ເລີ່ມມີໃຫ້ເຫັນປະຈັກຕາສຳລັບການລົງ ໂທດພະນັກງານລັດທີ່ສໍ້ໂກງ ຊັບສິນສ່ວນລວມ ຈາກທີ່ຜ່ານມາບັນຫານີ້ ກາຍເປັນຄຳຖາມມາໂດຍຕະຫຼອດ ແລະ ບໍ່ທັນມີການເປີດເຜີຍກ່ຽວກັບການລົງໂທດລວມທັງຕົວຕົນຂອງຜູ້ກະທຳ ຜິດໃຫ້ສັງຄົມໄດ້ຮັບຮູ້, ຢ່າງໃດກໍດີ ຫຼ້າສຸດການຕັດສິນຈຳຄຸກພະນັກງານລັດ 10 ຄົນທີ່ແຂວງຫົວພັນໃນຖານສໍ້ໂກງຊັບຂອງລັດຈະກາຍເປັນຄະດີແບບຢ່າງໃນ ການປາບປາມຂະບວນການສໍ້ລາດບັງຫຼວງຂອງລາວລົງເທື່ອລະກ້າວ.
ໂດຍຂ່າວແຂວງຫົວພັນໄດ້ໃຫ້ຮູ້ວ່າ: ໃນວັນທີ 16 ພຶດສະພານີ້, ສານປະຊາ ຊົນຂັ້ນຕົ້ນແຂວງຫົວພັນໄດ້ຕັດສິນຄະດີ ສໍ້ລາດບັງຫຼວງ ຊັບສິນຂອງລັດທີ່ເກີດ ຂຶ້ນໃນຖັນແຖວພະນັກງານທີ່ເຮັດວຽກ ຢູ່ພະແນກການເງິນແຂວງ, ການເງິນເມືອງຊຳເໜືອ, ສຶກສາທິການ ແລະ ກີລາ ເມືອງຊຳເໜືອ ແລະ ຫ້ອງການການເງິນເມືອງຫົວເມືອງ ໂດຍມີຜູ້ຕ້ອງຫາ ຈຳນວນ 10 ຄົນ.
ຜ່ານການກວດກາສືບສວນ-ສອບສວນຂອງເຈົ້າໜ້າທີ່ສະເພາະກິດຂັ້ນສູນກາງ, ຂັ້ນແຂວງ ໄດ້ກວດພົບເຫັນວ່າຜູ້ກ່ຽວທັງ 10 ຄົນ ມີຄວາມຜິດຖານສໍ້ໂກງຊັບສິນຂອງລັດທີ່ເປັນການສ້າງຜົນສະທ້ອນ ອັນບໍ່ດີມາສູ່ສັງຄົມ, ເຮັດໃຫ້ຊັບສິນຂອງລັດຖືກເສຍຫາຍຢ່າງຫຼວງຫຼາຍ, ເຮັດໃຫ້ພະນັກງານໃນຂົງເຂດການສຶກສາ, ໄດ້ຮັບຜົນກະທົບຢ່າງຮ້າຍແຮງ ໂດຍເພາະຮ່ວງເງິນໂມງເກີນ, ເງິນຄູອາສາສະໝັກ, ບໍ່ຖືກເບີກຈ່າຍໃຫ້ພະນັກງານຄູຕາມຕົວຈິງ, ບາງງວດ, ບາງປີແມ່ນບໍ່ໄດ້ເບີກຈ່າຍເລີຍ. ຮູບແບບການກະທຳໂດຍແມ່ນຕື່ມຕົວເລກໃສ່ໃນແຜນຂອງຫ້ອງການສຶກສາ ບັນດາເມືອງ ຊຶ່ງການກະທຳຂອງພວກກ່ຽວຈິ່ງເປັນການກະທຳຜິດທາງອາຍາໃນໝວດທີ X ວ່າດ້ວຍອາດຊະຍາກຳພິເສດ ຊຶ່ງໄດ້ກຳນົດໄວ້ໃນມາດຕາ 174 ຂໍ້ 3, 4, 5 ແລະ ຂໍ້ 6 ຂອງກົດໝາຍອາຍາສະບັບປັບປຸງປີ 2005.
