ອ່ານຕໍ່ຈາກສະບັບກ່ອນ

ໃນເວລາກິນເຕົ້າຮູ້ຢູ່ນັ້ນຄິ້ມກໍ່ລັກປິດໂທລະສັບຍາມທີ່ນ້ອຍເຜີ ເພື່ອບໍ່ໃຫ້ບີ້ໂທຫາໄດ້ພວກເຂົານັ່ງລົມກັນຈົນຮອດ 22:20ໂມງ ເປິ້ນຍັງບໍ່ກັບຫ້ອງຄິ້ມເລີຍອາສານັ່ງຫຼິ້ນເປັນໝູ່ນ້ອຍທີ່ຫ້ອງເພື່ອຖ້າເປິ້ນກັບມາ ຄິ້ມເລີຍຊວນນ້ອຍຫຼິ້ນໄພ້ເພື່ອຂ້າເວລາ

ຄິ້ມ: ນ້ອຍເຮົາຫຼິ້ນໄພ້ຂ້າເວລາຖ້າເປິ້ນກັບມາດີເບາະ

ນ້ອຍ: ກະໄດ້! ຫຼິ້ນແກ້ມື ເພາະເທື່ອແລ້ວນີ້ເພິ່ນກິນເງິນເຂົາໄປຕັ້ງຫຼາຍພັນ

ຄິ້ມຫົວຂຶ້ນ: 555! ແນວຄົນອ່ອນເນາະກະເສຍແຫຼະ! ເອົາຈັ່ງຊີ້ສະ! ມື້ນີ້ຖ້າເຈົ້າຫຼິ້ນຊະນະຂ້ອຍເຈົ້າເອົາເງິນໄປໂລດ ຕາລະ 10,000 ກີບ ແຕ່ຖ້າຂ້ອຍ ຫຼິ້ນຊະນະເຈົ້າຕ້ອງໃຫ້ຂ້ອຍຫອມແກ້ມບາດໜຶ່ງ! ເອົາບໍ່

ນ້ອນຍິ້ມເບົາໆ ແລະ ແນມເບິ່ງໜ້າຄິ້ມ: ຮຶ! ຫົວໃສເນາະ! ເອົາແນວນັ້ນກະໄດ້ ມີເງິນຫຼາຍຢູ່ຕີ້ມື້ນິ

ແລະ ພວກເຂົາກໍ່ພາກັນຫຼິ້ນຕາໃດນ້ອຍໄດ້ກິນກໍ່ເອົາເງິນຄິ້ມໄປ ຕາໃດຄິ້ມໄດ້ກິນກໍ່ຫອມແກ້ມນ້ອຍຂ້າງໜຶ່ງ ພວກເຂົາທັງສອງມີຄວາມສຸກຫຼາຍ ແຕ່ບີ້ຮູ້ສຶກອຸກໃນໃຈ,ໃຈຮ້າຍ ແລະ ກໍ່ສົງໃສທີ່ຕິດຕໍ່ຄິ້ມບໍ່ໄດ້ໂທເຂົ້າເບີໃດກໍ່ບໍ່ມີສັນຍານ, ໂທເຂົ້າເບີເຮືອນຄິ້ມເອື້ອຍຄິ້ມຮັບສາຍກໍ່ບອກວ່າຄິ້ມຍັງກັບມາ ຕົງລົງຄິ້ມໄປຢູ້ໃສ

ຄິ້ມໄດ້ໃຊ້ວິທີປິດໂທລະສັບແບບນີ້ຕະຫຼອດ ເມື່ອເວລາໄປຫຼິ້ນກັບຄົນໜຶ່ງກໍ່ຈະປິດໂທລະສັບອີກໜ່ວຍໄວ້ ຖ້າບີ້ ຫຼື ນ້ອຍເກີດຄວາມສົງໃສ ແລະ ຖາມຄິ້ມກໍ່ຈະຫາຂໍ້ອ້າງຕ່າງໆນາໆເພື່ອມາແກ້ຕົວ ແລະ ສອງສາວກໍ່ຍອມໃຈອ່ອນທຸກເທື່ອ ເຖິງຈະເຊື່ອແນ່ບໍ່ເຊື່ອແນ່ແຕ່ກໍ່ບໍ່ມີໃຜກ້າເວົ້າຫຍັງເພາະບໍ່ຢາກມີປາກສຽງ

ເສົາວັນໜຶ່ງທີ່ຕະຫຼາດຂົວດິນ ຄິ້ມໄດ້ພາບີ້ໄປເລາະຊື້ເຄື່ອງ ແລະ ນ້ອຍກັບເປິ້ນກໍ່ໄປເລາະຊື້ເຄື່ອງຄືກັນ ແຖວຮ້ານຂາຍຜ້າໃໝ ໃນຂະນະທີຄິ້ມກຳລັງຢືນຖ້າບີ້ເລືອກແພຜ້າໃໝຢູ່ນັ້ນ ນ້ອຍກັບເປິ້ນເຫັນຄິ້ມຢືນຢູ່ທີ່ໜ້າຮ້ານພວກເຂົາເລີຍຟ້າວຍ່າງເຂົ້າມາຫາ ຄິ້ມຕົກໃຈທີ່ເຫັນສອງຄົນນັ້ນຍ່າງມາຫາຕົນຈົນໜ້າຈືດມຶເຢັນ ຢືນຕົວແຂງຍິ້ມບໍ່ເຕັມສົບ ເພາະຢ້ານຄວາມຜິດ ເນື່ອງຈາກວ່າຄົນທີ່ກຳລັງເລືອກແພຢູ່ຂ້າງຫຼັງໂຕນັ້ນແມ່ນບີ້, ນ້ອຍ ແລະ ເປິ້ນເມື່ອຍ່າງມາຮອດຄິ້ມກໍ່ຟ້າວເອີ້ຍຄຳທັກທາຍຄິ້ມທັນທີ

