ຂປລ.ວັນທີ 6 ພືດສະພາ2016, ທ່ານ ອູ ຕິນ ຈໍ ປະທານາທິບໍດີ ແຫ່ງ ສສ ມຽນມາ ພ້ອມດ້ວຍພັນລະຍາ ແລະ ຄະນະໄດ້ເດີນທາງມາຢ້ຽມຢາມທາງລັດຖະກິດ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອຕອບສະໜອງຕາມຄຳເຊີນ ຂອງທ່ານບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເພື່ອສະເໜີຕົວ ພາຍຫລັງ ເຂົ້າດໍາລົງຕໍາແໜ່ງໃໝ່ ເພື່ອເສີມຂະຫຍາຍສາຍພົວພັນມິດຕະພາບ ແລະ ຮັດແໜ້ນການຮ່ວມມືທີ່ດີ ລະຫວ່າງ ສອງປະເທດລາວ-ສສ ມຽນມາ.
ການພົບປະສອງຝ່າຍໄດ້ຈັດຂຶ້ນ ທີ່ທຳນຽບປະທານປະເທດລະຫວ່າງ ທ່ານບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ແລະ ທ່ານ ອູ ຕິນ ຈໍ ປະທານາທິບໍດີ ແຫ່ງ ສສ ມຽນມາ ສອງຝ່າຍໄດ້ສະແດງຄວາມຍິນດີ ແລະ ຕີລາຄາສູງຕໍ່ໝາກຜົນຂອງສາຍພົວພັນມິດຕະພາບອັນດີງາມລະຫວ່າງ ສອງປະເທດໃນໄລຍະຜ່ານມາ ພ້ອມນັ້ນ ສອງຝ່າຍຍັງໄດ້ປຶກສາຫາລື ແລະ ແລກປ່ຽນຄວາມຄິດຄວາມເຫັນຮ່ວມກັນ ກ່ຽວກັບບັນຫາພາກພື້ນ ແລະ ສາກົນທີ່ມີຄວາມສົນໃຈໄດ້ຕົກລົງເຫັນດີ ແລະ ຜັນຂະຫຍາຍຜົນການຕົກລົງ ຂອງຄະນະກໍາມະທິການຮ່ວມມືລາວ-ມຽນມາ ຄັ້ງທີ 11 ໃຫ້ປະກົດຜົນເປັນຈິງ ແລະ ຊອກຊ່ອງທາງຮ່ວມມືກັນໃນການສົ່ງເສີມການຄ້າ, ການລົງທຶນ, ການສຶກສາ, ການທ່ອງທ່ຽວ ແລະ ຟື້ນຟູຄືນການເປີດສາຍການບິນໂດຍກົງ ລະຫວ່າງ ວຽງຈັນ-ຢາງກຸ້ງ ແລະ ຫລວງພະບາງ-ບາການ ກໍຄື ການພົວພັນຮ່ວມມື ລະຫວ່າງ ສອງປະເທດ ທັງໃນຂອບສອງຝ່າຍ ແລະ ຫລາຍຝ່າຍໃຫ້ນັບມື້ນັບກ້ວາງຂວາງ ແລະ ເກີດດອກອອກຜົນງອກງາມຍິ່ງໆຂຶ້ນ ບົນພື້ນຖານສອງຝ່າຍຕ່າງມີຜົນປະໂຫຍດ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!