ດັ່ງນັ້ນ ສານອາຍາຂັ້ນຕົ້ນແຂວງຫົວພັນຈິງໄດ້ລົງໂທດຕັດອິດສະຫຼະພາບ ແລະ ປັບໃໝ ພວກກ່ຽວຄື: ນາງ ອາລຸນໄຊ ແກ້ວມະນີ, ອາຍຸ 31 ປີ ອະດີດພະນັກງານວິຊາການຫ້ອງການການເງິນເມືອງຊຳເໜືອ, ຖືກກັກຕົວຄັ້ງທີ1 ວັນທີ 28 ສິງຫາ 2012 ຄັ້ງທີ 2: ວັນທີ 19 ພະຈິກ 2013 ລັກລອບສໍ້ໂກງເປັນເງິນ 519.400.000 ກີບ, ຖືກຕັດອິດສະຫຼະພາບລົງໂທດຈຳຄຸກເປັນເວລາ 10 ປີ 1 ເດືອນ ແລະ ປັບໃໝເປັນ 1% ຂອງຈຳນວນມູນຄ່າເງິນທີ່ສໍ້ໂກງ ເທົ່າກັບ 5.194.000 ກີບ ຜູ້ກ່ຽວໄດ້ສົ່ງຄືນລັດແລ້ວ 382 ລ້ານກີບ ແລະຍັງ 127.400.00 ກີບ, ທ້າວ ສົມມິດຕາແກ້ວປະເສີດ, ອາຍຸ 32 ປີ ອະດີດພະນັກງານວິຊາການຫ້ອງການງົບປະມານພະແນກການເງິນແຂວງຫົວພັນ ຖືກກັກຕົວວັນທີ 19 ພະຈິກ 2013 ເງິນທີ່ສໍ້ໂກງມີ 446.050.000 ກີບ, ປັບໃໝ 4.446.050 ກີບຈຳຄຸກ 8 ປີ 3 ເດືອນ ຈຳນວນເງິນດັ່ງກ່າວໄດ້ສົ່ງຄືນ ແກ່ລັດໝົດແລ້ວ; ທ້າວ ທອນສີ ບຸນລືວີ, ອາຍຸ 54 ປີ, ອະດີດພະນັກງານຫົວໜ້າຫ້ອງການງົບປະມານການເງິນພະແນກການເງິນແຂວງ ຫົວພັນ ຖືກກັກຕົວວັນທີ 28 ສິງຫາ 2012 ໄດ້ສໍ້ໂກ້ງເງິນ 198.800.00 ກີບປັບໃໝ 1.198.800 ກີບ ຕັດສິນຈຳຄຸກ 6 ປີ 3 ເດືອນ ໄດ້ສົ່ງຄືນແກ່ລັດໝົດແລ້ວ; ນາງ ວອນໄຈ ເຮືອງພິດາ, ອາຍຸ 30 ປີ ອະດີດພະນັກງານວິຊາການຄອມພິວເຕີຫ້ອງງົບປະມານ ການເງິນແຂວງ ກັກຕົວວັນທີ19 ພະຈິກ 2013 ສໍ້ໂກງເງິນລັດ 486.099.500 ກີບ, ປັບໃໝ 4.860.995 ກີບ ຖືກຕັດສິນລົງໂທດ 8 ປີ 4 ເດືອນ ຈຳນວນເງິນດັ່ງກ່າວໄດ້ສົ່ງຄືນແກ່ລັດໝົດແລ້ວ; ທ້າວ ຄອນໄຈ ວິຫຼ້າຄຳໄຊ, ອາຍຸ 49 ປີ ອະດີດພະນັກງານຫົວໜ້າຫ້ອງການສຶກສາເມືອງຊຳເໜືອຖືກກັກຕົວ ວັນທີ 10 ກັນຍາ 2012 ລັກລອບສໍ້ໂກງເງິນ 426.000.000 ກີບ, ປັບໃໝ 4.260.000 ກີບ, ຈຳຄຸກ 8 ປີ 2 ເດືອນ ຈຳນວນເງິນໄດ້ສົ່ງຄືນແກ່ລັດໝົດແລ້ວ, ທ້າວ ທອງພັນ ຄຳມີໄຊ, ອາຍຸ 44 ປີ ອະດີດພະນັກງານວິຊາການໜ່ວຍງານນອກລະບົບຫ້ອງການສຶກສາທິການ-ກີລາເມືອງ ຊຳເໜືອ ສໍ້ໂກງເງິນ 394 ລ້ານກວ່າກີບ, ປັບໃໝ 3.948.920 ກີບ ຕັດສິນຈຳຄຸກ 8 ປີ 1 ເດືອນ ຈຳນວນເງິນດັ່ງກ່າວໄດ້ສົ່ງຄືນແກ່ລັດ ໝົດແລ້ວ, ນາງ ວັນພອນ ທອງທະວີ, ອາຍຸ 32 ປີ, ອະດີດພະນັກງານວິຊາການການເງິນຫ້ອງການສຶກສາເມືອງຊຳເໜືອ ຖືກກັກຕົວວັນທີ 28 ສິງຫາ 2012 ສໍ້ໂກງເງິນ 270.892.000 ກີບ, ປັບໃໝ 2.708.920 ກີບ ຕັດອິດສະຫຼະພາບຈຳຄຸກ 6 ປີ 4 ເດືອນ ຈຳນວນເງິນດັ່ງກ່າວໄດ້ສົ່ງຄືນແກ່ລັດ ໝົດແລ້ວ; ນາງ ໄຄຄຳ ອູ່ທອງຄຳ, ອາຍຸ 34 ປີ, ອະດີດພະນັກງານການເງິນຫ້ອງການສຶກສາເມືອງຊຳເໜືອຖືກກັກຕົວວັນທີ 21 ພະຈິກ 2013 ໂກງເງິນ 128.000.000 ກີບ, ປັບໃໝ 1.280.000 ກີບ, ລົງໂທດ 6 ປີ 2 ເດືອນເງິນດັ່ງກ່າວໄດ້ສົ່ງຄືນແກ່ລັດໝົດແລ້ວ, ທ້າວ ຄຳຜາຍ ນັນທະວົງດວງສີ, ອາຍຸ 47 ປີ, ອະດີດພະນັກງານຫົວໜ້າຫ້ອງການການເງິນເມືອງຫົວເມືອງ ຖືກກັກຕົວວັນທີ 19 ພະຈິກ 2013 ສໍ້ໂກງເງິນ 86.402.000 ກີບ, ປັບໃໝ 864.020 ກີບ, ຈຳຄຸກ 4 ປີ 1 ເດືອນ ຈຳນວນເງິນດັ່ງກ່າວ ໄດ້ສົ່ງຄືນແກ່ລັດໝົດແລ້ວ, ທ້າວ ອຸດອນ ຄຳມີໄຊ, ອາຍຸ 30 ປີ, ອະດີດພະນັກງານຮອງຫົວໜ້າຫ້ອງການການເງິນເມືອງຫົວເມືອງ ຖືກກັກຕົວເມື່ອວັນທີ 19 ພະຈິກ 2013, ສໍ້ໂກງເງິນ 101.158.000 ກີບ ປັບໃໝ 1.011.580 ກີບ ຕັດສິນລົງໂທດ 6 ປີ 1 ເດືອນ ແລະ ຈຳນວນເງິນດັ່ງກ່າວຜູ້ກ່ຽວໄດ້ສົ່ງຄືນແກ່ລັດໝົດແລ້ວ.
ພ້ອມນີ້ ຜູ້ຕ້ອງຫາທັງ 10 ຄົນ ຕ້ອງໄດ້ຈ່າຍຄ່າທຳນຽມໃຫ້ສານຜູ້ລະ 2,9 ແສນກີບ ແລະ ພວກກ່ຽວສາມາດຄັດຄ້ານ ຫຼື ຮ້ອງອຸທອນໄດ້ພາຍໃນກຳນົດ 20 ວັນນັບແຕ່ມື້ຕັດສິນເປັນຕົ້ນໄປ.
ຂ່າວຈາກ: http://www.sedthakid.la/khao/18891.spc