ສຳນັກຂ່າວຕ່າງປະເທດ ລາຍງານໃນວັນທີ 17 ພຶດສະພາຜ່ານມານີ້ວ່າ ໂຮງໝໍໃຫຍ່ຂອງລັດແມດຊາຊູເຊດ ສະຫະລັດອາເມຣິກາ ໄດ້ອອກມາຖະແຫລງ ໃນມື້ວັນຈັນທີ 16 ພຶດສະພາ 2016 ກ່ຽວກັບຜົນສຳເລັດ ໃນການປ່ຽນຖ່າຍອະໄວຍະວະເພດຊາຍ ຄັ້ງທຳອິດ ໃຫ້ແກ່ ທ້າວ ໂທມັສ ແມນນິ່ງ ອາຍຸ 64 ປີ ອັນໄດ້ກາຍເປັນ ການຜ່າຕັດຄັ້ງສຳຄັນຂອງວົງການແພດ ແລະ ສ້າງຄວາມຫວັງໃຫ້ແກ່ທ່ານຊາຍ ຜູ້ຊຶ່ງໄດ້ສູນເສຍຂອງຮັກຂອງຫວງ.
ການຜ່າຕັດດັ່ງກ່າວນີ້ ໄດ້ໃຊ້ເວລາດົນເຖິງ 15 ຊົ່ວໂມງ ໂດຍຄົນເຈັບລາຍດັ່ງກ່າວ ໄດ້ເຂົ້າຮັບການຜ່າຕັດ ປ່ຽນຖ່າຍອະໄວຍະວະເພດໃໝ່ ພາຍຫລັງທີ່ຜູ້ກ່ຽວສູນເສຍອະໄວຍະວະເພດ ຈາກພະຍາດມະເຮັງອະໄວຍະວະເພດ ຊະນິດຮຸນແຮງ ໂດຍແພດໄດ້ຕັດອອກເມື່ອປີ 2012 ຜ່ານມາ ຊຶ່ງອະໄວຍະວະເພດໃໝ່ນີ້ ຈະເຮັດໃຫ້ຜູ້ກ່ຽວ ສາມາດຍ່ຽວໄດ້ເປັນປົກກະຕິ ແລະ ມີເພດສຳພັນໄດ້ອີກດ້ວຍ ຍົກເວັ້ນແຕ່ຜູ້ກ່ຽວ ຈະບໍ່ສາມາດມີລູກໄດ້ ເນື່ອງຈາກບໍ່ໄດ້ມີການປູກຖ່າຍລູກອັນທະໃໝ່.
ແນວໃດກໍຕາມ ຍັງມີຄວາມທ້າທາຍສຳຄັນອີກຢ່າງໜຶ່ງຄື ການຂາດແຄນຜູ້ບໍລິຈາກອະໄວຍະວະເພດ ໂດຍການຜ່າຕັດກໍລະນີດັ່ງກ່າວນີ້ ແພດໄດ້ນຳໃຊ້ອະໄວຍະວະເພດ ທີ່ໄດ້ຮັບການບໍລິຈາກທ່ານໜຶ່ງ ຊຶ່ງບໍ່ມີການເປີດເຜີຍຊື່ ພຽງແຕ່ບອກວ່າ ເປັນຜູ້ທີ່ເສຍຊີວິດໄປແລ້ວເທົ່ານັ້ນ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!