ຂປລ. ທ່ານ ຄຳມອນ ພົມວິພັກ ຫົວໜ້າຫ້ອງການ ກະສິກຳ ແລະ ປ່າໄມ້ ເມືອງໜອງບົກ ໄດ້ໃຫ້ສຳພາດ ຕໍ່ສື່ມວນຊົນເມື່ອບໍ່ດົນນີ້ວ່າ: ການຜະລິດເຂົ້ານາແຊງໃນປີນີ້ ແຜນສູ້ຊົນແມ່ນ 2.100 ເຮັກຕາ, ມາຮອດປະຈຸບັນເກັບກ່ຽວ ໄດ້ແລ້ວ 25% ຂອງເນື້ອທີ່ປັກດຳຕົວຈິງ.
ການຜະລິດເຂົ້ານາແຊງ ຂອງກະສິກອນ ໃນທົ່ວເມືອງ ໜອງບົກ ປີນີ້ບໍ່ສາມາດບັນລຸຕາມແຜນການ ເນື່ອງຈາກວ່າ ລະບົບຊົນລະປະທານບໍ່ມີຄວາມພ້ອມ ໂດຍສະເພາະແມ່ນລະບົບ ຫົວງານຈັກສູບນ້ຳຕ່າງໆ ບໍ່ໄດ້ນຳໃຊ້ເຖິງ 5 ໂຄງການ ແລະ ໄດ້ນຳໃຊ້ 21 ໂຄງການ, ແຕ່ມີບາງໂຄງການ ຍັງມີຄວາມລ້າຊ້າ ຍ້ອນວ່າໄດ້ມີການປັບປຸງ ແລະ ບໍ່ໄດ້ຕາມແຜນການ, ນອກຈາກນີ້ແລ້ວ ຍັງມີບັນຫາກ່ຽວກັບ ເຂົ້າເປັນເພ້ຍ, ໄປຄຽງຄູ່ກັນນັ້ນ ປະຊາຊົນໃນບາງເຂດ ໄດ້ຢຸດເຊົາການຜະລິດເຂົ້ານາແຊງ ເນື່ອງຈາກຕົ້ນທຶນ ໃນການຜະລິດສູງ ໂດຍສະເພາະ ແມ່ນຄ່າໃຊ້ຈ່າຍຕ່າງໆ, ລາຄາເຂົ້າແມ່ນຍັງບໍ່ມີການຮອງຮັບ ຈຶ່ງໄດ້ຫັນໄປປະກອບ ອາຊີບໃໝ່ ເຊັ່ນ: ປູກໝາກເຜັດ, ສາລີ, ໝາກຖົ່ວ, ໝາກແຕງ ແລະ ຜັກຊະນິດຕ່າງໆ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!