ຂປລ. ເພື່ອເປັນການສົ່ງເສີມສາຍພົວພັນການຮ່ວມມືອັນດີງາມ ລະຫວ່າງ ສປປ ລາວ ແລະ ຍີ່ປຸ່ນ, ທ່ານ ຟູມີໂອະ ກິຊີດະ, ລັດຖະມົນຕີກະຊວງການຕ່າງປະເທດຍີ່ປຸ່ນ, ພ້ອມຄະນະ ໄດ້ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນລະຫວ່າງ ວັນທີ 4-5 ພຶດສະພາ 2016 ນີ້.
ເຊິ່ງຈຸດປະສົງໃນການມາຢ້ຽມຢາມ ສປປ ລາວ ໃນຄັ້ງນີ້ ມີ 4 ຈຸດປະສົງຫລັກ ຄື: ເພື່ອສະແດງຄວາມຍິນດີ ແລະ ພົບປະໂອ້ລົມ ກັບລັດຖະບານຊຸດໃໝ່ຂອງສປປ ລາວ ພ້ອມທັງປຶກສາຫາລືບັນຫາຕ່າງໆ ທີ່ສອງຝ່າຍໄດ້ໃຫ້ຄວາມສົນໃຈຮ່ວມກັນ ແນ່ໃສ່ເພື່ອຮັດແໜ້ນການພົວພັນ ແລະ ການຮ່ວມມືສອງຝ່າຍໃຫ້ແໜ້ນແຟ້ນຍິ່ງຂຶ້ນ; ເພື່ອສະແດງຄວາມຍິນດີ ທີ່ ສປປ ລາວ ເປັນປະທານອາຊຽນ ໃນປີ 2016 ນີ້, ເຊິ່ງຍີ່ປຸ່ນ ກໍມີຄວາມຍິນດີ ກັບການຮ່ວມຕົວຂອງບັນດາປະເທດອາຊຽນ ທີ່ມີຜົນດີຕໍ່ກັບການພັດທະນາເສດຖະກິດ-ສັງຄົມ ພ້ອມທັງຫວັງວ່າ ບັນດາປະເທດອາຊຽນຈະເຂົ້າຮ່ວມ ແລະ ປະກອບຄຳຄິດເຫັນ ໃນກອງປະຊຸມ G7 ທີ່ຈະຈັດຂຶ້ນ ຢູ່ປະເທດຍີ່ປຸ່ນ ໄວໆນີ້; ນອກຈາກນີ້ ຍັງເປັນການສ້າງສາຍພົວພັນຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະ ວັດທະນະທຳ-ສັງຄົມ ໂດຍສະເພາະທາງດ້ານເສດຖະກິດ ໃນນັ້ນ ມີຫລາຍໂຄງການທີ່ລັດຖະບານ ແລະ ປະຊາຊົນຍີ່ປຸ່ນ ໄດ້ໃຫ້ການຊ່ວຍເຫລືອ ແລະ ສະໜັບສະໜູນ ເຊິ່ງລັດຖະບານຍີ່ປຸ່ນ ໄດ້ເນັ້ນໜັກ ໃນດ້ານການພັດທະນາພື້ນຖານໂຄງລ່າງ, ການປັບປຸງຖະໜົນຫົນທາງ ເສັ້ນທາງຫລວງແຫ່ງຊາດ ແລະ ການພັດທະນາຊັບພະຍາກອນມະນຸດ ເຊິ່ງການພັດທະນາດັ່ງກ່າວ ຈະເປັນການປະກອບສ່ວນສຳຄັນໃນການພັດທະນາ ເສດຖະກິດ-ສັງຄົມຂອງ ສປປ ລາວ; ໃນການເດີນມາຄັ້ງນີ້ ຍັງເປັນການສ້າງສາຍພົວພັນທີ່ດີ ລະຫວ່າງ ຍີ່ປຸ່ນ ກັບ ບັນດາປະເທດລຸ່ມແມ່ນ້ຳຂອງ, ພ້ອມທັງສ້າງຄວາມເຂັ້ມແຂງ ແລະ ພັດທະນາເສດຖະກິດ-ສັງຄົມ ໃຫ້ມີຄວາມສະເໝີພາບ, ສັນຕິພາບ ໃນການພັດທະນາໃນບັນດາປະເທດຕ່າງໆ ໃຫ້ມີຄວາມເທົ່າທຽມກັນ.
ໃນໂອກາດດັ່ງກ່າວ, ຝ່າຍລັດຖະບານຍີ່ປຸ່ນ ໄດ້ຢືນຢັນຈະສືບຕໍ່ໃຫ້ການຊ່ວຍເຫລືອ ໃນການເປັນປະທານອາຊຽນຂອງສປປ ລາວ ອີງຕາມການສະເໜີຂອງລັດຖະບານລາວ. ພ້ອມທັງຮຽກຮ້ອງໃຫ້ນັກທຸລະກິດຍີ່ປຸ່ນ ເຂົ້າມາລົງທຶນ ເພື່ອເປັນສ່ວນໜຶ່ງໃນການພັດທະນາຂົງເຂດອາຊຽນ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!