ເປິ້ນຍິ້ມໃສ່: ອ້າວຄິ້ມມາເລືອກຊື້ຜ້າຄົນດຽວຫວາ! ສິມາກໍ່ບໍ່ຊວນພວກເຂົາແນ່

ຄິ້ມມິດບໍ່ຕ້ອບ ໄດ້ແຕ່ຍິ້ມແບບຕິດໆຂັດໆບໍ່ຄືທຸກວັນ ແລ້ວບີ້ທີ່ຢືນຂ້າງຫຼັງຄິ້ມເມື່ອເລືອກແພແລ້ວກໍ່ບອກໃຫ້ຄິ້ມຈ່າຍເງິນ ລາວໄດ້ບອກຄິ້ມຈ່າຍເງິນ2-3ເທື່ອ ຄິ້ມຍັງຢືນເສີຍຢູ່ເຮັດຫູບໍ່ໄດ້ຍິນ ບີ້ເລີຍຍ່າງມາທາງຂ້າງຄິ້ມມືຈັບແຂນຄິ້ມ ແລະ ເວົ້າສຽງດັງໆວ່າ: ຄິ້ມ! ຈ່າຍເງິນແມ໋ະ ຢືນຊຶງຫຍັງຢູ່! ຄິ້ມຕົກສະເງີ້ແລ້ວຟ້າວຈົກເງິນຈ່າຍ. ນ້ອຍກັບ ເປິ້ນ ຢືນເບິ່ງໜ້າກັນ ແລະ ແນມເບິ່ງໜ້າຄິ້ມ ແລະ ໜ້າບີ້ດ້ວຍຄວາມງົງ ເພາະພວກເຂົາບໍ່ຮູ້ວ່າຜູ້ຍິງທີ່ມາກັບຄິ້ມແມ່ນໃຜບໍ່ເຄີຍເຫັນໜ້າ ແຕ່ນ້ອຍຈື່ໄດ້ວ່າສຽງນີ້ມັນຄຸ້ນໆຄືເຄີຍໄດ້ຍິນຢູ່ໃສ ບີ້ກໍ່ແນມເບິ່ງໜ້ານ້ອຍ ແລະ ເປິ້ນດ້ວຍສາຍຕາບໍ່ເປັນມິດ ເມື່ອຄິ້ມຈ່າຍເງິນແລ້ວບີ້ກໍ່ຟ້າວຈັບມືຄິ້ມຍ່າງອອກໄປຈາກຮ້ານຄິ້ມກໍ່ຍ່າງໄປກັບບີ້ໂດຍບໍ່ຫຼຽວຫຼັງກັບຄືນມາເບິ່ງນ້ອຍກັບເປິ້ນເລີຍ ເຮັດປານຄົນບໍ່ຮູ້ຈັກກັນ ນ້ອຍກັບເປິ້ນແນມນຳສອງຄົນນັ້ນໄປຈົນສຸດສາຍຕາ ແລ້ວກໍ່ຫັນໜ້າມາແນມເບິ່ງໜ້າກັນ ເປິ້ນເຫັນຕານ້ອຍແດງຂຶ້ນ, ໜ້າແດງ, ຫູແດງ ເໝືອນດັ່ງຄົນທີ່ກຳລັງຮ້ອງເປິ້ນຮູ້ດີເລີຍວ່ານ້ອຍກຳລັງນ້ຳຕາຕົກໃນ ລາວເລີຍຖາມໝູ່ດ້ວຍຄວາມເປັນຫ່ວງວ່າ:

ເປິ້ນ: ນ້ອຍໂຕໄຫວບໍ່! ຖ້າບໍ່ໄຫວມື້ນີ້ເຮົາພາກັນກັບຫ້ອງກ່ອນກະໄດ້ ມື້ໜ້າເຮົາຈິ່ງມາເລືອກຊື້ຜ້າໃໝ່ກໍ່ໄດ້ ເຂົາບໍ່ຟ້າວດອກ

ນ້ອຍຕອບເປິ້ນດ້ວຍນ້ຳສຽງສັ່ນໆເບົາໆວ່າ: ໂຕເລືອກເອົາໂລດເຮົາໄຫວ! ເຮົາຖ້າໂຕໄດ້

ເປິ້ນກໍ່ເຮັດຕາມທີ່ໝູ່ບອກລາວຟ້າວເລືອກຜ້າ ແລະ ກໍ່ຫັນມາຖາມນ້ອຍວ່າສິເອົາສີຫຍັງນ້ອຍກໍ່ແກ່ວງຫົວເຊິ່ງມັນໝາຍເຖິງວ່າລາວບໍ່ເອົາຫຍັງ ເມື່ອເລືອກຜ້າແລ້ວພວກເຂົາກໍ່ຟ້າວອອກຈາກຕະຫຼາດກັບຫ້ອງທັນທີ ເມື່ອຮອດຫ້ອງນ້ອຍຟ້າວແລ່ນເຂົ້າຫ້ອງນອນແລ້ວອັດປະຕູລັອກໄວ້ຈາກນັ້ນກໍ່ໝູບໜ້າລົງໝອນແລ້ວກໍ່ຮ້ອງໄຫ້ ນ້ອຍຄິດເລື່ອງທີ່ຕະຫຼາດ ແລະ ຄິດເຫັນນ້ຳສຽງຂອງຜູ້ຍິງຄົນນັ້ນຊ້ຳໄປຊ້ຳມາຫຼາຍຮອບຈົນໃນທີ່ສຸດລາວກໍ່ຄິດອອກວ່າສຽງຜູ້ຍິງຄົນນັ້ນແມ່ນ ສຽງທີ່ຖຽງກັບລາວໃນໂທລະສັບວັນນັ້ນ ນ້ອຍຮູ້ສຶກເຈັບທີ່ໜ້າເອິກ ແລະ ຮູ້ສຶກຄຽດໃຫ້ຄິ້ມທີ່ຄິ້ມຫຼອກວ່າເລີກກັບຜູ້ຍິງຄົນນັ້ນແລ້ວ ຄວາມຄຽດນີ້ມັນຝັງເຂົ້າໄປໃນໃຈນ້ອຍນີ້ຖືວ່າເປັນຄັ້ງທີສອງແລ້ວ, ເປິ້ນໄດ້ຄັອກປະຕູເອີ້ນນ້ອຍດ້ວຍຄວາມເປັນຫ່ວງ ລາວໄດ້ຍິນສຽງໄຫ້ລອດອອກມາຈາກປະຕູເບົາໆ ເປິ້ນຮູ້ສຶກໃຈຮ້າຍ, ເຫຼືອໃຈ ແລະ ເຈັບໃຈແທນໝູ່ ລາວຟ້າວກົດເບີຄິ້ມເພື່ອໂທໄປຖາມຄວາມຈິງ ແລະ ຕໍ່ວ່າຄິ້ມ ແຕ່ໂທເທົ່າໃດກໍ່ບໍ່ໄດ້ ເພາະຄິ້ມປິດເຄື່ອງ

