ຂປລ. ພິທີວາງສີລາລຶກ ໂຄງການກໍ່ສ້າງ ຫ້ອງວ່າການສະພາແຫ່ງຊາດ ເຂດເລືອກຕັ້ງທີ 7 ແຂວງໄຊຍະບູລີ ໄດ້ຈັດຂຶ້ນໃນວັນທີ 12 ພຶດສະພາ 2016 ນີ້, ໂດຍການເຂົ້າຮ່ວມຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ພົງສະຫັວນ ສິດທະວົງ ເຈົ້າແຂວງໆໄຊຍະບູລີ, ມີບັນດາສະມາຊິກສະພາແຫ່ງຊາດ ຊຸດທີ VIII ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສົມຫັວງ ວົງວິໄລ ອຳນວຍການ ບໍລິສັດ ຈິດຈະເລີນກໍ່ສ້າງ ຈຳກັດ ໃນນາມຜູ້ຮັບເໝົາກໍ່ສ້າງ ໄດ້ໃຫ້ຮູ້ວ່າ: ໂຄງການກໍ່ສ້າງ ຫ້ອງການສະພາປະຈຳເຂດເລືອກຕັ້ງທີ 7 ແຂວງໄຊຍະບູລີ ແມ່ນເລີ່ມໄດ້ລົງມືມາແຕ່ວັນທີ 7 ເມສາ 2016 ແລະ ຄາດວ່າຈະໃຫ້ສຳເລັດ ໃນວັນທີ 7 ເມສາ 2019 ກຳນົດ 36 ເດືອນ, ມີເນື້ອທີ່ທັງໝົດ 2 ເຮັກຕາກວ່າ ໃນມູນຄ່າການກໍ່ສ້າງທັງໝົດ 58,5 ຕື້ກີບ ໂດຍແມ່ນທຶນງົບປະມານຂອງລັດ. ເປັນອາຄານ 4 ຊັ້ນ, ກວ້າງ 54 ແມັດ, ຍາວ 74 ແມັດ, ສູງ 21 ແມັດ, ມີຫ້ອງປະຊຸມສາມາດບັນຈຸຄົນໄດ້ 300-400 ຄົນ, ມີລະບົບ ກໍາແພງອ້ອມຮອບ, ເດີ່ນຈອດລົດ, ປະຕູໂຂງ ແລະ ປ້ອມຍາມ, ມີລະບົບນ້ຳປະປາ, ໄຟຟ້າ, ມີລະບົບ ເຄື່ອງປັບອາກາດ, ເຄື່ອງສື່ສານ, ເຄື່ອງສຽງ ແລະ ລະບົບອິນເຕີເນັດ ຄົບຊຸດ.
ໂຄງການດັ່ງກ່າວ, ໄດ້ລິເລີ່ມຂຽນເປັນບົດສະເໜີໂຄງການ ມາແຕ່ເດືອນພະຈິກ ປີ 2010 ເປັນຕົ້ນມາ ຍ້ອນອີງໃສ່ ສະຖານທີ່ບ່ອນເຮັດວຽກຂອງ ສະມາຊິກສະພາຊຸດທີ VII ແລະ ການເຕີບໃຫຍ່ຂະຫຍາຍຕົວທາງດ້ານຈຳນວນ ແລະ ພາລະບົດບາດ ຂອງຫ້ອງວ່າການສະພາ ມີການຂະຫຍາຍເພີ່ມຂຶ້ນ ແລະ ໄດ້ເຮັດໃຫ້ສະຖານທີ່ບ່ອນເຮັດວຽກ ມີຄວາມຫຍຸ້ງຍາກ ບວກໃສ່ທີ່ຕັ້ງຂອງອາຄານຫລັງເກົ່າບໍ່ເໝາະສົມ. ສະນັ້ນ, ຈິ່ງໄດ້ມີການກໍ່ສ້າງຫ້ອງວ່າການ ສະພາແຫ່ງຊາດ ເຂດເລືອກຕັ້ງທີ 7 ແຂວງໄຊຍະບູລີຫລັງໃໝ່.
ແຫລ່ງງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!