ຂປລ. ນັກ​ທ່ອງ​ທ່ຽວ​ຕ່າງປະ​ເທດ​ຫລັງ​ໄຫລ​ເຂົ້າ​ຢ້ຽມຢາມ ​ແລະ ທ່ຽວ​ຊົມ​ແຂວງ​ຜົ້ງ​ສາລີ ​ເພີ່ມ​ຂຶ້ນ​ຢ່າງ​ຕໍ່​ເນື່ອງ​ ໂດຍ​ຈຸດ​ດຶງ​ດູດສ່ວນ​ໃຫຍ່​​ແມ່ນ​ທ່ຽວ​ຊົມ​ຊົນ​ເຜົ່າ, ວິຖີຊີວິດ ​ແລະ ທໍາ​ມະ​ຊາດ ຂະນະ​ທີ່ຜູ້​ປະກອບ​ການທຸລະ​ກິດ​ທ່ອງ​ທ່ຽວ ​ແລະ ປະຊາຊົນ​ພາຍ​ໃນ​ແຂວງ​ດັ່ງກ່າວ ​ມີ​ຄວາມ​ກັງວົນ​ວ່າ​ຖ້າ​ມີ​ການ​ພັດທະນາ​​ໄວ​ເກີນ​ໄປ ​ໂດຍ​ບໍ່​ມີ​ການຈັດການວາງ​ແຜນ, ການສະຫງວນ​ບາງ​ເຂດ​ໄວ້ ​ແລະ ບໍ່​ມີ​ການ​ຄຸ້ມ​ຄອງ​ຢ່າງ​ເປັນ​ລະບົບ​ຈະ​ສົ່ງ​ຜົນ​ກະທົບ​ໃນ​ຕໍ່ໜ້າ​ແນ່ນອນ.

ທ່ານ ອານຸວົງ ​ແກ້ວ​ນາກ​ອນ ​ເຈົ້າ​ໜ້າ​ທີ່​ວິຊາ​ການ​ຂອງ​ພະ​ແນ​ກຖະ​ແຫລ​ງຂ່າວ, ວັດ​ທະນະ​ທໍາ ​ແລະ ທ່ອງ​ທ່ຽວ ​ໄດ້​ເປີດ​ເຜີຍ​​ໃນ​ວັນ​ທີ 3 ພຶດສະພາ 2016 ນີ້ ​ວ່າ: ປີຜ່ານມາ​ມີ​ນັກ​ທ່ອງ​ທ່ຽວ​ເຂົ້າ​ມາ​ຢ້ຽມຢາມ ​ແລະ ທ່ຽວ​ຊົມ​ພາຍ​ໃນ​ແຂວງ​ຂອງ​ພວກ​ເຮົາ​ປະມານ 62.000 ກວ່າ​ຄົນ. ​ໃນ​ນັ້ນ​, ນັກ​ທ່ອງ​ທ່ຽວ​ສາກົນ 14.000 ຄົນ ​ແລະ ນັກ​ທ່ອງ​ທ່ຽວ​ຕາມ​ຊາຍ​​ແດນປະມານ 47.000 ຄົນ ​ແລະ ຄາດ​ວ່າ​ນັກ​ທ່ອງ​ທ່ຽວ​ຈະ​ສືບ​ຕໍ່​ເພີ່ມ​ຂຶ້ນ​ປະມານ 70.000 ຄົນ ​ເຊິ່ງນັກ​ທ່ອງ​ທ່ຽວ​ສ່ວນ​ໃຫຍ່​ແມ່ນ​ເຂົ້າ​ໄປ​ທ່ຽວ​ຊົມ​ວິຖີ​ຊີວິດ​ຂອງ​ຊົນ​ເຜົ່າ, ຂີ່​ເຮືອ​ລ່ອງ​ນໍ້າ​ອູ​ຊົມ​ທິວ​ທັດທໍາ​ມະ​ຊາດ ​ແລະ ສັດປ່າ ​ຈາກ​ເມືອງ​ສໍາພັນ, ​ເມືອງຂວາ​ ​ແຂວງ​ຜົ້ງ​ສາລີ​ ​ເຖິງໜອງ​ຂຽວ ​ເມືອງ​ງອຍ ​ແຂວງ​ຫລວງ​ພະ​ບາງ, ສືບ​ຕໍ່​ກາບ​ໄຫວ້​ພະພຸດທະ​ຮູບ​ໃນ​ຖໍ້າ​ຕິ່ງ ​ແລະ ຢ້ຽມ​ຊົມ​ເມືອງ​ມໍລະດົກ​ໂລກ.