ມື້ຕໍ່ມາຄິ້ມກໍ່ໄດ້ມາງໍ້ນ້ອຍທຸກມື້ຫຼັງເລີກວຽກ ທັງໂທຫາ, ສົ່ງຂໍ້ຄວາມ, ຊື້ເຄື່ອງກິນທີ່ມັກໄປໃຫ້, ຊື້ດອກໄມ້ຊໍ່ໃຫຍ່, ຊື້ຕຸກກະຕາໝາໂຕໃຫຍ່ໃຫ້, ຊື້ແຜ່ນຊີດີໜັງເກົາຫຼີໄປໃຫ້ ໄປເຮັດດີຢູ່ເຮືອນ ລົງທຶນຮອດຊັກເຄື່ອງໃຫ້ ຄິ້ມທຽວໄປເຮັດແບບນີ້ກັບນ້ອຍຕະຫຼອດໜຶ່ງອາທິດຈົນນ້ອຍຮູ້ສຶກໃຈອ່ອນແຕ່ກໍ່ບໍ່ຍອມຄືນດີງ່າຍໆ ກ່ອນທີ່ນ້ອຍຈະຍອມຄືນດີກັບຄິ້ມລາວໄດ້ຢື່ນເງື່ອນໄຂໃຫ້ຄິ້ມຄື: ຄິ້ມຕ້ອງໂທໄປບອກເລີກກັບຜູ້ຍິງຄົນນັ່ນຕໍ່ໜ້ານ້ອຍດຽວນີ້ຖ້າເຮັດໄດ້ນ້ອຍຈິ່ງຈະຍອມຄືນດີ ເຊິ່ງຂໍ້ນີ້ຄິ້ມບໍ່ສາມາດເຮັດໄດ້ ພວກເຂົາໄດ້ມີການເຈລະຈາກັນ ແລະ ຄິ້ມໄດ້ໃຫ້ສັນຍາວ່າຈະຢູ່ຫ່າງຈາກຜູ້ຍິງຄົນນັ່ນເດັດຂາດ ນ້ອຍຢື່ນເວລາໃຫ້ຄິ້ມຕັດສິນໃຈຕື່ມອີກໜຶ່ງເດືອນຖ້າບໍ່້ລີກກັບຜູ້ຍິງຄົນນັ່ນກໍ່ເລີກກັບນ້ອຍຄົນດຽວ ນ້ອຍໄດ້ຖາມເລື່ອງບີ້ ແລະຄິ້ມກໍ່ເລົ່າເລື່ອງລາວທັງໝົດໃຫ້ນ້ອຍຟັງເຖິງມັນຈະເຈັບປວດໃນເວລາຟັງແຕ່ນ້ອຍກໍ່ຢາກຮູ້ເຫດຜົນວ່າເປັນຫຍັງຄິ້ມຈິ່ງບໍ່ຍອມເລີກກັບຜູ້ຍິງຄົນນັ້ນງ່າຍໆ

