ຂປລ. ໃນວັນທີ 12 ພຶດສະພາ ນີ້, ທີ່ນະຄອນຫລວງວຽງຈັນ, ໄດ້ຈັດຖະແຫລງຂ່າວເປີດໂຕ ສູນພັດທະນາສະໝອງເດັກກ່ອນໄວຮຽນ “ຊິ ຈິດະ” ຢ່າງເປັນທາງການ. ໃຫ້ກຽດເຂົ້າຮ່ວມໂດຍ ທ່ານ ນາງ ແສງເດືອນ ຫລ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ແລະ ທ່່ານ ໂຄ ຊິຈິດະ (Ko Shichida) ປະທານສະຖາບັນການສຶກສາແຫ່ງປະເທດຍີ່ປຸ່ນ, ພ້ອມດ້ວຍແຂກຖືກເຊີນ ແລະ ພໍ່ແມ່ຜູ້ປົກຄອງເຂົ້າຮຽນ.
ຊິຈິດະ ແມ່ນສູນພັດທະນາສະໝອງເດັກກ່ອນໄວຮຽນ ທີ່ມີຫລັກສູດການສຶກສາຂອງຍີ່ປຸ່ນ ສ້າງຂຶ້ນໂດຍ ສາດສະດາຈານ ດຣ.ມາໂກໂຕະ ຊິຈິດະ (1929-2009) ເຊິ່ງເນັ້ນໜັກການພັດທະນາສະໝອງເບື້ອງຂວາ ແຫ່ງຄວາມຄິດສ້າງສັນ ແລະ ການພັດທະນາສະໝອງເບື້ອງຊ້າຍ ແຫ່ງການນຳໃຊ້ສະຕິ, ເຫດຜົນ ແລະ ພາສາ ເພື່ອສະໝອງສອງຂ້າງໄດ້ໃຊ້ງານດຸ່ນດ່ຽງ ແລະ ມີປະສິດທິພາບສູງສຸດ ບົນພື້ນຖານການປູກຝັງຈິດໃຕ້ສຳນຶກ ໃຫ້ເດັກມີຈິດໃຈງົດງາມ ແລະ ບໍລິສຸດ. ນອກຈາກນັ້ນ, ການສຶກສາແບບ ຊິຈິດະ ແມ່ນການຝຶກອົບຮົ່ມໃຫ້ເດັກມີຄວາມຄິດສ້າງສັນ, ມີຈິນຕະນາການສູງ, ມີສະມາທິສູງ, ມີຄວາມຈື່ຈຳເປັນເລີດ (ມີຄວາມສາມາດຈື່ໄດ້ຫລາຍ, ຈື່ໄດ້ໄວ ແລະ ຈື່ແບບບໍ່ລືມ), ຮັບຮູ້ໄດ້ໄວ, ຄິດໄລ່ໄວ, ເກັ່ງພາສາ, ເກັ່ງໃນການວິເຄາະເຫດຜົນຕ່າງໆ ແລະ ສາມາດແກ້ໄຂບັນຫາຕ່າງໆໄດ້ດ້ວຍໂຕເອງ.
ສູນພັດທະນາດັ່ງກ່າວ, ເປີດວັນອັງຄານ – ວັນອາທິດ, ຮັບເດັກນ້ອຍອາຍຸແຕ່ 6 ເດືອນ ຫາ 6 ປີ ຫລັກສູດ ການຮຽນ-ການສອນ ເປັນພາສາລາວ, 1 ອາທິດ ມາຮຽນ 1 ຊົ່ວໂມງ ເດັກນ້ອຍຈະໄດ້ເຮັດກິດຈະກຳ 15 ຫາ 25 ກິດຈະກໍາໂດຍສະເລ່ຍ ໂດຍຜູ້ປົກຄອງຈະຕ້ອງເຂົ້າຮ່ວມການຝຶກກັບເດັກໃນທຸກໆຄັ້ງ. ສູນຊິຈິດະ ມີຫລາຍກ່ວາ 500 ສາຂາ ໃນ 14 ປະເທດ ແລະ ມີຫລັກສູດດຽວກັນ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!