ພິທີມອບ-ຮັບ ອາຄານໂຮງຮຽນມັດທະຍົມຕອນຕົ້ນເມືອງນາ ເມືອງຊໍາໃຕ້ ແຂວງຫົວພັນ ຊຶ່ງເປັນການຊ່ວຍເຫລືອລ້າ ຈາກລັດຖະບານສະຫະລັດອາເມລິກາ ໄດ້ຈັດຂຶ້ນໃນວັນທີ 11 ພຶດສະພານີ້ ລະຫວ່າງ ທ່ານ ໄມໂຄ ຄລາຍ ຮອງທູດສະຫະລັດອາເມລິກາປະຈໍາລາວ ແລະ ທ່ານ ນາງ ແພງ ກັນຍາພີມ ຮອງເຈົ້າແຂວງຫົວພັນ, ມີອໍານາດການປົກຄອງ, ພ້ອມດ້ວຍຄຸອາຈານ ແລະ ນ້ອງນັກຮຽນ ເຂົ້າຮ່ວມຢ່າງຫລວງຫລາຍ.
ໂຮງຮຽນດັ່ງກ່າວລວມມີ: ອາຄານໃໝ່ໜຶ່ງຫລັງ, ມີ 5 ຫ້ອງຮຽນ, ຫ້ອງການຄູ, ຫໍພັກນັກຮຽນ ແລະ ຫ້ອງນໍ້າ, ພ້ອມປະກອບອຸປະກອນ ການຮຽນ-ການສອນຄົບຊຸດ ແລະ ຕິດຕັ້ງລະບົບໄຟຟ້າ ແລະ ນໍ້າປະປາເປັນຢ່າງດີ, ຊຶ່ງລວມມີມູນຄ່າການກໍ່ສ້າງ ຫລາຍກວ່າ 630 ພັນໂດລາສະຫະລັດ.
ທ່ານຮອງທູດສະຫະລັດອາເມລິກາ ກ່າວວ່າ: ການສຶກສາແມ່ນສິ່ງທີ່ສໍາຄັນ ຕໍ່ການພັດທະນາເສດຖະກິດ ແລະ ສັງຄົມຂອງປະເທດ, ພວກເຮົາມີຄວາມພູມໃຈ ທີ່ໄດ້ປະກອບສ່ວນປັບປຸງ ແລະ ສະໜອງສິ່ງອໍານວຍຄວາມສະດວກ ເຂົ້າໃນວຽກງານການສຶກສາຂອງລາວ ໃຫ້ດີຂຶ້ນເທື່ອລະກ້າວ ແລະ ໂຮງຮຽນແຫ່ງນີ້ ຈະເປັນສັນຍາລັກໃໝ່ແຫ່ງການພົວພັນ ລະຫວ່າງລາວ ແລະ ອາເມລິກາທີ່ເຫັນວ່າ ນັບມື້ມີຄວາມແໜ້ນແຟ້ນຍິ່ງຂຶ້ນ.
ລັດຖະບານອາເມລິກາ ໄດ້ໃຫ້ການຊ່ວຍເຫລືອ ສປປ ລາວ ໃນຫລາຍຂົງເຂດໃນຕະຫລອດໄລຍະ 18 ປີຜ່ານມາ ເປັນຕົ້ນ: ການສຶກສາ, ສາທາລະນະສຸກ, ລະບົບຊົນລະປະທານ ແລະ ອື່ນໆ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!