ເປັນເວລາ 2-3 ທິດແລ້ວທີ່ຄິ້ມມາຢູ່ແຕ່ກັບນ້ອຍໂດຍບໍ່ໄດ້ກັບໄປຫາບີ້ເລີຍ ເວລາບີ້່ໂທຫາກໍ່ໂທບໍ່ໄດ້ເພາະປິດເຄື່ອງ ຫຼື ບໍ່ຮັບສາຍ ບີ້ເຮັດໄດ້ຢ່າງດຽວຄືລໍ! ລໍຖ້າຄິ້ມຕິດຕໍ່ມາເອງ ຈົນຈິດໃຈລາວມັນຮ້ອນຮົນເໝືອນຄົນຈະບ້າຕາຍ ໄປນຳທີ່ເຮືອນກະບໍ່ຢູ່ ຖ້າສິໄປຫາຢູ່ບ່ອນເຮັດວຽກຄິ້ມໍ່ສັ່ງໄວ້ວ່າບໍ່ໃຫ້ໄປ ແຕ່ດ້ວຍຈິດໃຈທີ່ຮ້ອນຮົນລາວເລີຍລັກໄປທີ່ຫ້ອງການຄິ້ມໂດຍບໍ່ໃຫ້ຄິ້ມຮູ້ຕົວ ຫຼັງເລີກວຽກລາວເຫັນຄິ່ມຂັບລົດອອກໄປ ບີ້ເລີຍຕັດສິນໃຈສະກົດຮອຍຕາມຄິ້ມໄປ ດ້ວຍຄວາມຢາກຮູ້ວ່າຄິ້ມໄປໃສກັນແທ້ ແລະ ແລ້ວບີ້ກໍ່ຮູ້ຄວາມຈິງທີ່ແທ້ຄິ້ມກໍ່ມາຫາຜູ້ສາວ ບີ້ບໍ່ເວົ້າຫຼາຍເລື່ອງເມື່ອເຫັນຄິ້ມຢູ່ໃນຫ້ອງກັບຜູ້ສາວ(ນ້ອຍ) ລາວເຫັນພາບທີ່ຄິ້ມກຳລັງຍ່າງໄປກອດນ້ອຍດ້ວຍຄວາມອົບອຸ່ນ ບີ້ກໍ່ຟ້າວລົງຈາກລົດ ແລະ ຍ່າງບຸກດ່ຽວເຂົ້າໄປໃນຫ້ອງກ້ວຍຄວາມໂມໂຫຮ້າຍທັນທີໂດຍທີ່ຄິ້ມຫັນຫຼັງຢູ່ພວກເຂົາບໍ່ທັນລະວັງຕົວ ບີ້ໄດ້ເອົາມືຍູ້ຄີ້ມອອກຈາກໂຕນ້ອຍ ແລ້ວດຶງນ້ອຍມາຕົບໜ້າ ຄິ້ມກໍ່ມາຫ້າມໄວ້ດຶງບີ້ອອກໄປ ແລະ ເປິ້ນທີ່ຢູ່ເຮືອນຄົວກໍ່ຟ້າວແລ່ນອອກມາເພື່ອຈະມາຕົບຊ່ວຍນ້ອຍ ແຕ່ນ້ອຍດຶງແຂນເປິ້ນໄວ້ ຈາກນັ້ນນ້ອຍກໍ່ບອກໃຫ້ຄິ້ມຟ້າວເອົາຜູ່ຍິງຂອງຄິ້ມກັບເມືອ ຄົນຂ້າງຫ້ອງມາກັນມາຫຸ້ມເບິ່ງ ນ້ອຍຮູ້ສຶກອາຍເລີຍຟ້າວຍ່າງເຂົ້າຫ້ອງນອນໄປ ຄິ້ມເອງກະອາຍແລະຟ້າວເອົາບີ້ຂຶ້ນລົດບີ້ເມືອ ສຽງບີ້ຮ້ອງດ່ານ້ອຍສະລະພັດ ເປິ້ນກໍ່ດ່າຕອບຈົນສຽງດັງຂັບຫ້ອງແຖວ ນ້ອຍທີ່ຢູ່ໃນຫ້ອງນອນໄດ້ເອົາມືອັດຫູໄວ້ເພາະບໍ່ຢາກໄດ້ຍິນ ສຽງບີ້ ແລະ ເປິ້ນດ່າກັນ ຜ່ານໄປ 5 ນາທີ ເຫດການກໍ່ສະຫງົບເມື່ອຄິ້ມພາບີ້ກັບໄປໄດ້

