ອ່ານຕໍ່ຈາກສະບັບກ່ອນ

ເມືອແມ່ຊີນ້ອຍໄດ້ຍິນແບບນັ້ນກໍ່ຟ້າວເງີຍໜ້າມາເບິ່ງໜ້າຂອງພໍ່ຂາວທັນທີແຕ່ບໍ່ໄດ້ຕອບຫຍັງແລ້ວແມ່ຊີນ້ອຍກໍ່ຫົດຜັກຕໍ່ໄປແບບບໍ່ສໄນໃຈສາຍຕາທີ່ພໍ່ຂາວແນມເບິ່ງ ເມື່ອຮອດຕອນແລງປະມານ 18:00ໂມງ ກໍ່ຈະມີການຮວມຕົວກັນເພື່ອໄຫວ້ພຣະແລງ

ກິດຂອງພຣະສົງໃນແຕ່ລະວັນຕ້ອງຕື່ນແຕ່ເຊົ້າປະມານ 4:00ໂມງເຊົ້າກໍ່ຈະໄດ້ຍິນສຽງຕີແກ໋ງ ແລະ ບັນກາພຣະສົງ, ແມ່ຂາວ, ແມ່ຊີ, ພໍ່ຂາວ ກໍ່ຈະພາກັນໄປຮວມຕົວທີ່ສິມວັດ ເພື່ອໄຫວ້ພຣະຕອນເຊົ້າຈົນຮອດ 6:00ໂມງ ຫຼັງຈາກນັ້ນບັນດາຄູບາ, ຢາພໍ່ ບາງອົງກໍ່ພາກັນອອກໄປບິນພະບາດ ສ່ວນທີ່ຢູ່ໃນວັດກໍ່ພາກັນກວດເດີ່ນວັດ, ກວດສາລາວັດ ແມ່ຊີນ້ອຍແມ່ນອຸ່ນເຂົ້າ, ອຸ່ນຂອງກິນກຽມໄວ້, ບາງວັນຫຼັງໄຫວ້ພຣະແລ້ວກໍ່ມາກວດສາລາ, ຖູສາລາ ຫຼັງຈາກຈັງຫັນອາຫານເຊົ້າແລ້ວລາວປະຕິບັດທຳ, ນັ່ງສະມາທິ, ຍ່າງຈົງກົມ ຫຼັງຈາກທີ່ແມ່ຊີນ້ອຍນັ່ງສະມາທິຢູ່ກ້ອງຫົ່ມໄມ້ຄົນດຽວໄດ້ປະມານ 1 ຊົ່ວໂມງລາວກໍ່ຮູ້ເມື່ອຍ ລາວເລີຍຍ່າງກັບມາທີ່ກຸດຕິທີ່ຕົນອາໃສຢູ່ ແຕ່ມາຮອດກໍ່ເຫັນແມ່ຂາວອົງໜຶ່ງ ຊີ່ແມ່ຂາວຈ່ອຍກຳລັງນັ່ງທັກຝ້າຍຜູກແຂນທີ່ຕຽງກ້ອງຫົ່ມມ່ວງຂ້າງກຸດຕິ ແມ່ຂາວຮ້ອຍເລີຍຍ່າງເຂົ້າໄປນັ່ງລົງທີ່ຕຽງ ແລະ ຮຽນທັກຝ້າຍຜູກແຂນກັບແມ່ຂາວຈ່ອຍ ແມ່ຊີນ້ອຍເກີດສົງໃສເລີຍຖາມກັບແມ່ຂາວຈ່ອຍວ່າ

ແມ່ຊີນ້ອຍ: ແມ່ຂາວຈ່ອຍ! ແມ່ຂາວບວດໄດ້ຈັກປີແລ້ວ ເປັນຫຍັງແມ່ຂາວຈ່ອຍຈິ່ງມາບວດ

ແມ່ຂາວຍິ້ມເບົາໆ ແລ້ວຕອບຊ້າໆວ່າ: ລູກມີຄວາມທຸກມາແມ່ນບໍ່ຈິ່ງຖາມແມ່ແບບນີ້! ແມ່ຮູ້ສ່ວນຫຼາຍບ່າວສາວທີ່ມາບວດຂາວແມ່ນຈະໜີຄວາມຮັກມາ

