ພິທີມອບ-ຮັບໜ້າທີ່ ເຈົ້າແຂວງສະຫວັນນະເຂດຜູ້ເກົ່າ ແລະ ໃໝ່ ໄດ້ຈັດຂຶ້ນເມື່ອວັນທີ 6 ພຶດສະພາຜ່ານມາ ລະຫວ່າງ ທ່ານ ປອ. ສຸພັນ ແກ້ວມີໄຊ ກຳມະການສູນກາງພັກ ເຈົ້າແຂວງຜູ້ເກົ່າກັບ ທ່ານ ສັນຕິພາບ ພົມວິຫານ ກຳມະການສູນກາງພັກ ເຈົ້າແຂວງຜູ້ໃໝ່ ໂດຍການເຂົ້າຮ່ວມເປັນກຽດຂອງ ທ່ານ ທອງລຸນ ສີສຸລິດ ກຳມະການກົມການເມືອງສູນກາງພັກ ນາຍົກລັດຖະມົນຕີ.
ໃນພິທີ ພາຍຫຼັງມີການມອບ-ຮັບຢ່າງເປັນທາງການແລ້ວ ທ່ານນາຍົກລັດຖະມົນຕີ ທອງລຸນ ສີສຸລິດ ກໍໄດ້ໃຫ້ຄຳ ໂອວາດຕັກເຕືອນ ຊຶ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍ ຜົນງານການຊີ້ນຳນຳພາຂອງ ເຈົ້າແຂວງຜູ້ເກົ່າ ໃນພາລະກິດປົກປັກຮັກສາ ແລະ ສ້າງສາແຂວງສະຫວັນນະເຂດ ໃຫ້ຫັນໄປສູ່ຄວາມຈະເລີນ, ຊີວິດການເປັນຢູ່ຂອງປະຊາຊົນ ໄດ້ຮັບການພັດທະນາດີຂຶ້ນ.
ຈາກນັ້ນທ່ານກໍໄດ້ແນະນຳໃຫ້ທ່ານເຈົ້າແຂວງຜູ້ໃໝ່ ຈົ່ງສືບຕໍ່ຈັດຕັ້ງປະຕິບັດ ແຜນພັດທະນາແຂວງ ໃຫ້ຕິດພັນກັບ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ແລະ ຮຽກຮ້ອງ ໃຫ້ສູ້ຊົນຈັດຕັ້ງຜັນ ຂະຫຍາຍມະຕິ X ຂອງພັກໄປສູ່ຜົນງານຕົວຈິງ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!