ການສ້າງທຸລະກິດແມ່ນຕ້ອງຂຶ້ນກັບຄວາມມັກຂອງແຕ່ລະບຸກຄົນຄືດັ່ງ ທ່ານ ຂັນຄຳ ພັນທະວົງ ນັກທຸລະກິດໜຸ່ມນ້ອຍ ອາຍຸ 26 ປີ ທີ່ເຮັດທຸລະກິດເຮືອນພັກ, ຮ້ານອາຫານ ໂດຍເກີດຈາກໃຈມັກເພື່ອບໍລິການບັນດານັກທ່ອງທ່ຽວ, ນັກທຸລະກິດລວມເຖິງພໍ່ແມ່ປະຊາຊົນ, ພໍ່ຄ້າຊາວຂາຍທີ່ມາພັກຜ່ອນຢ່ອນໃຈ ແລະ ຮັບປະທານອາຫານ.
ທ່ານ ຂັນຄຳ ພັນທະວົງ ຫຼື ໂອເລ່ ເຈົ້າຂອງທຸລະກິດເຮືອນພັກ, ຮ້ານອາຫານຂັນຄຳ ແລະຍັງເປັນຮຸ້ນສ່ວນຂອງນ້ຳຄານຮໍລິເດ ເມືອງຊຽງເງິນ ແຂວງຫຼວງພະບາງ ໃຫ້ຮູ້ວ່າ: ຮ້ານອາຫານຂັນຄຳຊົມວິວຊຽງເງິນສ້າງຂຶ້ນເມື່ອປີ 2015 ສ່ວນແມ່ນ້ຳຄານຮໍລິເດເປັນບ່ອນພັກຜ່ອນແຫ່ງໃໝ່ທີ່ສ້າງຂຶ້ນສຳເລັດໃນ ປີ 2016 ນີ້ ແລະໄດ້ຖືຮຸ້ນ 50% ສຳລັບແຮງບັນດາໃຈໃນການສ້າງທຸລະກິດແມ່ນສ້າງຂຶ້ນເພື່ອໃຫ້ເປັນທີ່ຍອມຮັບຂອງຄົນພາຍໃນ ແລະ ຕ່າງປະເທດ, ຢາກສ້າງແຮງບັນດານໃຈໃຫ້ກັບໄວໜຸ່ມຍຸກໃໝ່, ໂດຍເນັ້ນທາງດ້ານການບໍລິການການທ່ອງທ່ຽວເປັນຫຼັກ ແລະ ຢາກນຳເອົາວັດທະນະທຳຂອງຄົນລາວມາສະແດງອອກໃຫ້ຊາວຕ່າງຊາດຮູ້ເຖິງການຕົກແຕ່ງຮ້ານ ແລະເຮືອນພັກແບບບູຮານລາວ ແລະທັງຢາກເປັນສ່ວນໜຶ່ງໃນການພັດທະນາປະເທດ.
ແນວໃດກໍດີທ່ານ ຂັນຄຳ ພັນທະວົງ ໃຫ້ຮູ້ອີກວ່າ: ການເຮັດທຸລະກິດໃດໜຶ່ງກໍຕ້ອງມີສິ່ງທ້າທາຍຫຼາຍໆຢ່າງ ແຕ່ສຳລັບຂ້າພະເຈົ້າແມ່ນຖືຕົນເອງເປັນຫຼັກ, ເຊື່ອໝັ້ນຕົນເອງວ່າຕ້ອງເຮັດໄດ້ ແລະ ຕ້ອງປະສົບຄວາມສຳເລັດ, ຕ້ອງມີການວາງແຜນລ່ວງໜ້າກ່ອນທີ່ຈະລົງມືເຮັດຖ້າສິ່ງທີ່ລົງມືເຮັດບໍ່ໄດ້ຮັບຜົນດີແມ່ນຈະປ່ຽນຄວາມຄິດປ່ຽນແຜນໃໝ່ ແຕ່ບໍ່ຍອມປ່ຽນເປົ້າໝາຍ ເພາະວ່າບັນຫາ ແລະອຸປະສັກທີ່ເຮົາພົບຖືວ່າເປັນສ່ວນໜຶ່ງຂອງຄວາມສຳເລັດຖ້າເຮົາແກ້ໄຂໃຫ້ຖືກຈຸດ.
ສຳລັບແຜນການຕໍ່ໜ້າແມ່ນຈະຂະຫຍາຍທຸລະກິດ ແລະສ້າງບໍລິສັດທ່ອງທ່ຽວແມ່ນ້ຳຄານຮໍລິເດເປັນຂອງຕົນ ເອງທັງນີ້ກໍຂໍຝາກເຖິງບັນດາລູກຄ້າທຸກທ່ານທີ່ໃຫ້ຄວາມໄວ້ວາງໃຈໃນການບໍລິການຂອງພວກເຮົາຖ້າມີສິ່ງໃດທີ່ຍັງຂາດຕົກບົກພ່ອງ, ຜິດພາດ ຫຼື ບໍ່ພໍໃຈໃນການບໍລິການຂໍໃຫ້ສົ່ງຄຳຕຳນິຕິຊົມມາໄດ້ຮ້ານອາຫານຂັນຄຳຊົມວິວຊຽງເງິນຂອງພວກເຮົາຈະປັບປຸງໃຫ້ດີຂຶ້ນກວ່າເກົ່າອີກສ່ວນສະຖານທີ່ຕັ້ງຢູ່ບ້ານຊຽງເງິນເມືອງຊຽງເງິນ ແຂວງຫຼວງພະບາງ.
ທີ່ມາ: 