ວັນທີ 5 ພຶດສະພາ 2016 ທີ່ຫ້ອງປະຊຸມຂອງລັດວິສາຫະກິດໄຟຟ້າລາວສາຂາແຂວງຫຼວງນ້ຳທາ ໄດ້ມີພິທີເຊັນສັນຍາຊື້-ຂາຍໄຟຟ້າລະຫວ່າງລັດວິສາຫະກິດໄຟຟ້າລາວສາຂາແຂວງຫຼວງນ້ຳທາ ກັບບໍລິສັດສະໜອງໄຟຟ້າເມືອງຫຼ້າຈຳກັດ ສປ ຈີນ, ເຂົ້າຮ່ວມມີ ທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ, ມີທ່ານ ນາງ ຫຼີ່ ໂກເມີ້ຍ ຮອງຫົວໜ້າບໍລິສັດສະໜອງໄຟ ຟ້າເມືອງຫຼ້າຈຳກັດ, ມີທ່ານ ສີສະຫວາດ ນານທິລັດ ຫົວໜ້າສາຂາລັດວິສາຫະກິດໄຟຟ້າລາວ, ມີຮອງຫົວໜ້າລັດວິສາຫະກິດໄຟຟ້າລາວສາຂາແຂວງຫຼວງນ້ຳທາ ຕະຫຼອດຮອດພະນັກງານວິຊາການທັງສອງຝ່າຍເຂົ້າຮ່ວມ.
ທ່ານ ບຸນຫອມ ອິນລໍຢິກ ຮອງຫົວໜ້າລັດວິສາຫະກິດໄຟຟ້າລາວສາຂາແຂວງຫຼວງນ້ຳທາໄດ້ລາຍງານການຮ່ວມມືຈັດຕັ້ງປະຕິບັດກ່ຽວກັບວຽກງານໄຟຟ້າຂອງສອງຝ່າຍໃນໄລຍະຜ່ານມາເລີ່ມແຕ່ເດືອນພຶດສະພາ 2013 ສະຖານີປາງທອງໄດ້ກໍ່ສ້າງສຳເລັດແລະນຳໃຊ້ຈົນເຖິງປະຈຸບັນໄລຍະເລີ່ມຕົ້ນລັດວິສາຫະກິດໄຟຟ້າລາວກໍຄື ແຂວງຫຼວງນ້ຳທາໄດ້ຮັບການສະໜອງໄຟ ຈາກບໍລິສັດສະໜອງໄຟຟ້າເມືອງຫຼ້າ ຈຳກັດ 4,34 ລ້ານກິໂລວັດໂມງ ຄຽງຄູ່ກັບເສດຖະກິດຂອງ ສປປ ລາວ ນັບມື້ນັບຂະຫຍາຍຕົວຢ່າງບໍ່ຢຸດຢັ້ງ, ມາຮອດປີ 2015 ແຂວງຫຼວງນ້ຳທາໄດ້ຮັບການສະໜອງໄຟ 14,6 ລ້ານກິໂລວັດໂມງ ທຽບໃສ່ປີ 2003 ອັດຕາເພີ່ມຂຶ້ນເທົ່າກັບ 236,83% ແຕ່ມາຮອດປີ 2016 ນີ້ທາງລັດວິສາຫະກິດໄຟຟ້າລາວໄດ້ມີແຫຼ່ງພະລັງງານໄຟຟ້າພາຍໃນພຽງພໍກັບຄວາມຕ້ອງການຈິ່ງໄດ້ຫຼຸດການນຳເຂົ້າພະລັງງານໄຟຟ້າເບື້ອງເມືອງມາງ-ປາງທອງ ລົງຈຳນວນເຄິ່ງໜຶ່ງຂອງປີຜ່ານມາຈິ່ງມີການເຊັນສັນຍາໃນມື້ນີ້ ເກີດຂຶ້ນ.
ຊຶ່ງການເຊັນສັນຍາຊື້-ຂາຍຮ່ວມກັນ ໃນຄັ້ງນີ້ແມ່ນຊື້-ຂາຍໃນຈຳນວນເຄິ່ງໜຶ່ງຂອງສັນຍາຄັ້ງກ່ອນ ໃຫ້ກຽດເຊັນສັນຍາໂດຍແມ່ນ ທ່ານ ບຸນມາ ມະນີວົງ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ແລະທ່ານ ນາງ ຫຼີ່ໂກ ເມີ້ຍ ຮອງຫົວໜ້າບໍລິສັດສະໜອງໄຟຟ້າ ເມືອງຫຼ້າ ຈຳກັດ.
ທີ່ມາ:
ຕິດຕາມຂ່າວເສດຖະກິດ-ສັງຄົມລາວ ກົດໄລຄ໌ເລີຍ!