ແມ່ຊີນ້ອຍບໍ່ປາກມີແຕ່ຍິ້ມເບົາໆໃສ່ແມ່ຂາວ

ແມ່ຂາວເວົ້າຕໍ່: ຖ້າລູກຢາກຮູ້ແມ່ກໍ່ຈະເລົ່າສູ່ຟັງ! ບໍ່ມີໃຜດອກທີ່ຢູ່ດີໆຢາກຈະເຂົ້າມາຢູ່ວັດ ແລະ ມາໃຊ້ບັ່ນປາຍຊີວິດຢູ່ໃນວັດ ຖ້າບໍ່ໝົດຫົນທາງ ຫຼື ຢາກຕັດກິເລດທາງໂລກແທ້ໆ! ຄືແມ່ນິບວດຕັ່ງແຕ່ຕອນອາຍຸ 22ປີ, ສາເຫດທີ່ມາບວດຄືຕອນອາຍຸແມ່ 22 ປີແມ່ເຂົ້າວຽງຈັນມາໃໝ່ໆ ແມ່ເປັນຄົນທ່າແຂກໃດ໋ ແມ່ໄດ້ໄປເຮັດວຽກຢູ່ໂຮງງານຕັດຫຍິບແຫ່ງໜຶ່ງຢູ່ມາສອງເດືອນມີຜູ້ຊາຍມາລົມແມ່ລົມໄປລົມມາຮອດສາມສີ່ເດືອນລາວບອກວ່າລາວບໍ່ມີເມຍລາວຊວນແມ່ອອກໄປເຊົ່າຫ້ອງຢູ່ແມ່ເປັນຄົນຊື່ເນາະ! ຍ້ອນວ່າຮັກແມ່ກະເລີຍໄປນຳເຂົາ ຢູ່ໄປດົນເຕີບຮອດປີໜຶ່ງແມ່ເກີດລູກແມ່ກະຍັງບໍ່ຮູ້ວ່າເທື່ອລາວມີເມຍ ຈົນຮອດມື້ຄ້ຳກຳມື້ທີສາມ ເມຍລາວມາແຕ່ໃສບໍ່ຮູ້ ມາເຕະໝໍ້ນ້ຳຕົ້ມຄ້ຳກຳແມ່ຄ້ວມ, ໃຄແຕ່ນ້ຳຮ້ອນບໍ່ຖືກລູກສາວແມ່ ເພາະແມ່ບັງໄວ້ຫຼັງແມ່ຖືນ້ຳຮ້ອນລວກເລັກໜ້ອຍ, ລາວມາດ່າແມ່ວ່າແມ່ໄປຍາດຜົວເຂົາ ຕອນນັ້ນແມ່ທັງເຈັບທັງອາຍ, ໝູ່ທີ່ມາເຝົ້າກຳພາແມ່ໄປໂຮງໝໍ ແມ່ຢູ່ໂຮງໝໍປະມານ 1 ເດືອນແມ່ທໍລະມານຫຼາຍ ຫຼັງຈາກອອກໂຮງໝໍມາແມ່ກໍ່ກັບໄປບ້ານເກີດ ຜ່ານໄປສາມປີ ແມ່ກັບມາວຽງອີກມາຊອກເຮັດວຽກເປັນກຳມະກອນຕັດຫຍິບຄືເກົ່າ ແລະ ຜົວແມ່ກໍ່ມາວົນວາຍກັບແມ່ຄືເກົ່າຈັ່ງໃດກະບໍ່ຖິ້ມບໍ່ປະ ແມ່ຊັງລາວແຮງ ດ່າລາວ! ຮ້າຍລາວ ລາວກໍ່ຍັງທຽວມາ ແມ່ເລີຍຕັດສິນໃຈມາຂໍບວດເປັນແມ່ຂາວຢູ່ວັດເລີຍຕັ້ງແຕ່ນັ້ນມາ ແລະ ຕອນນີ້ລູກສາວແມ່ກໍ່ອາຍຸໄດ້ 20 ປີແລ້ວ ດົນໆກໍ່ມາຢາມແມ່ເທື່ອໜຶ່ງ