ນ້ອຍນັ່ງນ້ຳຕາໄຫລທີ່ຫ້ອງນອນ ເປິ້ນໄດ້ໄຂປະຕູເຂົ້າມາຫາ ແລະ ໄດ້ກອດໝູ່ໄວ້ພ້ອມປອມໃຈໝູ່ ຈາກນັ້ນລາວກໍ່ສັງເກດຮອຍມືແດງໆທີ່ຢູ່ແກ້ມນ້ອຍ ລາວເລີຍຖາມນ້ອຍດ້ວຍຄວາມຄາໃຈອອກໄປວ່າ:

ເປິ້ນ: ນ້ອຍ! ເພິ່ນຄືບໍ່ສູ້ມັນ! ຕີນມືເພິ່ນກໍ່ມີ ເພິ່ນຄືປະໃຫ້ມັນຕົບ ບາດເຂົາສິໄປຕົບມັນເພິ່ນຄືຫ້າມເຂົາໄວ້ ເພິ່ນຫ້າມເຂົາເຮັດຫຍັງເຂົາລະຫຶນແທນເພິ່ນເດະ!

ນ້ອຍເອົາມືລູບແກ້ມເບົາໆລາວຮູ້ສຶກປວດໜ້ອຍໜຶ່ງແລ້ວຕອບເປິ້ນວ່າ: ຄົນຮູ້ຈັກຄວບຄຸມອາລົມ ເປັນຄົນທີ່ຊະນະຕັ້ງແຕ່ຍັງບໍ່ທັນໄດ້ແຂ່ງ! ຂ້ອຍຈະຍອມມັນຄັ້ງນີ້ຄັ້ງດຽວ! ມັນເຮັດໃຫ້ຂ້ອຍເຈັບ ແລ້ວມັນຈະໄດ້ຮູ້! ຂ້ອຍຈະເຮັດໃຫ້ມັນບໍ່ເຫຼືອຫຍັງເລີຍ! ມັນຈະບໍ່ມີວັນໄດ້ຄິ້ມໄປຄອງ,

ເປິ້ນຖາມດ້ວຍຄວາມສົງໃສ: ແລ້ວເພິ່ນຈະເຮັດແນວໃດ?

ນ້ອຍໃຈສັ່ນວຶດໆມືຂອງລາວກຳແໜ້ນ ສາຍຕາເຕັມໄປດ້ວຍຄວາມຄຽດຊັງແລ້ວຕອບເປິ້ນວ່າ: ເພິ່ນຖ້າເບິ່ງ!

ສົງຄາມລະຫວ່າງນ້ອຍກັບບີ້ກຳລັງເລີ່ມຂຶ້ນ ນ້ອຍຈະເອົາຄືນບີ້ແນວດຕ້ອງຕິດຕາມ ອ່ານຕໍ່ສະບັບໜ້າ