ເກືອບ​ເຄິ່ງ​ແລ້ວ ໂຄງ­ການ​ສ້າງ​ທາງຊຳ​ໃຕ້-ທ່າ​ເຫຼົ້າ

0
451

ເສັ້ນ­ທາງ​ຊຳ​ໃຕ້-ທ່າ​ເຫຼົ້າ​ແຂວງ​ຫົວ­ພັນເປັນ​ເສັ້ນ­ທາງ​ທີ່​ນອນ​ຢູ່​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ເພື່ອ​ເປັນ ການ​ພັດ­ທະ­ນາ​ພື້ນ­ຖານ​ໂຄງ​ລ່າງ​ສ້າງ​ເງື່ອນ­ໄຂ​ອຳ­ນວຍ​ຄວາມ​ສະ­ດວກ​ໃຫ້​ແກ່​ການ​ໄປ-ມາ​ຂອງ​ປະ­ຊາ­ຊົນ​ເປັນ­ຕົ້ນ ແມ່ນ​ຂົນ­ສົ່ງ​ສິນ­ຄ້າ​ທັງ​ພາຍ​ໃນ ແລະ​ອອກ​ສູ່​ປະ­ເທດ​ໃກ້​ຄຽງ ໂດຍ​ສະ­ເພາະແມ່ນ ສສ ຫວຽດ­ນາມປະ­ຈຸ​ບັນ​ສຳ­ເລັດ​ການ​ກໍ່­ສ້າງ​ແລ້ວ​ເກືອບ​ເຄີ່ງ​ໃນ​ມູນ​ຄ່າທັງ​ໝົດ 396 ຕື້​ກວ່າ​ກີບ.

ໂຄງ­ການ​ສ້າງ​ເສັ້ນ­ທາງ​ຊຳ​ໃຕ້-ທ່າ​ເຫຼົ້າແຂວງ​ຫົວ­ພັນພາຍ­ຫຼັງ​ສຳ­ເລັດການ​ເຊັນ​ສັນ­ຍາ​ເງິນ​ກູ້​ລະ­ຫວ່າງ​ກະຊວງ ການ​ເງິນ ແຫ່ງ ສປປ ລາວ ກັບ​ທະ­ນາ­ຄານ​ເພື່ອ​ການ​ລົງ­ທຶນ ແລະ​ພັດ­ທະ­ນາ​ແຫ່ງ ສສ ຫວຽດ­ນາມ​ໃນ​ວັນ​ທີ  20 ມິ­ຖຸ­ນາ 2014 ກົມ​ຂົວ​ທາງ​ກະ­ຊວງ​ໂຍ­ທາ​ທິ​ການ​ໄດ້​ວ່າ​ຈ້າງ​ບໍ­ລິ­ສັດ​ທີ່​ປຶກ­ສາ LTEC ຮ່ວມ​ກັບ TEDI ດຳ­ເນີນ​ການສຳ​ຫຼວດ ແລະ​ອອກ​ແບບໂດຍ​ຍົກ​ລະດັບ​ໃຫ້​ເປັນ​ເສັ້ນ­ທາງ​ຊັ້ນ IV ເຂດ​ພູ​ດອຍ, ປູ­ຢາງ 2 ຊັ້ນ ຍາວ 67 ກິ­ໂລ­ແມັດ, ໜ້າທາງ​ກວ້າງ 7 ແມັດ, ຂົວ 7 ແຫ່ງ​ຍາວ 373  ແມັດ, ພ້ອມ​ດ້ວຍ​ອາ­ຄານ​ດ່ານນ້ອຍ​ຢູ່​ບ້ານ​ທ່າ​ເຫຼົ້າ.