ແມ່ຊີນ້ອຍຮູ້ສຶກອຶ້ງເລີຍເມື່ອໄດ້ຍິນເລື່ອງລາວຂອງແມ່ຂາວຈ່ອຍ ເພາະເລື່ອງທີ່ຕົນເອງໄດ້ພົບພໍ້ມັນຍັງບໍ່ຊ້ຽວໜຶ່ງຂອງແມ່ຂາວຈ່ອຍທີ່ໄດ້ພົບເລີຍ ເລື່ອງນີ້ມັນເຮັດໃຫ້ແມຊີນ້ອຍຄິດໄດ້ຫຼາຍໆສິ່ງຫຼາຍໆຢ່າງ.

ບວດເປັນວັນທີ 5 ແລ້ວ ໃນຂະນະທີ່ແມ່ຊີນ້ອຍກຳລັງລົກຫຍ້າໜານຜັກ ພ້ອມທັງລົມກັບພໍ່ຂາວຢູ່ ຄິ້ມໄດ້ເລີກວຽກແລ້ວກໍ່ຟ້າວມາຍາມຕອນນັ້ນເປັນເວລາ 17:00ໂມງ ຄິ້ມໄດ້ຍ່າງມາໃກ້ໆແມ່ຊີນ້ອຍດ້ວຍສີໜ້າຍິ້ມແຍ້ມພ້ອມດ້ວຍຂອງມາຖວາຍຈົນເຕັມສອງມື ຄິ້ມໄດ້ຂໍລົມກັບແມ່ຊີນ້ອຍ ເຊິ່ງພໍ່ຂາວກໍ່ແນມເບິ່ງໜ້າຄິ້ມດ້ວຍສາຍຕາທີ່ບໍ່ພໍໃຈເລັກໜ້ອຍ ແຕ່ຄິ້ມບໍ່ສົນໃຈ ແລ້ວແມ່ຊີນ້ອຍກໍ່ລຸກຂຶ້ນຍ່າງໄປນັ່ງທີ່ສາລາວັດ ພໍ່ຂາວກໍ່ແນມຕາມ ແມ່ຊີນ້ອຍນ້ອຍໄດ້ໄປນັ່ງຖ້າທີ່ສາລາວັດ ສ່ວນຄິ້ມແມ່ນແວ່ຖວາຍເຄື່ອງທີ່ນຳມາທານນຳແມ່ຂາວກ່ອນແລ້ວກໍ່ຟ້າວນຳໄປ ພວກເຂົາໄດ້ນັ່ງລົ່ມກັບຢູ່ໄກກັນປະມານ 1 ແມັດ

ຄິ້ມໄດ້ເອີ່ຍຖາມແມ່ຊີກ່ອນ: ແມ່ຊີນ້ອຍຢູ່ນີ້ສະບາຍດີບໍ່! ແລ້ວມື້ໃດຈະສິກອອກມາເມືອ

ແມ່ຊີນ້ອຍເຮັດໜ້າທຳມະດາ ແລະ ຕອບໄປວ່າ: ຢູ່ນີ້ສະບາຍດີພໍ່ອອກບໍ່ຕ້ອງຫ່ວງ! ເຊິ່ງຈະສິກມື້ໃດນັ້ນແມ່ນຍັງບໍ່ມີກຳນົດ

ຄິ້ມຕົກໃຈ: ຫ້ວຍ! ຢ່າເວົ້າແນວນັ້ນໃດ! ຖ້າແມ່ຊີບໍ່ສິກ! ຂະນ້ອຍນຳມາບວດ, ນຳມາເຝົ້າແມ່ຊີຢູ່ໃນວັດໃດ! ຂະນ້ອຍຍິ່ງບໍ່ໝັ້ນໃຈບັນຕາຄູບາ ແລະ ພໍ່ຂາວໃນວັດແຫ່ງນີ້ ແຫ່ງຢ້ານກະເຈົ້າມາມີໃຈໃຫ້ແມ່ຊີນ້ອຍ

ແມ່ຊີນ້ອຍແນມເບິ່ງໜ້າ: ກ່ອນສິເວົ້າຫຍັງກະລຸນາໃຫ້ກຽດຊຸດທີ່ຂ້ອຍໃສ່ ແລະ ສະຖານທີ່ທີ່ຂ້ອຍຢູ່ແນ່! ທີ່ນີ້ແມ່ວັດ! ຈິດໃຈບໍ່ໝຸກມ້ນເລື່ອງແບບນັ້ນດອກ! ຖ້າພໍ່ອອກຄິ້ມມາເພື່ອຢາກເຫັນຂ້ອຍ ພໍ່ອອກກໍ່ເຫັນແລ້ວ ສະນັ້ນພໍ່ອອກກໍ່ຄວນກັບໄປໄດ້ແລ້ວຈັກໜ່ອຍສິຮອດເວລາໄຫວ້ພຣະແລງ ຂ້ອຍຕ້ອງໄດ້ໄປກຽມຕົວ! ຂໍຕົວກ່ອນເດີ້

ເມື່ອເວົ້າສຸດແມ່ຊີນ້ອຍກໍ່ຍ່າງເຂົ້າກຸດຕິໄປ ຄິ້ມຮູ້ສຶກໃຈແຜ່ວຫຼາຍ ລາວຍ່າງຄໍຕົກໄປທີ່ຕົກແລ່ວຂັບລົດອອກຈາກວັດໄປ ໃນຕອນເດິກແມ່ຊີນ້ອຍໄຫ້ວພຣະແລ້ວນອນຂົ່ມຕາໃຫ້ລັບພະຍາຍາມບໍ່ຄິດຫາຄິ້ມ, ສ່ວນຄິ້ມກໍ່ນອນກະຊັບກະຊ່າຍໄປມານອນບໍ່ລັບ ລາວຄິດເຫັນພາບແມ່ຊີນ້ອຍຍິ້ມ, ລົມ ກັບພໍ່ຂາວຄົນນັ້ນ ແລະ ລວຄິດເຫັນສາຍຕາທີ່ແມ່ຊີນ້ອຍແນມເບິ່ງລາວເໝືອນສາຍຕາທີ່ບໍ່ມີເຍື້ອໃຍກັບລາວເລີຍ ແລະ ລາວກໍ່ຄິດທົບທວນຫຼາຍອັນຫຼາຍແລ້ວ ຄິດຮອດກໍ່ໂທຫາບໍ່ໄດ້ ເພາະແມ່ຊີນ້ອຍບໍ່ໃຊ້ໂທລະສັບ ມັນເປັນຊ່ວງເວລາທີ່ທໍລະມານສຳລັບຄິ້ມ,

