ່ໃຫຽ່ທີ່ສຸດໃນໂລກ ແລະ ເປັນອີກນຶ່ງໃນອົງກອນບໍ່ສັງກັດລັດຖະບານທີ່ເຮັດວຽກສອດຄ່ອງກັບວາລະໃໝ່ຂອງການພັດທະນາໂລກ ໂດຍມີຈຸດມຸ່ງໝາຍຫຼັກໃນການຈັດງານສໍາມະນາໃນຄັ້ງນີ້ ເພື່ອແບ່ງປັນຂໍ້ມູນແບບເຈາະເລິກ ໄດ້ຮຽນຮູ້ວິໄສທັດໃໝ່ໆ ແລະ ປູກຝັງແນວຄິດເພື່ອປະຕິບັດເປົ້າໝາຍການພັດທະນາແບບຍືນຍົງ ພາຍໃນງານ ຍັງຈັດໃຫ້ມີການຮຽນຮູ້ວິທີ ຂັ້ນຕອນການຂຽນແບບຟອມສະໝັກຮ່ວມເຮັດວຽກຢູ່ອົງການຈັດຕັ້ງຕ່າງໆທັງພາກລັດ ແລະ ເອກະຊົນ ເພື່ອປະກອບອາຊີບ ແລະ ເຂົ້າເຮັດວຽກໃນຂະແໜງທີ່ຕົນເອງມັກ ໂດຍມີບັນດາຫົວໜ່ວຍທຸລະກິດ ບໍລິສັດເຂົ້າຮ່ວມຫຼາຍກວ່າ 20 ຫົວໜ່ວຍ.
ຂ່າວ/ພາບ: ເທບພະວົງ