ທ່ານ ອານຸວົງ​ ກ່າວ​ຕື່ມ​ອີກ​ວ່າ: ​ແຂວງ​ຜົ້ງ​ສາລີ​ ຖື​ວ່າ​ເປັນ​ໜຶ່ງ​ໃນ​ຫລາຍໆ​ແຂວງ​ຂອງ ສປປ ລາວ​ ທີ່​ມີ​​ຫລາຍຊົນ​ເຜົ່າ ທີ່ດໍາລົງ​ຊີວິດແບບກະແຈກກະຈາຍ, ມີອາກາດ​ເຢັນດີ ແລະ ມີນໍ້າອູ​ໄຫລ​ຜ່ານຍາວ 448 ກິໂລແມັດ ປຽບເໜືອເສັ້ນເລືອດໃຫຍ່ ທີ່ຫລໍ່ລ້ຽງຊີວິດປະຊາຊົນມາຕັ້ງແຕ່ບູຮານ​ນະ​ການ ແລະ ທັງເປັນທ່າ​ແຮງ​ທີ່ສຳຄັນຂອງແຂວງ ເພື່ອດຶງດູດດ້ານການທ່ອງທ່ຽວ, ສ້າງວຽກເຮັດງານທໍາ ແລະ ສ້າງລາຍໄດ້ໃຫ້ປະຊາຊົນແບບຍືນຍົງ.

ທ່ານ ປຸ້ຍ ຜູ້ປະກອບການທຸລະກິດແລ່ນເຮືອນຢູ່ເມືອງຂວາ ​ເວົ້າວ່າ: ອຸດສາຫະກໍາທ່ອງທ່ຽວພາຍໃນແຂວງ ຖື​ໄດ້ວ່າເປັນແຫລ່ງລາຍຮັບໜຶ່ງ​ທີ່​ສຳຄັນ ໃນການແກ້ໄຂຄວາມທຸກຍາກຂອງປະຊາຊົນບັນດາ​ເຜົ່າ ໂດຍສະເພາະການບໍລິການໂຮງແຮມ, ເຮືອນພັກ, ການແລ່ນເຮືອນ ແລະ ອື່ນໆ ແນວໃດກໍດີ ການພັດທະນາກໍເປັນສິ່ງທີ່ຈຳ​ເປັນ ​ແລະ ຂາດ​ບໍ່​ໄດ້ ​ແຕ່​ກໍຕ້ອງ​ໄດ້ມີການຈັດການບໍລິຫານ ແລະ ຄຸ້ມຄອງທີ່ດີ ສິ່ງ​ສຳຄັນບໍ່​ເປັນ​ພິດ​ຕໍ່​ສິ່ງ​ແວດລ້ອມ.

ທ່ານ ແສງຈັນ ປະຊາຊົນເມືອງຂວາ ​ເວົ້າວ່າ: ຕົນເອງແລ່ນເຮືອມາ 10 ກວ່າປີ ​ແລ້ວເຊິ່ງທຸ ລະກິດແລ່ນເຮືອໄດ້ເຮັດ​ໃຫ້ຊີວິດ​ການ​ເປັນ​ຢູ່ດີ​ຂຶ້ນ​ເລື້ອຍໆ, ມີລາຍຮັບປົກກະຕິສະເລ່ຍປະມານ 3–4 ແສນກີບຕໍ່ມື້ ເຊິ່ງນັກທ່ອງທ່ຽວສ່ວນໃຫຍ່ມາ​ໃຊ້ບໍລິການ ແມ່ນຊາວຕ່າງປະເທດທີ່ມາຈາກຊາຍ ແດນ ລາວ–ຫວຽດນາມ ເຂົ້າມາທ່ອງ​ທ່ຽວເມືອງມໍລະດົກໂລກ ​ແລະ ນັ່ງເຮືອຈາກເມືອງຂວາ ມຸ່ງໜ້າສູ່ເມືອງງອຍ.

ແຫລ່ງຂ່າວ:

ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!