ຈາກ​ນັ້ນ​ໃນ​ທ້າຍ​ປີ 2014 ໄດ້​ມີ​ພິ­ທີ​ເຊັນ​ສັນ­ຍາ​ກໍ່­ສ້າງ​ລະ­ຫວ່າງ​ກົມ​ຂົວ​ທາງ​ກັບ​ບໍ­ລິ­ສັດ​ຈິດ​ຈະ­ເລີນ​ກໍ່­ສ້າງ​ຈຳ­ກັດ​ເປັນ ຜູ້​ຮັບ​ເໝົາ​ກໍ່­ສ້າງ​ດ້ວຍ​ມູນ​ຄ່າ 396 ຕື້​ກວ່າ​ກີບ ຫຼື ປະ­ມານ 49,60 ລ້ານ​ກວ່າ ໂດ​ລາໃຊ້​ເວ­ລາ​ການ​ກໍ່­ສ້າງ​ທັງ​ໝົດ 36 ເດືອນໂດຍ​ເລີ່ມ​ກໍ່­ສ້າງ​ໃນ​ປີ 2015 ແລະ ຄາດ​ຄະ­ເນ​ຈະ​ໃຫ້​ສຳ­ເລັດ​ໃນ​ປີ 2018.

ແນວ­ໃດ​ກໍ​ດີ​ຮອດ​ຂະ­ນະ​ນີ້ທ່ານ ສຸກກະ­ເສີມ ສອນ​ສະ​ຫວັດ ຫົວ­ໜ້າ​ຫ້ອງການ​ໂຍ­ທາ​ທິ​ການ ແລະ​ຂົນ­ສົ່ງ​ເມືອງ ຊຳ​ໃຕ້​ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ຮູ້​ວ່າ: ໜ້າ​ວຽກໂດຍ​ລວມ​ໂຄງ­ການ​ສຳ­ເລັດ 48% ຂອງ​ແຜນ­ການ​ຂະ­ນະ​ທີ່​ຕາມ ແຜນ​ແມ່ນ​ປີ 2018 ສຳ­ເລັດ​ແຕ່​ບໍ­ລິ­ສັດຜູ້​ຮັບ​ເໝົາ​ກໍ່­ສ້າງ​ຈະ​ໃຫ້​ສຳ­ເລັດ​ກ່ອນ​ສັນ­ຍາ​ພາຍ​ໃນ​ປີ 2017 ໂດຍ​ຖ້າ​ຫາກ​ເສັ້ນ­ທາງ​ດັ່ງ­ກ່າວ​ສຳ­ເລັດ​ເມືອງ​ຊຳ​ໃຕ້​ຈະ​ກາຍ­ເປັນ​ທາງ​ຜ່ານ​ໃນ​ການ​ໄປ-ມາ,ການ​ຂົນ­ສົ່ງ​ສິນ­ຄ້າ​ຕ່າງໆ​ຊຶ່ງ​ເມືອງ​ຊຳ​ໃຕ້ ແມ່ນ​ນອນ​ຢູ່​ໃນ​ແລວທາງ​ດ່ວນ​ວຽງ​ຈັນ-ຮ່າ​ໂນ້ຍ ທີ່​ມີ​ໄລ­ຍະ ທາງ​ໃກ້​ສຸດ.

ເສັ້ນ­ທາງ​ຊຳ​ໃຕ້-ທ່າ​ເຫຼົ້າ​ເປັນ​ເສັ້ນ­ທາງ​ຫຼວງ​ຂອງ​ແຂວງ​ຫົວ­ພັນ​ເລກ​ທີ 3206 ເລີ່ມ​ຕົ້ນ​ຈາກເທສະ​ບານ ເມືອງ​ຊຳ​ໃຕ້​ຫາ​ບ້ານ​ທ່າ​ເຫຼົ້າ​ເມືອງ​ຊຳ​ໃຕ້ ແຂວງ​ຫົວ­ພັນຕິດ​ຈອດ​ກັບ​ຊາຍ​ແດນ​ລາວ-ຫວຽດ­ນາມ​ຫຼັກ​ໝາຍ​ຊາຍ​ແດນ​ເລກ​ທີ 353 ຕິດກັບ​ບ້ານ​ແຄ້ວເມືອງ​ເທືອງ​ເຊິນ ແຂວງ ແທັງ​ຮວາ ສສ ຫວຽດ­ນາມເສັ້ນ­ທາງ​ດັ່ງ­ກ່າວ​ໄດ້​ຜ່ານ 19 ໝູ່​ບ້ານ​ມີ 929 ຄອບຄົວ​ພົນ­ລະ­ເມືອງ​ທັງ​ໝົດ 5.733 ຄົນ.

ທີ່ມາ: logo