ອົງການຂ່າວສານທາງການຂອງເກົາຫຼີເໜືອກ່າວວ່າ ປະທານປະເທດ ຄິມ ຈົງອຶນ ໄດ້ກ່າວໃນທີ່ປະຊຸມພັກ ກຳມະກອນ ເຊິ່ງປົກຄອງປະເທດຢູ່ນັ້ນ ວ່າ ປະເທດຂອງຕົນ ຈະບໍ່ໃຊ້ອາວຸດ ນິວເຄລຍນອກຈາກວ່າ ອະທິປະໄຕຂອງຕົນ ຈະຖືກຂົ່ມຂູ່ໂດຍມະຫາອຳນາດ ນິວເຄລຍ ອື່ນໆ.
ອົງການຂ່າວສານ KNCA ລາຍງານວ່າ ນອກນັ້ນ ປະທານ ຄິມ ຈົງອຶນ ຍັງຫວັງຢາກສ້າງສາຍ ພົວພັນແບບປົກກະຕິ ກັບຫຼາຍໆປະເທດ ທີ່ເຄີຍເປັນປໍລະປັກກັນມາ ກັບລັດຖະບານ ພຽງຢາງ ແລະ ຮຽກຮ້ອງໃຫ້ມີການເຈລະຈາກັບ ເກົາຫຼີໃຕ້ຕື່ມ ເພື່ອຫຼຸດຜ່ອນຄວາມ ບໍ່ໄວ້ໃຈກັນ ແລະ ຄວາມເຂົ້າໃຈຜິດບົ່ມຊ້ອນທີ່ອາດມີຢູ່.
ລາຍງານດັ່ງກ່າວໄດ້ອ້າງຄຳເວົ້າຂອງທ່ານ ຄິມ ຈົງອຶນ ໂດຍກ່າວວ່າ “ໃນຖານະທີ່ເປັນປະເທດ ທີ່ມີຄວາມຮັບຜິດຊອບດ້ານນິວເຄລຍ ປະເທດ ຂອງພວກເຮົາຈະບໍ່ໃຊ້ ອາວຸດ ນິວເຄລຍ ນອກຈາກວ່າ ອະທິປະໄຕຂອງພວກເຮົາຖືກ ຂົ່ມຂູ່ ໂດຍກຳລັງປໍລະປັກ ບຸກລຸກດ້ວຍນິວເຄລຍ.”
ມັນບໍ່ເປັນທີ່ແຈ້ງຂາວວ່າ ຄຳປະຕິຍານຂອງທ່ານ ຄິມ ຈົງອຶນ ສະແດງໃຫ້ເຫັນການປ່ຽນແປງ ອັນໃດ ໃນທ່າທີຂອງທ່ານ ຕໍ່ປະເທດໃກ້ຄຽງ ຂອງຕົນກັບ ສະຫະລັດ ຫຼື ບໍ່. ໃນເດືອນມີນາ ຜ່ານມາ ເກົາຫຼີເໜືອ ໄດ້ຂູ່ວ່າ ຈະໂຈມຕີດ້ວຍນິວເຄລຍທັນທີ ແລະ ໂດຍບໍ່ເລືອກໜ້າ ຕໍ່ ສະຫະລັດ ແລະ ເກົາຫຼີໃຕ້ເພື່ອຕອບໂຕ້ຕໍ່ການຊ້ອມຮົບຮ່ວມທາງທະຫານ.
ຄຳເຫັນຂອງທ່ານຄິມ ຈົງອຶນ ໄດ້ມີຂຶ້ນໃນວັນສຸກ ຊ້ອງໜ້າ ຜູ້ແທນ 3,400 ຄົນ ໃນຂະນະທີ່ເກົາຫຼີໃຕ້ ກຽມພ້ອມຢ່າງໃຫຍ່ຕໍ່ການຂົ່ມຂູ່ດ່ັງກ່າວ ກ່ຽວກັບການທົດລອງນິວເຄລຍ ທີ່ອາດມີຂຶ້ນອີກ ໂດຍເກົາຫຼີເໜືອ ໃນອະນາຄົດອັນໃກ້.
ການລົງໂທດດ້ານເສດຖະກິດຂອງ ສະຫະລັດ ຕໍ່ເກົາຫຼີເໜືອໄດ້ເຂັ້ມງວດຂຶ້ນຕື່ມ ໃນເດືອນມີນາ ຫຼັງຈາກມີການທົດລອງນິວເຄລຍຄັ້ງທີສີ່ ຂອງເກົາຫລີເໜືອ.
ຂ່າວຈາກ: ສຳນັກຂ່າວເອບີຊີລາວ