ປັດຈຸບັນ ການສະກັດກັ້ນ ຫຼື ຍຶດສິນຄ້າຜິດກົດໝາຍເຊັ່ນ ສິນຄ້າໝົດອາຍຸ ສິນຄ້າລອກຮຽນແບບ ແລະ ອື່ນໆ ແລ້ວມາທໍາລາຍຖິ້ມ ແມ່ນເກີດຂຶ້ນຢ່າງຕໍ່ເນື່ອງ ຫຼ້າສຸດ ແຂວງຄໍາມ່ວນ ກໍໄດ້ມີການຈັດພິທີທໍາລາຍສິນຄ້າຜິດກົດໝາຍທີ່ສາມາດກວດພົບ ແລະ ຍຶດມາໄດ້ ໃນວັນທີ 06 ພຶດສະພາ 2016 ໂດຍພະແນກວິທະຍາສາດ ແລະ ເຕັກໂນໂລຊີແຂວງຄໍາມ່ວນ ຮ່ວມກັບພະແນກອຸດສາຫະກໍາ ແລະ ການຄ້າແຂວງ ພະແນກສາທາລະນະສຸກແຂວງ ຕໍາຫຼວດເສດຖະ ກິດ ພາສີເຂດ 3 ຕະຫຼອດຮອດພາກສ່ວນກ່ຽວຂ້ອງກໍໄດ້ຮ່ວມພິທີທໍາລາຍສິນຄ້າລອກຮຽນແບບ ແລະ ສິນຄ້າໝົດອາຍຸ ຢູ່ພະແນກວິທະຍາສາດ ແລະ ເຕັກໂນໂລຊີແຂວງ ໂດຍມີທ່ານນາງ ແຕງອ່ອນ ລິນສົມພູ ຮອງຫົວໜ້າພະແນກດັ່ງກ່າວ ມີບັນດາພະນັກງານ-ວິຊາການຈາກພະແນກການກ່ຽວຂ້ອງເຂົ້າຮ່ວມ.
ທ່ານ ແສງຄໍາ ພິມມະສອນ ຫົວໜ້າຂະແໜງຊັບສິນທາງປັນຍາ ມາດຕະຖານ ແລະ ວັດແທກ ໄດ້ລາຍງານການເຄື່ອນໄຫວວຽກງານຊັບສິນທາງປັນຍາໃນໄລຍະສົກປີ 2014 – 2015 ໂດຍທ່ານກ່າວວ່າ ໃນໄລຍະ 1 ປີຜ່ານມາ ພະແນກວິທະຍາສາດ ແລະ ເຕັກໂນໂລຊີແຂວງຄໍາມ່ວນ ໂດຍສະເພາະກໍຄືຂະແໜງຊັບສິນທາງປັນຍາ ມາດຕະຖານ ແລະ ວັດແທກ ໄດ້ເອົາໃຈໃສ່ຈັດຕັ້ງປະຕິບັດຕາມພາລະບົດບາດ ສິດ ແລະ ໜ້າທີ່ຂອງຕົນຢ່າງຕັ້ງໜ້າດ້ວຍຫຼາຍຮູບຫຼາຍແບບ ມີການປະສານສົມທົບກັບຂະແໜງການ ອົງການຈັດຕັ້ງທີ່ກ່ຽວຂ້ອງ ເຮັດໃຫ້ສາມາດເຄື່ອນໄຫວກວດພົບ ແລະ ຍຶດສິນຄ້າລອກຮຽນແບບ ( ສິນຄ້າປອມແປງ ) ປະເພດແປ້ງນົວກາຈອງ (ຣາຊາ ຊູຣົດ ) ໄດ້ 739 ຖົງ ຮວມມູນຄ່າ 7 ແສນກວ່າກີບ ແລະ ຍຶດສິນຄ້າໝົດອາຍຸການບໍລິໂພກປະເພດເຂົ້າໜົມ ນ້ຳຫວານ ນົມສໍາເລັດຮູບ ເຄື່ອງປຸງອາຫານ ແລະ ອື່ນໆຮວມທັງໝົດ 21 ລາຍການ ຮວມມູນຄ່າ 7,4 ລ້ານກວ່າກີບ ຮວມສິນຄ້າທີ່ຍຶດມາໄດ້ທັງໝົດ 8,1 ລ້ານກວ່າກີບ ຜ່ານການເກັບກໍາຂໍ້ມູນ ແລະ ສັງເກດຕີລາຄາຈາກການລົງເຄື່ອນໄຫວວຽກງານໂຕຈິງຍັງພົບວ່າ ມີສິນຄ້າລອກຮຽນແບບ ສິນຄ້າບໍ່ໄດ້ມາດຖານ ແລະ ສິນຄ້າໝົດອາຍຸການບໍລິໂພກ ແລະ ນໍາໃຊ້ເປັນຈໍານວນຫຼວງຫຼາຍໃນທົ່ວສັງຄົມເວົ້າຮວມ ເວົ້າສະເພາະແມ່ນຢູ່ຕາມຫ້າງຮ້ານຂາຍສົ່ງ-ຂາຍຍ່ອຍ ແລະ ທ້ອງຕະຫຼາດພາຍໃນແຂວງ ຈິ່ງໄດ້ລົງເຄື່ອນໄຫວກວດກາເພື່ອໃຫ້ເກີດຄວາມຍຸຕິທໍາແກ່ຜູ້ບໍລິໂພກ ແລະ ສັງຄົມມີຄວາມສະຫງົບ ເປັນລະບຽບຮຽບຮ້ອຍດີ.
ຂ່າວ/ພາບ: ກອງຄໍາ