​ໂນ​ເກ​ຍບໍລິສັດ​ດ້ານ​ອຸປະກອນ​ເທ​ເລ​ຄອມ​ຂອງ​​ແຟັງ​ລັງກ່າວ​ມື້​ນີ້​ວ່າ ທາງ​ບໍລິສັດ​ມີ​ແຜນການ​ທີ່​ຈະ​ກັບ​ເຂົ້າ​ສູ່ວົງ​ການ​ທຸລະ​ກິດ​ດ້ານ​ໂທລະສັບ​ມື​ຖື ​ແລະ ​ແທັບ​ເລັດ​ອີກ​​ເທື່ອ​ໜຶ່ງ.

​ໂນ​ເກ​ຍ ຊຶ່ງ​ເຄີ​ຍ​ເປັນ​ຜູ້​ຜະລິດ​ໂທລະສັບ​ມື​ຖື​ອັນ​ດັບ 1 ຂອງ​ໂລກ ກ່າວວ່າ ບໍລິສັດ​ທີ່​ຈັດ​ຕັ້ງ​ຂຶ້ນ​ໃໝ່​ທີ່​ຊື່ ​ເອຊ​ເອັມດີ ​ໂກລບອລ ຈຳກັດ ຈະ​ໄດ້​ຮັບ​ມອບ​ສິດ​ໃນ​ການ​ຜະລິດ​ໂທລະສັບ​ສະມາດ​ໂຟນ ​ແລະ ​ແທັບ​ເລັດ​ໃນ​ຊື່​ໂນ​ເກ​ຍ​ແບບ​ເຕັມ​ຮູບ​ແບບ​ເພື່ອ​ຈຳໜ່າຍ​ທົ່ວ​ໂລກ​ພຽງ​ບໍລິສັດ​ດຽວ​ໃນ​ຊ່ວງ​ໄລຍະ​ເວລາ 10 ປີ​ຂ້າງ​ໜ້າ ​ໃນ​ຂະນະ​ດຽວ​ກັນ ບໍລິສັດ​ໄມ​ໂຄ​ຣຊອຟຂອງ​ສະຫະລັດ​ອອກຖະ​ແຫຼ​ງການ​ວ່າ ​ເອຊ​ເອັນ​ດີ ​ໂກລບອລ ​ແລະ ຫຸ້ນ​ສ່ວນ​ຈາກຈີນ​ໄຕ້​ຫວັນ ຄື​ບໍລິສັດ​​ເອຟ​ໄອ​ເອຊ ​ໂນ​ບາຍ ຊຶ່ງ​ເປັນ​ບໍລິສັດ​ໃນ​ເຄືອ​ຂ່າຍ​ຂອງ​ຟອກ​ຄອນ ​ເຕັກ​ໂນ​ໂລ​ຊີ ກຣຸບ ຈະ​ເຂົ້າ​ມາ​ຊື້​ກິ​ດຈະ​ການ​ສ່ວນ​ທີ່​ເປັນ​ທຸລະ​ກິດ​ໂທລະສັບ​ມື​ຖື​ຂອງ​ບໍລິສັດ​ໄມ​ໂຄຣຊອຟ​ເປັນ​ເງິນ 350 ລ້ານ​ໂດ​ລາ ຊຶ່ງ​ເປັນ​ທຸລະ​ກິດ​ທີ່​ໄມ​ໂຄຣຊອຟຊື້​ມາ​ຈາກ​ໂນ​ເກ​ຍ​ເມື່ອ​ປີ 2014 ​ໂນ​​ເກ​ຍ​ເຄີຍ​ເປັນ​ບໍລິ​ສັດ​ໂທລະສັບ​ມື​ຖື​ອັນ​ດັບ​ໜຶ່ງ​ຂອງ​ໂລກ​​ໃນ​ໄລຍະ​ປີ 1998-2011 ​ແຕ່​ຖືກ​ຄູ່​ແຂ່ງ​ຄື​ຊຳ​ຊຸງ​ຂອງສ.​ເກົາຫຼີ​ແຊງ​ໜ້າ ຫຼັງ​ຈາກ​ບໍ່​ສາມາດປັບ​ຕົວ​ກັບ​ການ​ປ່ຽນ​ແປງ​ຂອງ​ຕະຫຼາດ​ທີ່​ໂທລະສັບ​ແບບ​ສະມາດ​ໂຟນ​ໄດ້​ຮັບ​ຄວາມ​ນິຍົມ​ວ່ອງ​ໄວ ​ໂນ​ເກ​ຍກ່າວ​ອີກ​ວ່າ ບໍ່​ໄດ້​ຖື​ຫຸ້ນ​ໃນ​ບໍລິສັດ​ເອຊ​ເອັມດີ ​ໂກລບອລ ​ແຕ່​ຢ່າງ​ໃດ.