ສຳນັກຂ່າວຕ່າງປະເທດ ລາຍງານໃນວັນທີ 2 ພຶດສະພາຜ່ານມານີ້ວ່າ ປີນີ້ຜົນຜະລິດເຂົ້າອາດຈະຫລຸດລົງ ເປັນຄັ້ງທຳອິດໃນຮອບ 6 ປີ ຈາກສະພາວະໄພແຫ້ງແລ້ງ ທີ່ເປັນຜົນພວງຂອງປະກົດການເອວນິໂຢ ໃນພື້ນທີ່ສາມປະເທດ ຜູ້ສົ່ງອອກເຂົ້າລາຍໃຫຍ່ຂອງໂລກຢູ່ອາຊີ ກຳລັງປະສົບພົບພໍ້ໃນປັດຈຸບັນ ເຮັດໃຫ້ເປັນການເພີ່ມຄວາມສ່ຽງ ທີ່ລາຄາເຂົ້າຈະກັບຄືນມາທະຍານຂຶ້ນສູງອີກເທື່ອໜຶ່ງ.
ນັກເສດຖະສາດຫລາຍທ່ານໄດ້ຊີ້ໃຫ້ເຫັນວ່າ ໃນປັດຈຸບັນ ສາເຫດທີ່ລາຄາເຂົ້າ ຍັງບໍ່ທັນມີປະຕິກິລິຍາສູງຂຶ້ນເທື່ອນັ້ນ ແມ່ນຍ້ອນອິນເດຍ ແລະ ໄທ ຍັງມີເຂົ້າໃນສາງລົ້ນຕະຫລາດຢ່າງມະຫາສານ, ແຕ່ຄາດວ່າຫລັງຈາກໝົດປີ 2016 ນີ້ ຈະເຮັດໃຫ້ປະລິມານເຂົ້າໃນສາງຫລຸດລົງ ແລະ ຈະເກີດມີການເໜັງຕີງຂອງລາຄາເຂົ້າສູງຂຶ້ນຢ່າງແນ່ນອນ.
ທັງນີ້ ເນື່ອງຈາກຄື້ນຄວາມຮ້ອນ ໄດ້ປົກຄຸມປະເທດອິນເດຍ ຊຶ່ງເປັນຜູ້ຜະລິດເຂົ້າລາຍໃຫຍ່ ອັນດັບໜຶ່ງຂອງໂລກ ແລະ ອັນດັບທີສອງຄື ປະເທດໄທ, ສ່ວນຜູ້ຜະລິດລາຍໃຫຍ່ອັນດັບທີສາມຢ່າງຫວຽດນາມ ກໍກຳລັງປະສົບກັບບັນຫາໄພແຫ້ງແລ້ງ ຊຶ່ງທັງສາມປະເທດດັ່ງກ່າວນີ້ ສົ່ງອອກເຂົ້າລວມກັນແລ້ວ ກວມ 60% ຂອງປະລິມານເຂົ້າທົ່ວໂລກ.
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!