ແລ້ວໃນທີ່ສຸດກໍ່ມາຮອດວັນທີ່ແມ່ຊີນ້ອຍສິກລະສິນ ເຊິ່ງມັນກໍ່ແມ່ນວັນດຽວທີ່ພໍ່ຂາວສິກລະສິນເຊັ່ນດຽວກັນ ເມື່ອລະສິນແລ້ວພວກເຂົາທັງສອງກໍ່ພາກັນມາປ່ຽນເຄື່ອງນຸ່ງ, ຫິ້ວເອົາກະເປົາເຄື່ອງຍ່າງອອກຈາກກຸດຕິທີ່ເຄີຍອາໄສ ພ້ອມທັງກ່າວຄຳອຳລາບັນດາພຣະສົງທີ່ສະໜິດທີ່ເຄີຍໃຊ້ຊີວິດຮ່ວມກັນ ທີ່ໜ້າປະຕູວັດນ້ອຍຢືນຖ້າເປິ້ນມາຮັບ ພໍດີທ້າວທີ່ມາບວດພ້ອມກັບກັບນ້ອຍຂັບລົດໃຫຍ່ອອກມາຈາກວັດ ລາວເຫັນ້ອຍລາວເລີຍບີບແກລົດໃສ່ແລະຂັບລົດໄປໄກ້ນ້ອຍ ແລະ ໄຂປະຕູລົງຈາກລົດ ມາຊວນນ້ອຍຂຶ້ນລົດເມືອນຳ

ຊາຍ: ສະບາຍດີ ຂ້ອຍຊື່ ເຈ ເດີ້ ເຮົາບວດນຳກັນຕັ້ງທິດໜຶ່ງແຕ່ຂ້ອຍຍັງບໍ່ໄດ້ແນະນຳຊື່ໃຫ້ເຈົ້າຮູ້ຈັກຊ້ຳ

ນ້ອນຍິ້ມໃສ່: ຍິນດີທີ່ໄດ້ຮູ້ຈັກຊື່ຂ້ອຍເຈົ້າຄົງສິຮູ້ລະໃດ໋ເນາະ ຄົງຈະບໍ່ແນະນຳອີກ ແຕ່ທີ່ຈິງຂ້ອຍກໍ່ໄດ້ຍິນຕອນທີ່ເຈົ້າແນະນຳຊື່ກັບຢາພໍ່ຢູ່ ແຕ່ຕອນນັ້ນເຈົ້າເວົ້າຊື່ແທ້ ມັນຍາວຂ້ອຍເລີຍບໍ່ຈື່

ເຈ: 555! ແມ່ນໆ ຊື່ແທ້ຂ້ອຍມັນຍາວ! ແລ້ວເຈົ້າສິເມືອຈັ່ງໃດເມືອພ້ອມຂ້ອຍບໍ່ຂ້ອຍສິເມືອສົ່ງ

ນ້ອຍ: ຂອບໃຈໝູ່ຂ້ອຍກຳລັງມາຮັບດຽວກໍ່ຄົງຈະຮອດ

ເຈໄດ້ຈົກນາມບັດໂຕເອງເດໃຫ່ກັບນ້ອຍ ແລະ ເວົ້າວ່າ: ນີ້ນາມບັດຂ້ອຍ! ມືຫຍັງກໍ່ໂທຫຼິ້ນນຳກັນແນ່! ສາວນ້ອຍຂ້ອຍຂໍເບີໂທເຈົ້າແນ່ໄດ້ບໍ່ ເທື່ອສິໂທຫຼິ້ນນຳໃນຖານະຄົນຮູ້ຈັກກັນ

ນ້ອຍໄດ້ຈົກບິກອອກຈາກກະເປົາ ຂຶ້ນມາຂຽນເບີໂທຕົນເອງໃສ່ນາມບັດເຈ ແລ້ວສົ່ງນາມບັດເຈຄືນ ເຈກໍ່ນັບເອົານາມບັດຈາກມືນ້ອຍ ແລ້ວເປິ້ນກໍ່ມາຮອດ ຈາກນັ້ນນ້ອຍກໍ່ຂຶ້ນລົດຈັກໄປກັບເປິ້ນ ເຈແນມເບິ່ງເບີລາວຮູ້ສຶກດີໃຈຫຼາຍທີ່ໄດ້ເບີນ້ອຍແລ້ວລາວກໍ່ຂຶ້ນລົດ ແລະ ຂັບລົດເມືອ

ອ່ານຕໍ່ສະບັບຕໍ່ໄປ

ແຕ່ງໂດຍ: ປັອກເລັກ ລາວໂພສຕ໌