ພິທີມອບ-ຮັບໜ້າທີ່ ປະທານສະຖາບັນວິທະຍາສາດສັງຄົມແຫ່ງຊາດ ລະຫວ່າງ ທ່ານ ສຈ. ປອ. ຈະເລີນ ເຢຍປາວເຮີ ປະທານສະຖາບັນວິທະຍາສາດ-ສັງຄົມແຫ່ງຊາດ ຜູ້ເກົ່າ ແລະ ທ່ານ ສຈ. ປອ. ສຸກກົງແສງ ໄຊຍະເລີດ ປະທານສະຖາບັນວິທະຍາສາດສັງຄົມແຫ່ງຊາດຜູ້ໃໝ່ ໄດ້ມີຂຶ້ນໃນວັນທີ 6 ພຶດສະພາ ຜ່ານມານີ້, ທີ່ສະຖາບັນດັ່ງກ່າວ ໂດຍມີທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ ຄະນະເລຂາທິການ ສູນກາງພັກ ຫົວໜ້າຄະນະຈັດຕັ້ງສູນກາງພັກ, ແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ສະຫາຍ ຈັນສີ ໂພສີຄຳ ໄດ້ມີຄຳເຫັນວ່າ: ການມອບ-ຮັບໜ້າທີ່ລະຫວ່າງ ສະຫາຍ ສຈ. ປອ. ຈະເລີນ ເຢຍ ປາວເຮີ ປະທານສະຖາບັນວິທະຍາສາດສັງຄົມແຫ່ງຊາດ ຜູ້້້ເກົ່າ ແລະ ສະຫາຍ ສຈ. ປອ. ສຸກກົງແສງ ໄຊຍະເລີດ ປະທານສະຖາບັນວິທະຍາສາດສັງຄົມແຫ່ງຊາດຜູ້ໃໝ່. ເປັນການສັບປ່ຽນບ່ອນປະຈຳການ ແມ່ນກົດເກນ ແລະ ຫຼັກການປົກກະຕິຂອງພັກເຮົາ ໂດຍອີງຕາມຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່ ໂດຍສະເພາະແມ່ນອີງຕາມ ໃນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ການແບ່ງໜ້າທີ່ ພາຍໃນ ຄະນະບໍລິຫານງານສູນກາງພັກ ສະໄໝທີ X ໂດຍອີງໃສ່ຄວາມຮຽກຮ້ອງຕ້ອງການຂອງວຽກງານ ໄດ້ສັບຊ້ອນ ທ່ານ ສຈ. ປອ. ຈະເລີນ ເຢຍປາວເຮີ ໄປເປັນລັດຖະມົນຕີປະຈຳສຳນັກງານນາຍົກ ແລະ ສະຫາຍ ສຈ. ປອ. ສຸກກົງແສງ ໄຊຍະເລີດ ອະທິການບໍດີມະຫາວິທະຍາໄລແຫ່ງຊາດ ມາຮັບໜ້າທີ່ເປັນເລຂາຄະນະພັກ, ປະທານສະຖາບັນວິທະຍາສາດສັງຄົມແຫ່ງຊາດ ຜູ້ໃໝ່.
ການມອບ-ຮັບໜ້າທີ່ໃໝ່ຂອງ ສະຫາຍ ສຈ. ປອ. ສຸກ ກົງແສງ ໄຊຍະເລີດ ແມ່ນເປັນການສືບຕໍ່ເສີມຂະຫຍາຍ ຜົນງານທີ່ໄດ້ເຮັດໃນຜ່ານມາ ໃຫ້ໃຫຍ່ຫຼວງກ່ວາເກົ່າ, ສືບຕໍ່ນຳພາວຽກງານຄົ້ນຄວ້າ ວິທະຍາສາດສັງຄົມ, ດັ່ງນັ້ນ ຈຶ່ງຮຽກຮ້ອງມາຍັງ ພະນັກງານສະມາຊິກພັກທຸກສະຫາຍ ຈົ່ງໃຫ້ການສະໜັບສະໜູນ ແລະ ຮ່ວມມື ເພື່ອພ້ອມກັນສຳເລັດໜ້າທີ່ການເມືອງ ຂອງສະຖາບັນວິທະຍາສາດສັງຄົມແຫ່ງຊາດ ກໍຄືຂັ້ນເທິງມອບໝາຍໃຫ້.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!