ໂຄງການກໍ່ສ້າງກັນຕະຝັ່ງເຈື່ອນແຄມນ້ຳຊັນເຂດບ້ານສີມຸງຄຸນ ເມືອງ ປາກຊັນ ແຂວງບໍລິຄຳໄຊ ຫຼື ເຂດວັດ ບ້ານ ສີມຸງຄຸນ ທີ່ໄດ້ເລີ່ມການກໍ່ສ້າງມາແຕ່ເດືອນມັງກອນ 2016 ນັ້ນ ປະຈຸບັນໄດ້ສຳເລັດການກໍ່ສ້າງແລ້ວ 78% ສ່ວນທີ່ເຫຼືອແມ່ນໄດ້ສຸມໃສ່ຢ່າງຕັ້ງໜ້າເພື່ອໃຫ້ສຳເລັດໃນທ້າຍເດືອນມິຖຸນາ 2016, ຂະນະທີ່ປະຊາຊົນສຸດທີ່ດີໃຈທີ່ຈະໄດ້ເຫັນແຄມນ້ຳຊັນທີ່ສວຍງາມ ແລະປອດໄພຈາກນ້ຳເຊາະຕະຝັ່ງເຈື່ອນ.
ທ່ານ ແກ້ວອຸດອນ ຫຼວງສຸວັນນະວົງ ຫົວໜ້າຂະແໜງຄຸ້ມຄອງທາງນ້ຳພະແນກໂຍທາທິການ ແລະຂົນສົ່ງ ແຂວງ ບໍລິຄຳໄຊ ຜູ້ຮັບຜິດຊອບໂຄງການດັ່ງ ກ່າວໄດ້ໃຫ້ຮູ້ຫວ່າງບໍ່ດົນນີ້ວ່າ: ໂຄງການກໍ່ສ້າງກັນຕະຝັ່ງເຈື່ອນແຄມນ້ຳຊັນເຂດບ້ານສີມຸງຄຸນເມືອງປາກຊັນ ມີຄວາມຍາວ 325 ແມັດ ໂດຍການກໍ່ສ້າງປ້ອງກັນຕະຝັ່ງເຈື່ອນແບບລຽນຫີນ (REBACKMENT) ຊຶ່ງແມ່ນບໍລິສັດໂລໂກສ ກໍ່ສ້າງຂົວ-ທາງ ແລະຊົນລະປະທານ ຈຳກັດ ເປັນຜູ້ຮັບເໝົາກໍ່ສ້າງໃນມູນຄ່າຂອງໂຄງການທັງໝົດ 18,5 ຕື້ກວ່າກີບເປັນງົບປະມານຂອງລັດຕາມແຜນພັດທະນາກໍ່ສ້າງພື້ນຖານໂຄງລ່າງແຕ່ປີ 2015-2020. ໂດຍໄດ້ເລີ່ມກໍ່ສ້າງມາແຕ່ວັນທີ 10 ມັງກອນ 2016 ມາຮອດປະຈຸບັນແມ່ນໄດ້ສຳເລັດແລ້ວ 78% ຄາດວ່າໃນທ້າຍເດືອນມິຖຸນາຂອງປີນີ້ຈະໃຫ້ສຳເລັດ 100%.
ທ່ານ ຄຳແສນ ພະຍາໄຊ ຜູ້ຕິດຕາມການກໍ່ສ້າງພະແນກ ຍທຂ ກໍໃຫ້ຮູ້ຕື່ມວ່າ: ສາເຫດທີ່ມີການກໍ່ສ້າງໃນຈຸດນີ້ ກ່ອນກໍ່ເພາະວ່າຕະຝັ່ງແຄມນ້ຳຊັນ (ເຂດຫຼັງວັດ ບ້ານສີມຸງຄຸນ) ແມ່ນໄດ້ຖືກຜົນກະທົບແຮງຈາກໄພທຳມະຊາດ ນ້ຳຊັນເຊາະເຈື່ອນຊຶ່ງມີຜົນກະທົບຕໍ່່ວັດຖຸສິ່ງຂອງວັດວາອາຮາມ ແລະບ້ານເຮືອນປະຊາຊົນທີ່ອາໃສຢູ່ເຂດນີ້ທັງ ເປັນການເຮັດໃຫ້ຄວາມສະດວກສະບາຍໃຫ້ແກ່ປະຊາຊົນທີ່ອາໃສຢູ່ຕາມແຄມນ້ຳຊັນໄດ້ມີໃບໜ້າໃໝ່ໃນການພັດ ທະນາບ້ານເຮືອນໃຫ້ສະອາດງາມຕາພ້ອມປ້ອງກັນໄພທຳມະຊາດຈາກນ້ຳເຊາະເຈື່ອນ.
ທ່ານ ພັດສອນ ຈັນທິວົງ ອຳນວຍ ການບໍລິສັດຜູ້ຮັບເໝົາກໍ່ສ້າງໂຄງການດັ່ງກ່າວໃຫ້ຮູ້ຕື່ມອີກວ່າ: ໂຄງການກໍ່ ສ້າງປ້ອງກັນຕະຝັ່ງເຈື່ອນດັ່ງກ່າວກໍ່ແມ່ນໜຶ່ງໃນຫຼາຍໂຄງການປ້ອງກັນຕະຝັ່ງເຈື່ອນທີ່ ແຂວງບໍລິຄຳໄຊ ໄດ້ມອບ ໃຫ້ບໍລິສັດໂລໂກສກໍ່ສ້າງຂົວ-ທາງ ແລະ ຊົນລະປະທານຈຳກັດໄດ້ຈັດຕັ້ງປະຕິບັດຈົນສຳເລັດຊຶ່ງຜ່ານມາກໍ່ໄດ້ສຳເລັດ ການກໍ່ສ້າງປ້ອງກັນຕະຝັ່ງເຈື່ອນຢູ່ ເຂດບ້ານປາກທວຍ ເມືອງທ່າພະບາດ, ສຳເລັດການສຳຫຼວດອອກແບບເສດ ຖະກິດສະເພາະນ້ຳຫງາງ ແລະຫຼາຍໂຄງການທີ່ແຂວງມອບໃຫ້ ຢ່າງໃດກໍຕາມສຳລັບໂຄງການກໍ່ສ້າງປ້ອງກັນຕະຝັ່ງເຈື່ອນແຄມນ້ຳຊັນ ເຂດບ້ານສີມຸງຄຸນ ເມືອງປາກຊັນ ທາງບໍລິສັດກໍ່ໄດ້ເອົາໃຈໃສ່ຈັດຕັ້ງປະຕິບັດຕາມການອອກແບບໃຫ້ໄດ້ມາດຕະຖານ ແລະຈະໃຫ້ສຳເລັດຕາມແຜນການທີ່ວາງໄວ້.
ທີ່ມາ: