ສະໜາມບິນໜອງຄ້າງເປັນອີກໂຄງການກໍ່ສ້າງໜຶ່ງທີ່ປະຊາຊົນບັນດາເຜົ່າຄອງຄອຍມາຫຼາຍປີເພື່ອຈະໄດ້ໃຊ້ບໍລິການໄປ-ມາຫາສູ່ລະຫວ່າງ ແຂວງຕໍ່ແຂວງ ແຕ່ມາຮອດປະຈຸບັນໂຄງການດັ່ງກ່າວໄດ້ໂຈະການກໍ່ສ້າງເປັນການຊົ່ວຄາວເນື່ອງຈາກບໍລິສັດຜູ້ຮັບເໝົາມີບັນຫາດ້ານທຶນຮອນ ແລະປະຈຸບັນກຳລັງຂຸ້ນຂ້ຽວລະດົມທຶນໃສ່ອັນໄດ້ກາຍເປັນສາເຫດເຮັດໃຫ້ໂຄງການຈຳເປັນຕ້ອງໄດ້ຢືດເວລາສຳເລັດອອກໄປອີກ.
ທ່ານ ໂກແມັກ ແກ້ວຈຳປາ ຫົວໜ້າໂຄງການດັ່ງກ່າວໄດ້ເປີດເຜີຍຕໍ່ທີມຂ່າວໜັງສືພິມເສດຖະກິດ-ສັງຄົມຜ່ານໂທລະສັບ ເມື່ອວັນທີ 6 ພຶດສະພາຜ່ານມາຮູ້ວ່າ: ໂຄງການກໍ່ສ້າງສະໝາມບິນໜອງຄ້າງຕັ້ງຢູບ້ານໜອງຄ້າງ ເມືອງຊຳເໜືອ ແຂວງຫົວພັນໄດ້ເລີ່ມຈັດຕັ້ງປະຕິບັດມາແຕ່ວັນທີ 7 ຕຸລາ 2013 ຕາມສັນຍາແມ່ນຮອດວັນທີ 7 ຕຸລາ 2015 ສຳເລັດເນື່ອງຈາກການ ຈັດຕັ້ງປະຕິບັດໂຄງການພົບຄວາມຫຼ້າ ຊ້າ ແລະບໍ່ເປັນໄປຕາມແຜນການທີ່ໄດ້ ກຳນົດໄວ້ເບື້ອງຕົ້ນ ບໍລິສັດຜູ້ຮັບເໝົາ ໂຄງການຈິ່ງໄດ້ສະເໜີຢື້ນເວລາການກໍ່ ສ້າງອອກໄປຈົນເຖິງເດືອນມິຖຸນາ 2016 ໂດຍໄດ້ດັດແກ້ ແລະປັບປຸງແຜນການກໍ່ສ້າງເພື່ອໃຫ້ແທດເໝາະກັບໄລຍະເວລາດັ່ງກ່າວ ແລະໄດ້ປ່ຽນແທນແຜນການກໍ່ສ້າງສະບັບເກົ່ານັບແຕ່ເດືອນກໍລະກົດ 2015.
ຢ່າງໃດກໍຕາມໂຄງການດັ່ງກ່າວຮອດຂະນະນີ້ທ່ານຫົວໜ້າໂຄງການກ່າວວ່າ: ຍັງບໍ່ເປັນໄປຕາມແຜນການ ດັດແກ້ໃໝ່ເນື່ອງຈາກຜູ້ຮັບເໝົາຂາດທຶນຮອນໃນການກໍ່ສ້າງດັ່ງນັ້ນນັບແຕ່ ທ້າຍເດືອນກຸມພາ 2016 ໂຄງການດັ່ງກ່າວຈິ່ງໄດ້ໂຈະການກໍ່ສ້າງ ແລະຄາດ ວ່າທ້າຍປີນີ້ເປັນຕົ້ນໄປຈິ່ງຈະໄດ້ລົງມືສືບກໍ່ສ້າງເນື່ອງຈາກເປັນໄລຍະທີ່ຈະກ້າວເຂົ້າສູ່ລະດູແລ້ງ ແລະຈະ ເຮັດໃຫ້ການກໍ່ສ້າງມີຄວາມສະດວກຂຶ້ນ.
ແນວໃດກໍດີ ທ່ານ ໂກແມັກ ແກ້ວຈຳປາ ໃຫ້ຮູ້ວ່າ: ປະຈຸບັນທາງບໍລິດສັດຜູ້ຮັບເໝົາກຳລັງຂຸ້ນຂ້ຽວລະດົມທຶນຈາກແຫຼ່ງທຶນຕ່າງໆ ເພື່ອເປັນທຶນຮອນເຂົ້າໃສ່ໃນການກໍ່ສ້າງທັງນີ້ ພາກສ່ວນກ່ຽວຂ້ອງທາງພາກລັດກໍໄດ້ປຶກສາຫາລືກັບບໍລິສັດ ເພື່ອຊອກຊ່ອງທາງໃນການແກ້ໄຂບັນຫາດັ່ງກ່າວຊຶ່ງໂຄງການກໍ່ສ້າງສະໜາມບິນໜອງຄ້າງມີມູນຄ່າທັງໝົດ 592 ຕື້ກວ່າກີບ ຫຼື ປະມານ 74 ລ້ານ ກວ່າໂດລາສະຫະລັດຊຶ່ງຜູ້ຮັບເໝົາແມ່ນ ບໍລິສັດພັດທະນາກະສິກຳຮວ່າງແອງອັດຕະປື ຈຳກັດ.
ອີງຕາມບົດສະຫຼຸບຂອງໂຄງການຮອດວັນທີ 31 ສິງຫາ 2015 ໂຄງການດັ່ງກ່າວສາມາດປະຕິບັດວຽກການກໍ່ ສ້າງສຳເລັດທັງໝົດ 31,81% (ຕາມ ແຜນການດັດແກ້ໃໝ່) ປະກອບມີໜ້າວຽກກໍ່ສ້າງສະໜາມບິນປະຕິບັດໄດ້ 13,7%, ຂົນວັດສະດຸດິນຖົມ 5,37%, ກໍ່ສ້າງລານຈອດລົດສະໜາມບິນ 4,03% ແລະວຽກອື່ນໆຕາມລຳດັບ.
ໂຄງການກໍ່ສ້າງສະໜາມບິນໜອງຄ້າງແມ່ນໂຄງການໜຶ່ງຂອງລັດຖະບານແຫ່ງ ສປປ ລາວ ເພື່ອເປັນການຮອງຮັບເຮືອບິນຈາກສາຍການບິນພາຍໃນ ແລະ ຕ່າງປະເທດໃນອະນາຄົດຈຸດປະສົງເພື່ອຊຸກຍູ້ສົ່ງເສີມການພັດທະນາເສດຖະກິດ-ສັງຄົມ, ການທ່ອງທ່ຽວຂອງແຂວງຫົວພັນກໍຄືພາຍໃນປະເທດໂດຍສະເພາະແມ່ນວຽກງານການຂົນສົ່ງທາງອາກາດທັງນີ້ໃນໄລຍະຍາວແມ່ນເພື່ອຜັນຂະຫຍາຍແຜນພັດທະນາເສດຖະກິດ-ສັງ ຄົມຂອງລັດຖະບານແຫ່ງ ສປປ ລາວ ປີ 2010-2020 ຕາມນະໂຍບາຍເພື່ອຫັນປະເທດຈາກປະເທດທີ່ບໍ່ມີຊາຍແດນຕິດກັບທະເລມາເປັນປະເທດບໍລິການທາງຜ່ານ ແລະມີຄວາມມຸ່ງໝັ້ນເພື່ອນຳພາປະເທດຊາດຫຼຸດພົ້ນອອກຈາກປະເທດດ້ອຍພັດທະນາໃນປີ 2020.
ເປົ້າໝາຍໂຄງການແມ່ນກໍ່ສ້າງໃຫ້ໄດ້ຕາມມາດຕະຖານປອດໄພຂອງກົມການບິນພົນລະເຮືອນ (MOS2009) ແລະມາດຕະຖານສາກົນ (ICAO) ວາງ ອອກກໍຄື: ສະໜາມບິນໃຫ້ໄດ້ຂະໜາດ 3C (Aerodrome Code 3C) ຊຶ່ງ ສາມາດຮອງຮັບເຮືອບິນຂະໜາດ 70-100 ບ່ອນນັ່ງເຊັ່ນ: ເຮືອບິນ ATR72, Fokker 70, MA-60, Fokker-100 ຫຼື ທຽບເທົ່າເຫຼົ່ານີ້ເປັນຕົ້ນ.
ທີ່ມາ: 
ຕິດຕາມຂ່າວເສດຖະກິດ-ສັງຄົມລາວ ກົດໄລຄ໌ເລີຍ!