ທົ່ວປະເທດມີພາຫະນະເພີ່ມຂຶ້ນ 1,717,504 ຄັນ
ຈໍານວນພາຫະນະໃນ ສປປ ລາວ ໄດ້ເພີ່ມຂຶ້ນຢ່າງໄວວາ ມາຮອດປີ 2015 ທົ່ວປະເທດມີພາຫະນະທັງໝົດ 1,717,504 ຄັນ. ໃນນັ້ນ ປະເພດລົດຈັກ ມີ 1,326,868 ຄັນ, ປະເພດລົດເບົາ ມີ 337,449 ຄັນ ແລະ ປະເພດລົດບັນທຸກ ມີ 53,187 ຄັນ. ເມື່ອທຽບໃສ່ປີ 2014 ເຫັນວ່າຈຳນວນພາຫະນະເພີ່ມຂຶ້ນ 140,320 ຄັນ ເທົ່າກັບ 8,17% ຂອງຈຳນວນພາຫະນະທັງໝົດ, ເຊິ່ງ (ບໍ່ລວມລົດພາກລັດ ແລະ ອົງການທີ່ສຳຄັນອື່ນໆ) ທີ່ມີຈຳນວນເພີ່ມຂຶ້ນເຊັ່ນດຽວກັນ.
ອີງຕາມສະຖິຕິຈາກ ກົມຂົນສົ່ງ ກະຊວງໂຍທາທິການ ແລະ ຂົນສົ່ງໃຫ້ຮູ້ວ່າ: ໃນແຕ່ລະປີມີຈຳນວນພາຫະນະເພີ່ມຂຶ້ນເລື່ອຍໆ ເຊິ່ງໃນປີ 2014 ທົ່ວປະເທດມີຈຳນວນລົດທັງໝົດ 1,577,184 ຄັນ, ຮອດປີ 2015 ມີທັງໝົດ 1,717,504 ຄັນ. ໃນນັ້ນຫຼາຍກວ່າໝູ່ຢູ່ນະຄອນຫຼວງວຽງຈັນ ມີ 721,882 ຄັນ ຮອງມາສະຫວັນນະເຂດ ມີ 273,279 ຄັນ, ຈຳປາສັກ ມີ 145,289 ຄັນ, ຫຼວງພະບາງ ມີ 96,496 ຄັນ, ແຂວງວຽງຈັນ ມີ 70,121 ຄັນ. ໜ້ອຍກວ່າໝູ່ແມ່ນຢູ່ແຂວງໄຊສົມບູນ ມີ 369 ຄັນ ແລະ ເຊກອງ 8,271 ຄັນ.
ທ່ານ ນວນໄຊ ພະໄຊສົມບັດ ຫົວໜ້າກອງຄຸ້ມຄອງພາຫະນະ ແລະ ການຂັບຂີ່ນະຄອນຫຼວງວຽງຈັນ ໃຫ້ຮູ້ວ່າ: ສະເພາະລົດທີ່ມາຂຶ້ນທະບຽນແຕ່ລະປີໃນນະຄອນຫຼວງວຽງຈັນແມ່ນຈຳນວນເພີ່ມຂຶ້ນຢ່າງຕໍ່ເນື່ອງ ເຊິ່ງມັນໄດ້ສະແດງອອກໃນ ປີ 2009 ຈຳນວນພາຫະນະໃນນະຄອນຫຼວງວຽງຈັນ ມີທັງໝົດ 365,903 ຄັນ, ປີ 2010 ມີ 419,167 ຄັນ, ປີ 2012 ມີ 535,535 ຄັນ, ປີ 2013 ມີ 604,604 ຄັນ, ປີ 2014 ມີ 651,721 ຄັນ ແລະ ປີ 2015 ມີ 721,882 ຄັນ. ໃນນີ້, ປະເພດລົດຈັກ (ລົດສອງລໍ້) ກວມເຖິງ 60% ຂອງຈໍານວນລົດທັງໝົດທີ່ມາຂຶ້ນທະບຽນກັບກອງຄຸ້ມຄອງພາຫະນະ ແລະ ການຂັບຂີ່ພວກເຮົາ, ເຊິ່ງໄດ້ສົ່ງຜົນໃຫ້ການສັນຈອນໃນເຂດຕົວເມືອງນັບມື້ນັບແອອັດ ໂດຍສະເພາະໃນຕົວເມືອງນະຄອນຫຼວງວຽງຈັນການຈະລາຈອນຈະແອອັດໃນເວລາຮີບດ່ວນ, ບາງເຂດກໍ່ຕິດຍາວເປັນກິໂລແມັດ.
ແຫ່ງຂ່າວຈາກ:ໜັງສືພິມເສດຖະກິດ-ການຄ້າ