ສຸກສາລາຫຼັງໃໝ່ ເຊິ່ງເປັນການຊ່ອຍເຫຼືອຈາກສະຫະລັດອາເມຣິກາ ແມ່ນມີທີ່ຕັ້ງຢູ່ໃນບໍລິເວນສຸກສາລາຫຼັງເກົ່າ ກຸ່ມບ້ານຫົວຊ້າງ ເມືອງໜອງແຮດ ແຂວງຊຽງຂວາງ ທີ່ເຄີຍໃຫ້ການບໍລິການໃນໄລຍະຜ່ານມາ ເປັນໂຄງການຊ່ອຍເຫຼືອຂອງລັດຖະບານສະຫະລັດອາເມຣິກາ ມີມູນຄ່າ 589.473 ໂດລາສະຫະລັດ ແລະ ສຸກສາລາໃໝ່ຫຼັງນີ້ ຈະຊ່ອຍປັບປຸງຄວາມສາມາດຂອງທັງຫ້ອງການສາທາລະນະສຸກເມືອງ ແລະ ແຂວງ ໃນການໃຫ້ບໍລິການປິ່ນປົວສຸຂະພາບຂອງປະຊາຊົນພາຍໃນແຂວງຊຽງຂວາງ ແລະ ເມືອງອ້ອມຂ້າງທີ່ໃກ້ຄຽງ ເຊິ່ງທ່ານ ໄມໂຄ ຄລາຍ ຮອງທູດສະຫະລັດອາເມຣິກາ ປະຈຳ ສປປ.ລາວ ໄດ້ມອບສຸກສາລາຫຼັງໃໝ່ຢ່າງເປັນທາງການໃຫ້ແກ່ທ່ານ ບົວສອນ ສີນວນທອງ ຮອງເຈົ້າແຂວງໆຊຽງຂວາງ ໂດຍພິທີມອບ-ຮັບ ໄດ້ຈັດຂຶ້ນໃນວັນທີ 12 ພຶດສະພາ 2016 ທີ່ແຂວງດັ່ງກ່າວ.
ຢູ່ໃນບົດປາໄສຂອງທ່ານຮອງທູດສະຫະລັດອາເມຣິກາ ທ່ານໄດ້ກ່າວວ່າ ພວກເຮົາມີຄວາມພາກພູມໃຈທີ່ໄດ້ເຮັດວຽກໂດຍການຮ່ວມມືກັບລັດຖະບານຂອງ ສປປ.ລາວ ເພື່ອຈະຊ່ອຍປັບປຸງ ແລະ ສະໜອງສິ່ງອຳນວຍຄວາມສະດວກເຂົ້າໃນດ້ານສາທາລະນະສຸກທົ່ວປະເທດໃຫ້ດີຂຶ້ນ ເຊິ່ງການມອບສຸກສາລາດັ່ງກ່າວນີ້ໃຫ້ແກ່ປະຊາຊົນແຂວງຊຽງຂວາງ ແມ່ນເພື່ອເປັນສັນຍະລັກຂອງຄວາມສຳພັນທີ່ພວມເຕີບໃຫຽ່ຂະຫຽາຍໂຕ ລະຫວ່າງສອງປະເທດ ໂດຍລັດຖະບານສະຫະລັດ ກໍໄດ້ສະໜອງໂຄງການຊ່ອຍເຫຼືອດ້ານມະນຸດສະທຳ ຢູ່ໃນເຂດຊົນນະບົດຂອງປະເທດລາວ ເຊິ່ງມາຮອດປັດຈຸບັນເປັນເວລາ 18 ປີກວ່າ ເຊິ່ງຮວມມີ ໂຮງຮຽນ ສຸກສາລາ ລະບົບຊົນລະປະທານ ລະບົບນ້ຳສະອາດ ແລະ ອື່ນໆ.
ຂ່າວ/ພາບ: ພອນສະຫວັນ ສັງສົມບູນ