ທ່ານ ວິໄຊ ພັນດານຸວົງ ຫົວໜ້າກົມຄຸ້ມຄອງລັດຖະກອນ ກະຊວງພາຍໃນ ໃຫ້ຮູ້ວ່າ: ການສອບເສັງເຂົ້າເປັນລັດຖະກອນພາກຄວາມຮູ້ທົ່ວໄປແມ່ນຈະມີຂຶ້ນໃນເດືອນກໍລະກົດທີ່ຈະເຖິງນີ້ ແລະ ໄລຍະການເປີດຮັບສະໝັກສອບເສັງແມ່ນຈະເລີ່ມແຕ່ວັນທີ 26 ພຶດສະພາຫາ 12 ກໍລະກົດ 2014, ສ່ວນການສອບເສັງພາກວິຊາສະເພາະແມ່ນຈະດຳເນີນໃນລະຫວ່າງເດືອນສິງຫາ ຫລື ກັນຍາ ເພື່ອໃຫ້ທັນຕໍ່ການບັນຈຸເຂົ້າງວດທີ I (ເດືອນຕຸລາ, ພະຈິກ ແລະ ທັນວາ) ໝາຍວ່າຕ້ອງບັນຈຸເຂົ້າເຮັດວຽກໃນວັນທີ 1 ຕຸລາຂອງທຸກໆປີເປັນຕົ້ນໄປ. ສຳລັບຫົວບົດສອບເສັງແມ່ນຢູ່ບົນພື້ນຖານວຸດທິການສຶກສາແຕ່ລະຊັ້ນ ແລະ ແຕກຕ່າງກັນ.
ທ່ານຫົວໜ້າກົມຄຸ້ມຄອງລັດຖະກອນ ກ່າວວ່າ: ການສອບເສັງລັດຖະກອນແມ່ນປະຕິບັດຕາມນະໂຍບາຍປ່ຽນແປງໃໝ່ຍົກສູງປະສິດທິພາບການບໍລິຫານລັດ, ເປັນການຍົກລະດັບຄວາມເຂົ້າໃຈກ່ຽວກັບນະໂຍບາຍດ້ານຕ່າງໆຂອງພັກ ແລະ ລັດ ຖະບານ, ທັງເປັນການຮັບປະກັນໃຫ້ລັດຖະກອນມີຄຸນນະ ພາບໃນສະເພາະໜ້າ ແລະ ຍາວນານ ເຊິ່ງການສອບເສັງຕ້ອງປະ ຕິບັດຕາມຫລັກການສະເໝີພາບ, ເປີດເຜີຍ, ພາວະວິໄສ ແລະ ເປັນທຳ.
ທີ່ມາ http://laophatthananews.blogspot.com/2014/05/2014.html